ઈન્સ્ટાગ્રામથી પ્રેમજાળમાં ફસાવી 15 વર્ષીય સગીરા પર પરિણીત શખ્સે આચર્યું દુષ્કર્મ
સંબંધ તોડતા પરિવારને મારી નાખવાની આપી ધમકી ; પ્ર.નગર પોલીસે પોક્સો હેઠળ ગુનો નોંધી ગોંડલના શખ્સને દબોચ્યો
અગ્ર ગુજરાત, રાજકોટ
રાજકોટ શહેરમાં સોશિયલ મીડિયાના માધ્યમથી સગીરાઓને નિશાન બનાવવાનો વધુ એક ગંભીર કિસ્સો સામે આવ્યો છે. ઈન્સ્ટાગ્રામ પર ઓળખાણ કેળવી 15 વર્ષની સગીરાને પ્રેમ અને લગ્નના વચનો આપી વિશ્વાસમાં લીધા બાદ તેની સાથે બળજબરીપૂર્વક દુષ્કર્મ આચરવામાં આવ્યું હોવાનો આરોપ સામે આવ્યો છે. ફરિયાદ નોંધાતાં પ્ર.નગર પોલીસે ઝડપી કાર્યવાહી કરીને ગોંડલના આરોપી ધવલ દિલીપ રાવરાણીને પકડી પાડી કાયદેસરની કાર્યવાહી હાથ ધરી છે.
પોલીસમાં નોંધાયેલી ફરિયાદ મુજબ આરોપીએ સોશિયલ મીડિયા મારફતે સગીરા સાથે સંપર્ક વધાર્યો હતો. ધીમે-ધીમે મિત્રતા ગાઢ બનાવી લગ્ન કરવાની ખાતરી આપી તેને વિશ્વાસમાં લીધી હતી. ત્યારબાદ જાન્યુઆરી મહિનામાં રાજકોટની એક ટાઉનશીપમાં આવેલી સગીરાના નિવાસસ્થાને પહોંચી તેની મરજી વિરુદ્ધ શારીરિક અડપલાં કરી દુષ્કર્મ આચર્યું હોવાનું ફરિયાદમાં જણાવાયું છે.
ઘટના બાદ સગીરાએ આરોપીથી દૂર રહેવાનો અને સંબંધ સમાપ્ત કરવાનો પ્રયાસ કર્યો હતો. જોકે આરોપીએ તેને ધમકી આપી હતી કે જો તે સંપર્ક નહીં રાખે તો તેના પરિવારના સભ્યોને જાનથી મારી નાખશે. આ ધમકીઓના કારણે સગીરા લાંબા સમય સુધી ભય અને માનસિક તણાવ હેઠળ રહી હતી.
અંતે સમગ્ર ઘટના પરિવારના ધ્યાન પર આવતાં તેઓએ પ્ર.નગર પોલીસ સ્ટેશનમાં ફરિયાદ નોંધાવી હતી. ફરિયાદના આધારે પોલીસે પોક્સો એક્ટ સહિતની ગંભીર કલમો હેઠળ ગુનો દાખલ કરી તપાસ શરૂ કરી હતી.
ગુનાની ગંભીરતાને ધ્યાનમાં રાખી પીઆઈ એમ.ડી. મકવાણાના માર્ગદર્શન હેઠળ પોલીસે તાત્કાલિક કાર્યવાહી કરી આરોપી ધવલ રાવરાણીને ઝડપી લીધો હતો. પ્રાથમિક તપાસમાં આરોપી પરિણીત હોવાનું તેમજ ડ્રાઇવિંગનું કામ કરતો હોવાનું પણ બહાર આવ્યું છે. હાલ પોલીસે આરોપીની પૂછપરછ શરૂ કરી છે અને કેસની વધુ તપાસ હાથ ધરી છે.
