M.Pharmમાં પ્રવેશનો પ્રથમ રાઉન્ડ જાહેર: ૧૮૧૭ છાત્રોને સીટની ફાળવણી
આ વર્ષ સરકારી કોલેજોમાં ૧૦ ટકા સીટ ભરાઇ : 3 થી ૬ ઓગષ્ટમાં યોજાશે બીજો રાઉન્ડ
અગ્ર ગુજરાત, રાજકોટ
ગુજરાત રાજ્યમાં શૈક્ષણિક વર્ષ ૨૦૨૬-૨૭ માટે માસ્ટર ઓફ ફાર્મસી (M.Pharm) અભ્યાસક્રમમાં પ્રવેશ માટેની પ્રક્રિયા પુરજોશમાં ચાલી રહી છે. ટેકનિકલ શિક્ષણ વિભાગ હેઠળ કાર્યરત એડમિશન કમિટી ફોર પ્રોફેશનલ કોર્સીસ (ACPC) દ્વારા પ્રથમ રાઉન્ડની બેઠક ફાળવણી (Seat Allotment) અધિકૃત રીતે જાહેર કરવામાં આવી છે. રાજ્યની તમામ સરકારી, અનુદાનિત (Grant-in-aid) અને સ્વનિર્ભર (Self-financed) સંસ્થાઓની કુલ 3396 બેઠકોમાંથી ACPC હસ્તકની 2086 બેઠકો સામે પ્રથમ રાઉન્ડમાં કુલ 1817 વિદ્યાર્થીઓને પ્રવેશ ઓફર કરવામાં આવ્યો છે.
પ્રવેશ પ્રક્રિયા અંતર્ગત GPAT લાયકાત ધરાવતા 348 વિદ્યાર્થીઓ અને GPAT વગરના 2801 વિદ્યાર્થીઓ મળીને કુલ 3149 વિદ્યાર્થીઓએ રજીસ્ટ્રેશન કરાવ્યું હતું. GPAT વગરના ઉમેદવારો માટે GTU દ્વારા સંચાલિત PGCET-2026 પરીક્ષા ગત 27 અને 28 જૂન દરમિયાન લેવામાં આવી હતી. પ્રવેશ સમિતિ દ્વારા GPAT અને PGCET એમ બંને લાયકાત પરીક્ષાના આધારે કુલ 2849 વિદ્યાર્થીઓનો સંયુક્ત મેરિટ ક્રમાંક તૈયાર કરવામાં આવ્યો હતો. જેમાં નિયમાનુસાર GPAT લાયકાત ધરાવતા ઉમેદવારોને પ્રથમ પ્રાથમિકતા આપવામાં આવી છે. મોક રાઉન્ડ બાદ વિદ્યાર્થીઓએ કરેલી ઓનલાઈન ચોઈસ ફિલિંગના આધારે આ ફાળવણી કરાઈ છે.
પ્રથમ રાઉન્ડના પરિણામમાં સરકારી સંસ્થાઓ પ્રત્યે વિદ્યાર્થીઓનું ભારે આકર્ષણ જોવા મળ્યું છે. રાજ્યની સરકારી કોલેજમાં ઉપલબ્ધ તમામ ૪૪ બેઠકો પ્રથમ રાઉન્ડમાં જ ભરાઈ ગઈ છે. 76 ખાનગી (Self-financed) કોલેજોમાં ઉપલબ્ધ 2042 બેઠકોમાંથી 1773 બેઠકો પર ફાળવણી કરવામાં આવી છે. કુલ 77 સંસ્થાઓની 2086 ACPC બેઠકોમાંથી 1817 બેઠકો ભરાઈ ચૂકી છે.
પ્રથમ રાઉન્ડમાં સીટ મેળવનાર તમામ વિદ્યાર્થીઓએ આગામી 1 ઓગસ્ટ સુધીમાં ઓનલાઈન ટોકન ટ્યુશન ફી ભરીને પોતાનો પ્રવેશ ફરજિયાત કન્ફર્મ કરાવવાનો રહેશે. જો નિર્ધારિત સમયમર્યાદામાં ફી નહીં ભરાય તો નિયમ મુજબ વિદ્યાર્થી તે બેઠક પરનો પોતાનો દાવો ગુમાવશે.
પ્રથમ રાઉન્ડ બાદ ખાલી પડેલી બેઠકો ભરવા માટે ACPC દ્વારા બીજા રાઉન્ડનો કાર્યક્રમ પણ જાહેર કરાયો છે. જે વિદ્યાર્થીઓ પ્રથમ રાઉન્ડમાં મળેલી સીટથી વધુ પસંદગીની કોલેજ મેળવવા માગતા હોય અથવા નવી ખાલી પડેલી બેઠકો માટે દાવો કરવા માગતા હોય, તેઓ 3 ઓગસ્ટથી 6 ઓગસ્ટ દરમિયાન ઓનલાઈન સંમતિ (Consent) આપીને ફરીથી ચોઈસ ફિલિંગ કરી શકશે.
