મોટાદડવામાં ડિગ્રી વિના જ દોઢ વર્ષથી દવાખાનું ચલાવતો બોગસ તબીબ ઝડપાયો

મોટાદડવામાં ડિગ્રી વિના જ દોઢ વર્ષથી દવાખાનું ચલાવતો બોગસ તબીબ ઝડપાયો

માત્ર SYBA સુધી ભણેલો શખ્સ ફઈ સાથે કમ્પાઉન્ડરીના ‘અનુભવ’ પર બની બેઠો ડોક્ટર: એલોપેથિક દવાઓનો જથ્થો જપ્ત

અગ્ર ગુજરાત, રાજકોટ

આટકોટના મોટા દડવા ગામે ડિગ્રી વગર મકાનમાં દવાખાનું ચલાવી લોકોના આરોગ્ય સાથે ચેડા કરનાર બોગસ તબીબને રૂરલ એસઓજીની ટીમે ઝડપી લીધો હતો. પોલીસે એલોપેથિક દવાઓ, ઇન્જેક્શન અને રોકડ સહિત રૂ. 8,000 નો મુદ્દામાલ કબજે કર્યો હતો.

પોલીસે ડિગ્રી વગરના આ ડોક્ટર સામે મેડિકલ પ્રેક્ટિસનર એકટની કલમ હેઠળ ગુનો નોંધી કાયદેસરની કાર્યવાહી કરી હતી. ઝડપાયેલા શખસે એસ.વાય બી.એ. સુધીનો અભ્યાસ કર્યો છે તેના તબીબ ફઈ સાથે કમ્પાઉન્ડરી કરતો હતો.

બાદમાં છેલ્લા દોઢ વર્ષથી પોતાનું ક્લિનિક શરૂ કરી દીધું હતું.દરોડાની વિગત મુજબ, રાજકોટ એસપી વિજયસિંહ ગુર્જર દ્વારા જિલ્લામાં ડિગ્રી વિના એલોપેથિક પ્રેક્ટિસ કરતા બોગસ ડોક્ટરોને પકડી પાડવા તથા ડિગ્રી વગરના બોગસ ડોક્ટર સંબંધિત ગેરકાયદે પ્રવૃત્તિ સદંતર નાબૂદ કરવા અને અસરકારક કામગીરી કરવા માટે આપેલ સૂચનાથી રૂરલ એસઓજી પીઆઇ એફ.એ.પારગીની રાહબરીમાં ટીમ તપાસમાં હતી.

તે દરમિયાન એવી માહિતી મળી હતી કે, આટકોટ પોલીસ સ્ટેશન હેઠળના વિસ્તારમાં આવેલા મોટા દડવા ગામમાં ધર્મેશ ઉર્ફે લાલો નામનો શખસ પોતાના મકાનમાં દવાખાનું ચલાવે છે અને આ શખસ પાસે કોઈ પણ પ્રકારની ડિગ્રી નથી.

બાતમીના આધારે પોલીસ ટીમે મોટા દડવા ગામે તપાસ કરતા એક શખસ મકાનમાં ક્લિનિક ચલાવતો હોવાનો માલુમ પડ્યું હતું. પોલીસે તેની પૂછતાછ કરતા તેમણે પોતાનું નામ ધર્મેશ ઉર્ફે લાલો વિમલ ગોપીયાણી (રહે મોટા દડવા) હોવાનું જણાવ્યું હતું. તે અહીં એલોપેથીક દવાઓ, ઇન્જેક્શન સ્ટીરોઈડ તથા એન્ટીબાયોટિક દવાઓ રાખી એલોપેથિક ડોક્ટર તરીકે પ્રેક્ટિસ કરતો હતો.

જેથી તેની પાસેથી મેડિકલ પ્રેક્ટિસ અંગેની જરૂરી ડિગ્રી માંગતા તેની પાસે આવી કોઈ ડીગ્રી ન હોવાનું માલુમ પડ્યું હતું. પોલીસે અહીંથી એલોપેથીક દવાઓ ઇન્જેક્શન અને રોકડ રકમ સહિત રૂ. 8,073 નો મુદ્દામાલ કબજે કરી આ શખસ વિરુદ્ધ મેડિકલ પ્રેક્ટિસનર એક્ટની કલમ 30 મુજબ ગુનો નોંધી જરૂરી કાર્યવાહી કરી હતી.

પોલીસે વધુમાં જણાવ્યું હતું કે, ડિગ્રી વગર પ્રેક્ટિસ કરતા ઝડપાયેલ ધર્મેશ ઉર્ફે લાલાએ એસ.વાય. બી.એ. સુધીનો અભ્યાસ કર્યો છે તેના ફઈ બીએચએમએસ ડોક્ટર હોય અગાઉ તે તેમના ક્લિનિકમાં કમ્પાઉન્ડરી કરતો હતો. જેથી તેને તબીબી લાઈનનો અનુભવ મળ્યા બાદ છેલ્લા બે વર્ષથી અહીં મોટા દડવા ગામે ખુદનું ક્લિનિક શરૂ કરી લોકોના આરોગ્ય સાથે ચેડા કરતો હતો.

બોગસ તબીબને ઝડપી લેવાની આ કામગીરીમાં એસઓજી પીએસઆઇ જે.જી. ઝાલા, પી.બી. મિશ્રા, હેડ કોન્સ્ટેબલ વિજયભાઈ વેગડ, ક્રિપાલસિંહ જાડેજા, ચંદુભાઈ પલાળીયા, કોન્સ્ટેબલ રામદેવસિંહ ઝાલા અને વિજયગીરી સાથે રહ્યા હતા.