- ઉત્તર ગુજરાત અને સૌરાષ્ટ્રમાં વધુ અસર થશે
- વેસ્ટર્ન ડિસ્ટર્બન્સ 1 માર્ચેે સક્રિય થતા કમોસમી વરસાદ
- દરિયા કાંઠાના વિસ્તારમાં કમોસમી વરસાદ રહેશે
રાજ્યમાં આગામી 1 થી 3 માર્ચ દરમિયાન છૂટાછવાયા વરસાદની આગાહી કરવામાં આવી છે. હવામાન વિભાગે જણાવ્યું કે, ઉત્તર ભારતમાં વેસ્ટર્ન ડિસ્ટર્બન્સ અપ્રોચ કરી રહ્યું છે જેના કારણે ઉત્તર ગુજરાત અને સૌરાષ્ટ્રના કેટલાક ભાગોમાં વરસાધી ઝાપટા પડી શકે છે. આ સાથે જ અરબી સમુદ્રમાં ઊંચાં મોજાં ઊછળશે. આ કારણે ગુજરાતના ખેડૂતોની ચિંતામાં વધારો થઈ રહ્યો છે. જેના સાથે જ માછીમારોને દરિયો ન ખેડવા સૂચના આપવામાં આવી છે.
1 માર્ચના રાજ્યના આ વિસ્તારોમાં પડશે વરસાદ
આ અંગે હવામાન વિભાગે જણાવ્યું કે, રાજ્યના કેટલાંક ભાગોમાં આગામી 1 થી 3 માર્ચમાં છૂટાછવાયા વરસાદની આગાહી કરવામાં આવી છે. 1 માર્ચ રોજ ઉત્તર ગુજરાત, સૌરાષ્ટ્રના કેટલાક વિસ્તારમાં હળવા વરસાદની શક્યતા છે. જેમાં ઉત્તર ગુજરાતમાં સાબરકાંઠા, બનાસકાંઠા, અરવલ્લી, દાહોદ, મહીસાગર, પાટણ સહિત સૌરાષ્ટ્રના કચ્છ, દેવભૂમિ દ્વારકા, અને ગીર સોમનાથમાં હળવા વરસાદની શક્યતા છે.
દક્ષિણ ગુજરાતમાં વરસાદની આગાહી
જ્યારે 2 માર્ચના રોજ અગાઉ દક્ષિણ ગુજરાતમાં પણ વરસાદની આગાહી કરવામાં આવી હતી. પરંતુ આજે હવામાન વિભાગે દક્ષિણ ગુજરાતના કોઈપણ જિલ્લામાં વરસાદની આગાહી કરી નથી. પરંતુ ઉત્તર ગુજરાતના બનાસકાંઠા, સાબરકાંઠા અને પાટણ સહિત સૌરાષ્ટ્ર-કચ્છ જિલ્લામાં છૂટાછવાયા વરસાદની આગાહી કરી છે.
દરિયામાં મોજા ઉછળવાની શક્યતાઓ
હાલમાં દરિયાકાંઠાના વિસ્તારમાં પવનની ગતિ ઉત્તરપૂર્વ દિશા તરફથી છે. જ્યારે પવનની ઝડપ 25-35 કિલોમીટર પ્રતિ કલાકની રહેશે. આ ઉપરાંત રાજ્યના બાકીના વિસ્તારમાં પણ પવનની દિશા ઉત્તર-પૂર્વીય રહેશે અને પવનની ઝડપ 5-10 કિલોમીટર પ્રતિ કલાકની રહેશે. જેના સાથે જ અરબી સમુદ્રમાં તોફાની મોજાં ઉછળવાની શક્યતાઓને પગલે માછીમારોને દરિયો ન ખેડવા સૂચના આપવામાં આવી છે.
રાજ્યભરમાં લઘુત્તમ તાપમાનમાં વધારો થવાથી શિયાળાએ વિદાય લીધી હોય તેવી સ્થિતિ સર્જાઈ છે. જેની સાથે જ ફરી એકવાર માવઠાએ દસ્તક દીધી છે. તેમજ અરબી સમુદ્રમાં ઊંચાં મોજાં ઊછળશે. આ માવઠાની આગાહીને લઈ જીરું સહિતના પાકો હજુ તૈયાર થયા ન હોવાથી ખેડૂતોના જીવ અદ્ધર થયા છે.
