ભારત પધારેલા આચાર્ય લોકેશજીનું જૈન સંતો, અગ્રણીઓ દ્વારા અભિવાદન

ભારત પધારેલા આચાર્ય લોકેશજીનું જૈન સંતો, અગ્રણીઓ દ્વારા અભિવાદન

“આચાર્ય લોકેશજીએ જૈન ધર્મ અને ભારતીય સંસ્કૃતિનું વિશ્વમાં ગૌરવ વધાર્યું છે” – વરુણ મુનિજી

અગ્ર ગુજરાત, રાજકોટ

ભારતના પ્રથમ વિશ્વ શાંતિ કેન્દ્ર, ગુરુગ્રામથી શરૂ થઈ અમેરિકાની સંસદ (કેપિટલ હિલ) સુધી પહોંચેલા ઐતિહાસિક ‘We Support Peace’ અભિયાનને સફળતાપૂર્વક પૂર્ણ કરીને ભારત પરત ફરેલા અભિયાનના પ્રણેતા અને વિશ્વ શાંતિદૂત જૈન આચાર્ય લોકેશજીનું વિશ્વ શાંતિ કેન્દ્ર ખાતે જૈન સંતો, સામાજિક સંસ્થાઓ તથા મોટી સંખ્યામાં શ્રદ્ધાળુઓ દ્વારા ભવ્ય અને ઉષ્માભર્યું સ્વાગત કરવામાં આવ્યું હતું.

આ પ્રસંગે શ્રમણ સંઘીય ઉપપ્રવર્તક પંકજ મુનિજી મહારાજ, વરુણ મુનિજી મહારાજ અને રૂપેશ મુનિજી મહારાજે આચાર્ય લોકેશજીને શાલ, માળા તથા સાહિત્ય અર્પણ કરી તેમનું સન્માન કર્યું હતું. ઉપસ્થિત શ્રદ્ધાળુઓએ જયઘોષ સાથે તેમનું અભિવાદન કર્યું અને વિશ્વ શાંતિ માટે તેમના સતત પ્રયાસોની પ્રશંસા કરી.

આ પ્રસંગે વરુણ મુનિજી મહારાજે જણાવ્યું હતું કે, આજે જ્યારે સમગ્ર વિશ્વ યુદ્ધ, હિંસા, આતંકવાદ અને વૈચારિક સંઘર્ષોથી ઝઝૂમી રહ્યું છે, ત્યારે આચાર્ય લોકેશજીનું ‘We Support Peace’ અભિયાન સમગ્ર માનવજાત માટે આશાની નવી કિરણ બનીને ઊભર્યું છે. અમેરિકાની સંસદ સુધી અહિંસા, સંવાદ અને વિશ્વબંધુત્વનો સંદેશ પહોંચાડી તેમણે ભારતીય આધ્યાત્મિક સંસ્કૃતિ તથા ભગવાન મહાવીરના સિદ્ધાંતોનું ગૌરવ વિશ્વભરમાં વધાર્યું છે. આ અભિયાન માત્ર ભારત પૂરતું મર્યાદિત નથી, પરંતુ સમગ્ર માનવજાતના ઉજ્જવળ ભવિષ્ય માટેનું વૈશ્વિક અભિયાન છે.

‘We Support Peace’ અભિયાનના પ્રણેતા આચાર્ય લોકેશજીએ જણાવ્યું હતું કે, વિશ્વ શાંતિ કેન્દ્રથી શરૂ થયેલું આ અભિયાન આજે વૈશ્વિક જનઆંદોલનનું સ્વરૂપ ધારણ કરી ચૂક્યું છે. અમેરિકામાં રિપબ્લિકન અને ડેમોક્રેટ – બંને પક્ષોના સાંસદો દ્વારા મળેલું સમર્થન એ દર્શાવે છે કે શાંતિ કોઈ રાજકીય વિચારધારાનો વિષય નથી, પરંતુ સમગ્ર માનવજાતની આવશ્યકતા છે. આચાર્ય લોકેશજીએ જણાવ્યું હતું કે, “આ સન્માન મારું નથી, પરંતુ ભગવાન મહાવીરના દર્શન અને ભારતીય સંસ્કૃતિનું છે.”