ઓનલાઈન ટાસ્ક-રેટિંગના નામે સાયબર ગઠિયાઓનો મોટો ફંદો
પાર્ટ ટાઈમ કમાણીની લાલચે મેટોડાના યુવાને 41 લાખ ગુમાવ્યા
વોટ્સએપથી શરૂઆત, ટેલિગ્રામમાં ફસાયો, નફો આપીને વિશ્વાસ જીત્યા બાદ ‘ફી’ના બહાને લાખો પડાવ્યા
અગ્ર ગુજરાત, રાજકોટ
મેટોડા જીઆઈડીસી નજીક રહેતા એક યુવાનને પાર્ટ ટાઈમ કમાણીની લાલચ આપી સાયબર ગઠિયાઓએ ચોંકાવનારી રીતે ₹41.14 લાખની છેતરપિંડી આચરી હોવાનો બનાવ સામે આવ્યો છે. શરૂઆતમાં નાનાં ટાસ્ક પૂર્ણ કરાવી અને વળતર ચૂકવી વિશ્વાસ જીતનાર ઠગોએ પછી મોટી રકમ રોકાણ કરાવી અને નાણાં ઉપાડવા જતાં અલગ અલગ ફીના નામે લાખો રૂપિયા પડાવી લીધા હતા. આખરે સતત પૈસાની માંગણી થતાં યુવાનને છેતરાયો હોવાનો અહેસાસ થયો અને તેણે રાજકોટ રેન્જ સાયબર ક્રાઇમ પોલીસ મથકે ફરિયાદ નોંધાવી છે.
ફરિયાદ મુજબ, પીડિત અમિત માલીરામ શર્મા (ઉ.વ. 37), જે મેટોડા જીઆઈડીસીમાં આવેલી એક ખાનગી કંપનીમાં આસિસ્ટન્ટ મેનેજર તરીકે કામ કરે છે, તેને વોટ્સએપ પર પાર્ટ ટાઈમ જોબ ઓફરનો મેસેજ મળ્યો હતો. વધારાની આવકની આશામાં તેણે મેસેજ પર પ્રતિસાદ આપ્યો હતો. ત્યારબાદ ‘આયુષમતી’ નામની વ્યક્તિએ પોતાને એક જાણીતી કંપનીની એજન્ટ તરીકે ઓળખ આપી અને ઓનલાઈન પ્રોડક્ટ્સને રેટિંગ આપવાનું સરળ કામ આપવાનું જણાવ્યું હતું.
શરૂઆતમાં કામ ખૂબ સહેલું અને આકર્ષક લાગતું હતું. વોટ્સએપ પર વાતચીત બાદ યુવાનને ટેલિગ્રામ પર શિફ્ટ કરાયો, જ્યાં ‘મીરામોહન01’ નામના એકાઉન્ટ સાથે સંપર્ક કરવા જણાવાયું. ત્યારબાદ તેને એક વેબસાઈટ લિંક મોકલી એકાઉન્ટ બનાવવા કહ્યું. ગઠિયાઓએ વિશ્વાસ જીતવા માટે શરૂઆતમાં યુવાનના એકાઉન્ટમાં રૂ. 10 હજારની ક્રેડિટ આપી અને કેટલાક ટાસ્ક પૂર્ણ કરવા કહ્યું.
યુવાને 21 રેટિંગ ટાસ્ક પૂર્ણ કરતાં તેને રૂ. 1222 જેટલું વળતર મળ્યું, જે તેણે સફળતાપૂર્વક ઉપાડી લીધું હતું. આથી તેને કંપની પ્રામાણિક હોવાનું લાગ્યું. ત્યારબાદ તેને ફરી રૂ. 10 હજારનું રિચાર્જ કરવા કહેવામાં આવ્યું. તેણે રકમ જમા કરાવતા તેને રૂ. 15680 અને ત્યારબાદ ફરી રૂ. 19575 જેટલું વળતર મળ્યું, જે તેણે ફરી ઉપાડી લીધું હતું. આ ત્રણેય ટ્રાન્ઝેક્શન સફળ રહેતાં યુવાનનો વિશ્વાસ સંપૂર્ણ રીતે કેળવાઈ ગયો હતો. આ પછી ગઠિયાઓએ સ્પેશિયલ ટાસ્ક અને હાઈ પ્રોફિટ ઓફર ના નામે વધુ રોકાણ કરવા પ્રેરિત કર્યો. યુવાને વધુ નફાની આશામાં કટકે કટકે મોટી રકમ જમા કરાવવાનું શરૂ કર્યું. પરંતુ જ્યારે તેણે મોટી રકમ ઉપાડવાનો પ્રયાસ કર્યો ત્યારે ગઠિયાઓએ અલગ અલગ કારણો આપીને વધુ પૈસા માગ્યા. ક્યારેક ટેક્સ, ક્યારેક પ્રોસેસિંગ ફી, તો ક્યારેક એકાઉન્ટ અનલોક ચાર્જના નામે સતત નાણાં ટ્રાન્સફર કરાવવામાં આવ્યા. આ સમગ્ર પ્રક્રિયા દરમિયાન 24 ઓક્ટોબરથી 30 નવેમ્બર વચ્ચે કુલ 46 જેટલા ઓનલાઈન ટ્રાન્ઝેક્શન મારફતે યુવાન પાસેથી ₹41,14,184 જેટલી રકમ પડાવી લેવામાં આવી હતી. છતાં પણ નાણાં ઉપાડવાની પરવાનગી આપવામાં આવી નહોતી અને વધુ રકમની માંગણી ચાલુ જ રાખવામાં આવી હતી.
આખરે સતત દબાણ અને શંકાસ્પદ વર્તનને કારણે યુવાનને છેતરપિંડીનો ભાન થયું અને તેણે તરત જ રાજકોટ રેન્જ સાયબર ક્રાઇમ પોલીસનો સંપર્ક કર્યો હતો. પોલીસએ ફરિયાદના આધારે અજાણ્યા સાયબર ઠગો વિરુદ્ધ ગુનો નોંધી તપાસ શરૂ કરી છે.
તપાસમાં સામે આવ્યું છે કે આ પ્રકારના સાયબર ફ્રોડમાં ગઠિયાઓ પહેલા નાના ટાસ્ક આપી અને થોડું વળતર આપીને વિશ્વાસ જીતે છે. ત્યારબાદ તેઓ મોટી રકમ રોકાણ કરાવી ‘હાઈ રિટર્ન’નું લાલચ આપે છે અને અંતે નાણાં ઉપાડવા માટે અલગ અલગ ફીના બહાને વધુ પૈસા પડાવે છે. સાયબર ક્રાઇમ પોલીસે લોકોને ચેતવણી આપી છે કે સોશિયલ મીડિયા અથવા મેસેજિંગ એપ્સ પર મળતી પાર્ટ ટાઈમ કમાણીની ઓફર સામે સાવચેત રહેવું જોઈએ. કોઈપણ અજાણી વેબસાઈટ અથવા એપ પર એકાઉન્ટ બનાવી નાણાં રોકતા પહેલાં તેની સાચાઈ ચકાસવી જરૂરી છે. આ કેસમાં પોલીસે બેંક એકાઉન્ટ અને ટ્રાન્ઝેક્શનની વિગતો મેળવી આરોપીઓ સુધી પહોંચવાનો પ્રયાસ શરૂ કર્યો છે. ટેક્નિકલ સર્વેલન્સ અને ડિજિટલ ટ્રેકિંગના આધારે ગઠિયાઓને ઝડપવાની કાર્યવાહી તેજ કરવામાં આવી છે. આ ઘટના ફરી એકવાર સાબિત કરે છે કે ઝડપી કમાણી ના લોભમાં લોકો સહેલાઈથી સાયબર ગઠિયાઓના જાળમાં ફસાઈ જાય છે. ખાસ કરીને ઓનલાઈન ટાસ્ક અને રેટિંગના નામે ચાલી રહેલા ફ્રોડથી સતર્ક રહેવું હવે સમયની માંગ બની ગઈ છે.
