ગેસની આગમાં વેપાર-ધંધા દાઝ્યા!

ગેસની આગમાં વેપાર-ધંધા દાઝ્યા!

19 કિલોના કોમર્શિયલ સિલિન્ડરમાં રૂ.42 નો વધારો કરાતા ભાવ 3113.50 પર પહોંચ્યો, છેલ્લા પાંચ માસમાં રૂ.1422નો વધારાનો ડામ લાગી ગયો

છોટુ ગેસ સિલિન્ડરમાં પણ રૂ. 11 નો વધારો કરાતા ભાવ 821.50 પહોચતા ગરીબ અને પ્રવાસી મજૂરોની ચિંતા વધી

અગ્ર ગુજરાત, નવી દિલ્હી

ઈરાન-અમેરિકા વચ્ચે ચાલી રહેલા તણાવ અને વૈશ્વિક બજારમાં ક્રૂડ ઓઈલ તથા ગેસના વધતા ભાવોની સીધી અસર હવે દેશના ગ્રાહકો અને વેપાર-ધંધા પર જોવા મળી રહી છે. ઓઈલ માર્કેટિંગ કંપનીઓએ દર મહિનાની સમીક્ષા અંતર્ગત 1 જૂનથી ફરી એકવાર 19 કિલોના કોમર્શિયલ ગેસ સિલિન્ડર અને 5 કિલોના ‘છોટુ’ ગેસ સિલિન્ડરના ભાવમાં વધારો જાહેર કર્યો છે. પરિણામે હોટેલ, રેસ્ટોરાં, ધાબા અને નાના ફૂડ સ્ટોલ સંચાલકો પર વધુ આર્થિક બોજો આવ્યો છે, જ્યારે ઓછી આવક ધરાવતા પરિવારો અને પ્રવાસી મજૂરો માટે પણ ગેસનો ખર્ચ વધ્યો છે.
નવી કિંમતો અનુસાર દિલ્હીમાં 19 કિલોના કોમર્શિયલ ગેસ સિલિન્ડરમાં રૂ.42નો વધારો થતાં તેનો ભાવ રૂ.3113.50 થયો છે. બીજી તરફ કોલકાતામાં પરિવહન ખર્ચના કારણે રૂ.53.50નો વધારો લાગુ પડતાં ભાવ રૂ.3255.50 સુધી પહોંચી ગયા છે. સતત વધી રહેલા ભાવોને કારણે ખાણી-પીણીના વ્યવસાય સાથે જોડાયેલા વેપારીઓમાં ચિંતા વધી છે, કારણ કે વધેલા ખર્ચની અસર હવે ખાદ્ય પદાર્થોના ભાવ પર પણ જોવા મળી શકે છે. ખાસ નોંધનીય બાબત એ છે કે વર્ષના આરંભમાં જાન્યુઆરી મહિનામાં 19 કિલોનો કોમર્શિયલ સિલિન્ડર રૂ.1691માં મળતો હતો, જે હવે વધીને રૂ.3113.50 થયો છે. એટલે કે માત્ર પાંચ મહિનામાં જ રૂ.1422.50નો જંગી વધારો નોંધાયો છે. ફેબ્રુઆરીથી શરૂ થયેલી ભાવવધારાની શ્રેણી મે મહિનામાં સૌથી વધુ તેજ બની હતી, જ્યારે એક જ ઝાટકે રૂ.993નો વધારો લાગુ કરાયો હતો.
સરકારે ગરીબ અને પ્રવાસી મજૂરો માટે ઉપયોગી ગણાતા 5 કિલોના ‘છોટુ’ ગેસ સિલિન્ડરના ભાવમાં પણ રૂ.11નો વધારો કર્યો છે. દિલ્હીમાં આ સિલિન્ડર હવે રૂ.821.50માં મળશે, જ્યારે અગાઉ તેનો ભાવ રૂ.810.50 હતો. આ વધારો ખાસ કરીને એવા લોકો માટે મુશ્કેલી ઉભી કરી રહ્યો છે, જેઓ પાસે કાયમી ગેસ કનેક્શન નથી અને નાના સિલિન્ડર પર નિર્ભર રહે છે.
જોકે ઘરેલુ વપરાશ માટેના 14.2 કિલોના એલપીજી સિલિન્ડરના ભાવ હાલમાં યથાવત રાખવામાં આવ્યા છે, તેમ છતાં પેટ્રોલ, ડીઝલ અને સીએનજીના વધેલા ભાવોને કારણે પરિવહન ખર્ચ વધી રહ્યો છે. પરિણામે સામાન્ય જીવન જરૂરી ચીજવસ્તુઓ અને સેવાઓના ભાવ પર પણ તેની અસર થવાની સંભાવના વ્યક્ત થઈ રહી છે. વૈશ્વિક બજારમાં પણ ક્રૂડ ઓઈલમાં ફરી તેજી જોવા મળી છે. અમેરિકા અને ઈરાન વચ્ચે સંભવિત સમાધાન અંગે અનિશ્ચિતતા ઉભી થતાં ડબલ્યુટીઆઈ ક્રૂડ બે ટકાથી વધુ વધીને 89.77 ડોલર અને બ્રેન્ટ ક્રૂડ 93.24 ડોલર પ્રતિ બેરલ સુધી પહોંચ્યું હતું. નિષ્ણાતોનું માનવું છે કે જો આંતરરાષ્ટ્રીય સ્તરે તણાવ યથાવત રહેશે તો આગામી સમયમાં પેટ્રોલિયમ પેદાશોના ભાવમાં વધુ વધારો થવાની શક્યતા નકારી શકાય નહીં.

પાંચ મહિનામાં રૂ.1422નો જંગી વધારો

જાન્યુઆરી 2026 ભાવ : રૂ.1691
જૂન 2026 ભાવ : રૂ.3113.50
કુલ વધારો : રૂ.1422.50
વધારો લગભગ 84 ટકા જેટલો

નવા કોમર્શિયલ સિલિન્ડર ભાવ

દિલ્હી
જૂનો ભાવ : રૂ.3071.50
નવો ભાવ : રૂ.3113.50
વધારો : રૂ.42
કોલકાતા
નવો ભાવ : રૂ.3255.50
વધારો : રૂ.53.50

‘છોટુ’ સિલિન્ડર પણ મોંઘું

5 કિલો ગેસ સિલિન્ડર
જૂનો ભાવ : રૂ.810.50
નવો ભાવ : 821.50
વધારો : રૂ.11
પ્રવાસી મજૂરો અને ગરીબ પરિવારો પર સીધી અસર

હોટેલ-રેસ્ટોરાંના ખર્ચમાં વધારો

* કોમર્શિયલ ગેસનો સીધો ઉપયોગ
* ધાબા, રેસ્ટોરાં અને ફૂડ સ્ટોલ પર વધારાનો બોજ
* ખાદ્ય પદાર્થોના ભાવ વધવાની શક્યતા
* ગ્રાહકોને મોંઘું ભોજન મળી શકે

ક્રૂડ ઓઈલમાં ફરી તેજી

* WTI ક્રૂડ : 89.77 ડોલર પ્રતિ બેરલ
* બ્રેન્ટ ક્રૂડ : 93.24 ડોલર પ્રતિ બેરલ
* બે ટકાથી વધુ ઉછાળો
* અમેરિકા-ઈરાન તણાવ મુખ્ય કારણ

ઘરેલુ ગેસ યથાવત, છતાં મોંઘવારીનો ખતરો

* 14.2 કિલો ઘરેલુ એલપીજીમાં કોઈ વધારો નહીં
* ગુજરાતમાં પાઈપલાઈન ગેસના ભાવ સ્થિર
* પેટ્રોલ-ડીઝલ અને સીએનજી અગાઉથી મોંઘા
* પરિવહન ખર્ચ વધતાં તમામ ક્ષેત્રે મોંઘવારીનું દબાણ વધ્યું