ઘાંચીવાડમાં સામું જોવા જેવી બાબતમાં ઘાતક હથિયારો વડે હુમલો ; પથ્થર, સોડા બોટલના ઘા થયા
જિલ્લા ગાર્ડન ચોકમાં બનેલી હિંસક ઘટનામાં મહિલાઓ સહિત 6 ઘાયલ, 9 હુમલાખોરો સામે ગુનો નોંધાયો
અગ્ર ગુજરાત, રાજકોટ
રાજકોટ શહેરના નવી ઘાંચીવાડ વિસ્તારમાં મોડી રાત્રે નાની લાગતી બાબતમાંથી ઉગ્ર હિંસક અથડામણ સર્જાઈ હતી. માત્ર સામું જોવાની બાબતે શરૂ થયેલી બોલાચાલી થોડી જ વારમાં ઘાતક સ્વરૂપ ધારણ કરી ગઈ હતી, જેમાં આરોપીઓએ કોયતા, લાકડાના ધોકા, પથ્થરો અને સોડાની બોટલો વડે હુમલો કરતા એક જ પરિવારના મહિલાઓ સહિત કુલ છ લોકો ઇજાગ્રસ્ત બન્યા હતા. આ બનાવથી વિસ્તારમાં ભય અને તણાવનો માહોલ ફેલાયો હતો.
મળતી માહિતી મુજબ, નવી ઘાંચીવાડ શેરી નં. 1/2 પાસે રહેતા અવેશભાઈ નસરૂદીનભાઈ ઘોણીયા રોજની જેમ પોતાના કામ પરથી પરત આવી રાત્રે ભોજન લીધા બાદ જીલ્લા ગાર્ડન ચોક નજીક આવેલ એક હોટલ પાસે ગયા હતા. ત્યાં તેઓ પોતાના સગા સાથે ઉભા હતા ત્યારે આરોપી હુસૈન ઉર્ફે ભાણો સંધી કોઈ સાથે ઉંચી અવાજે બોલાચાલી કરી રહ્યો હતો. આ દરમિયાન અવેશભાઈએ તેની તરફ નજર કરતાં આરોપી ઉશ્કેરાઈ ગયો હતો અને “તું મારી સામે કેમ જુએ છે?” કહીને ગાળો બોલવાનું શરૂ કર્યું હતું. પરિસ્થિતિ એટલી બગડી ગઈ કે આરોપીએ પોતાના પાસે રહેલું હથિયાર બતાવી ધમકી આપી હતી. એટલું જ નહીં, નજીકના ચાના કીટલા પાસેથી કડછો લઈને અવેશભાઈ પર હુમલો કરવાનો પણ પ્રયાસ કર્યો હતો. આથી ભયભીત બનેલા અવેશભાઈ તાત્કાલિક ત્યાંથી પોતાના ઘરે પરત ફરી ગયા હતા.
પરંતુ વાત અહીં અટકી નહોતી. થોડા જ સમય બાદ આરોપી હુસૈન પોતાના સાથીદારોને બોલાવી અવેશભાઈના ઘર પાસે આવી પહોંચ્યો હતો. ત્યાં તેણે ફરી ગાળો બોલી હંગામો શરૂ કર્યો હતો. અવેશભાઈના પિતા નસરૂદીનભાઈએ મામલો શાંત કરવાનો પ્રયાસ કર્યો હતો, પરંતુ આરોપીઓએ વાત સાંભળવાની જગ્યાએ ઝઘડો વધુ ઉગ્ર બનાવ્યો હતો. આ દરમ્યાન માહીર મેમણ અને સુફી સહિત અન્ય આરોપીઓ પણ સ્થળ પર આવી ગયા હતા અને અવેશભાઈ તથા તેમના પિતાને મારવા લાગ્યા હતા. થોડી જ વારમાં વધુ આરોપીઓ લાકડાના ધોકા, કોયતા જેવા ઘાતક હથિયારો અને સોડાની બોટલો સાથે આવી પહોંચ્યા હતા. ત્યારબાદ આરોપીઓએ એકજૂથ થઈને પરિવાર પર તાબડતોબ હુમલો કર્યો હતો.
હુમલાખોરોએ માત્ર વ્યક્તિઓને જ નિશાન બનાવ્યા નહોતા, પરંતુ ઘરમાં પથ્થરમારો કરી તોડફોડ પણ કરી હતી. પરિવારના સભ્યો બચાવવા વચ્ચે પડતા તેઓ પણ હુમલાનો ભોગ બન્યા હતા. ખાસ કરીને અવેશભાઈના કાકાના દીકરા અમનને કોયતા જેવા હથિયારથી માથામાં ઇજા પહોંચતા લોહીલુહાણ હાલતમાં ઢળી પડ્યો હતો. મહિલાઓ—સુમેરાબેન અને નઝમાબેન—પણ વચ્ચે પડતા તેઓને પણ મારમારવામાં આવ્યો હતો. ઘટના દરમિયાન વિસ્તારના લોકો ભયભીત બની ગયા હતા. હુલ્લડ અને ગાળાગાળી વચ્ચે તણાવપૂર્ણ માહોલ સર્જાયો હતો. હુમલાખોરોએ અવેશભાઈની એકટીવામાં પણ તોડફોડ કરી હોવાનું સામે આવ્યું છે.
આ દરમિયાન પોલીસને જાણ થતાં જ પેટ્રોલિંગમાં રહેલી ટીમ સ્થળ પર દોડી આવી હતી. પોલીસ પહોંચતા જ આરોપીઓ ભાગી છૂટ્યા હતા, પરંતુ જતા જતા તેમણે ફરીયાદ કરશો તો જાનથી મારી નાખવાની ધમકી પણ આપી હતી. ઈજાગ્રસ્તોને તાત્કાલિક 108 એમ્બ્યુલન્સ મારફતે સિવિલ હોસ્પિટલ ખસેડવામાં આવ્યા હતા, જ્યાં તેઓને સારવાર આપવામાં આવી રહી છે. સદભાગ્યે, તમામ ઘાયલોની હાલત હાલ સ્થિર હોવાનું જાણવા મળે છે.
આ બનાવ અંગે એ-ડિવિઝન પોલીસે ફરિયાદના આધારે હુસૈન ઉર્ફે ભાણો સંધી, માહીર મેમણ, સુફી, અરબાઝ ઉર્ફે અબો, નોઈનખાન, સેફુ સંધી, સલમાન ઉર્ફે ભોદીયો, આદીલ સીપાઇ અને દેવા કાથડ સહિત કુલ નવ આરોપીઓ સામે ગંભીર ગુનાઓ હેઠળ કેસ નોંધ્યો છે. પોલીસ દ્વારા આરોપીઓને ઝડપી પાડવા માટે તપાસનો દોર તેજ કરવામાં આવ્યો છે. આ ઘટનાએ ફરી એકવાર શહેરમાં કાયદો-વ્યવસ્થા અંગે સવાલો ઊભા કર્યા છે. સામાન્ય બાબતમાંથી આટલી ગંભીર હિંસા સર્જાતા સ્થાનિકોમાં ભય અને અસુરક્ષાની લાગણી વ્યાપી ગઈ છે. પોલીસ દ્વારા વિસ્તારમાં વધુ મામલો ન બીચકે તે માટે બંદોબસ્ત ગોઠવી દેવાયો હતો.
