જેતપુર, મોરબીથી રાજકોટ આવેલા 5 બાળકોના અને સુરેન્દ્રનગરના એક બાળકના મોતથી દોડધામ
માખી દ્વારા પ્રસરતો જીવલેણ ચાંદીપુરા રોગચાળો સૌરાષ્ટ્રમાં તેનો પગપેસારો કરી રહ્યો છે. રાજકોટમાં પાંચ બાળકોના શંકાસ્પદ મોત બાદ જેતપુરના એક બાળકનું પણ મોત થયાના અહેવાલ છે. આરોગ્ય તંત્રએ તકેદારીના તમામ પગલા લેવાના શરૂ કરી દીધા છે. રાજકોટની સરકારી હોસ્પિટલમાં વિશેષ વોર્ડ અને તમામ આરોગ્ય કેન્દ્ર ખાતે ચાંદીપુરા રોગના શંકાસ્પદ દર્દીઓને રાજકોટ ખસેડવાની વ્યવસ્થા કરવામાં આવી છે.
પ્રાપ્ત માહિતી અનુસાર જેતપુર, મોરબી, પડધરી પંથકમાંથી દાખલ થયેલા પાંચ બાળકના મોત નીપજ્યા છે. જિલ્લા આરોગ્ય તંત્ર અનુસાર આ પૈકી એક બાળક કે જેનું મોત નીપજ્યું છે તે આવા કેસ નોંધાયા છે તે અરવલ્લી પંથકમાંથી આવેલ શ્રમજીવીનું બાળક હતું અને પડધરી પંથકમાં તે થોડા દિવસથી રહેતા હતા. મૃત્યુ પામનાર બાળકો ૬ માસથી ૧૩ વર્ષની ઉંમરના છે. એક બાળક હોસ્પિટલમાં દાખલ થઈને જાતે જ છૂટા થઈ ગયા હતા પરંતુ, સંબંધીઓનો સંપર્ક સાધતા આ બાળકનું મોત નીપજ્યાનું ખુલયું હતું. આ બાળકોને તાવ,આંચકી સહિતના વિવિધ લક્ષણો હતા અને પ્રાથમિક રીતે વાયરલ મેનેનજાઈટીસ (મગજનો તાવ)નું નિદાન ડોક્ટરો દ્વારા કરાયાનું જાણવા મળે છે. હવે તેના લોહી વગેરેના નમુના લઈને ચાંદીપુરા વાયરસ છે કે કેમ તે કન્ફર્મ કરવા સેમ્પલ પૂના લેબોરેટરી ખાતે મોકલાયાનું જિલ્લા આરોગ્ય અધિકારી ડો.પી.કે.સિંઘે જણાવ્યું હતું.
સુરેન્દ્રનગરથી અહેવાલ મૂજબ પાટડીના ખારાઘોડા ગામે રહેતી પાંચ વર્ષની બાળકીને શંકાસ્પદ ચાંદીપુરા વાયરસના લક્ષણો જણાતા તેને અમદાવાદ સિવિલ હોસ્પિટલમાં સારવાર માટે ખસેડાયેલ હતી જ્યાં તેનું મોત નીપજ્યું છે. તેના સેમ્પલ પણ પૂના મોકલાયા છે. જામનગરથી અહેવાલ મૂજબ ધ્રોલ અને જામજોધપુર બે બાળકો ચાંદીપુરા વાયરસથી સંક્રમિત થયાનુ જણાતા તેમને હોસ્પિટલમાં ખસેડવામાં આવ્યા છે. જો કે આ બન્ને કેસો હજુ કન્ફર્મ થયા નથી પણ સંક્રમીત કેસ ગણીને સારવાર અપાઈ રહી છે.
ચાંદીપુરા વાયરસનો ચેપ લાગ્યો હોય તેમાં બાળકને (1) સખત તાવ આવવો (2) ઝાડા (3) ઉલ્ટી થવી (4) આંચકી કે ખેંચ આવવી અને (5) બેભાન કે અર્ધબેભાન જેવી સ્થિતિ થવી તે મુખ્ય લક્ષણો હોય છે. તબીબી સૂત્રો અનુસાર આ લક્ષણો મગજના તાવને મળતા આવતા હોય છે. જો કે ચાંદીપુરા વાયરસનું ટેસ્ટીંગ ગુજરાતમાં થતું ન હોય છેક પૂના મોકલવું પડે છે અને દિવસો બાદ તેના રિપોર્ટ આવે છે.
ગુજરાતમાં ૧૪ જિલ્લામાં કુલ 33 કેસ, ૧૬ મૃત્યુ
ગુજરાતમાં ચાંદીપુરાના વધતા કેસથી ચિંતાજનક સ્થિતિ સર્જાઇ છે. ગુરૂવાર સુધીમાં રાજયમાં ચાંદીપુરા વાયરસના વધુ ચાર કેસ મળી આવ્યા છે. જયારે ૧ મૃત્યુ થયું છે. આ સાથે જ ગુજરાત રાજયના 3૦ સહિત કુલ 33 શંકાસ્પદ કેસો ચાંદીપુરાના મળી આવ્યા છે. જેમાં કુલ ૧૬ મૃત્યુ નોંધાયા છે. સેમ્પલને ચાંદીપુરા વાયરસની પુષ્ટિ માટે પૂણે મોકલવામાં આવ્યા હતા. જેમાંથી ૭ સેમ્પલના પરિણામ આવ્યા છે. જેમાં ૬ સેમ્પલ ચાંદીપુરા વાયરસ માટે નેગેટીવ અને ફકત એક જ સેમ્પલ પોઝીટીવ નોંધાયો છે.
