- ક્વિક રિસ્પોન્સ ટ્રેનિંગ ઉપરાંત એસએસજી સાથે પણ સૈનિકો તાલીમ લઇ રહ્યા છે
- જમ્મુ-કાશ્મીર વિધાનસભા ચૂંટણી પહેલાં પાકિસ્તાની અને ભારતીય સેના હાઇ એલર્ટ પર
- તાલીમ કાર્યક્રમમાં પાક. સેનાના એસએસજી દળોના જવાનો પણ સામેલ
જમ્મુ-કાશ્મીરમાં વિધાનસભાની ચૂંટણીની જાહેરાત થવા સાથે ભારતીય સુરક્ષા એજન્સીઓ એલર્ટ મોડમાં છે. કોઇ પણ સંભવિત ખતરાનો સામનો કરવા તૈયારી કરી રહ્યા છે. પાકિસ્તાને પણ અંકુશ રેખા અને આંતરરાષ્ટ્રીય સરહદે (આઇબી) રેડ એલર્ટ જારી કરી દીધું છે.
ગુપ્તચર એજન્સીઓની બાતમી મુજબ પાકિસ્તાનની સેનાએ તાજેતરમાં ક્વિક રિસ્પોન્સ સંબંધી મોટી તાલીમ લીધી હતી. તાલીમ કાર્યક્રમમાં પાક. સેનાના એસએસજી દળોના જવાનો પણ સામેલ થયા હતા. ક્વિક રિસ્પોન્સ ટીમ કવાયત એટલે કોઇપણ હુમલાના સંજોગોમાં ઝડપથી કાઉન્ટર કરવાની સજ્જતા. આતંકવાદીઓના ગઢ મનાતા મુઝફ્ફરાબાદ ખાતે ક્વિક રિસ્પોન્સ તાલીમી કવાયત યોજવામાં આવી હતી. 1લી જુલાઇથી 20 જુલાઇ સુધી તાલીમ ચાલતી રહી હતી. એલઓસી પાસે તૈનાત સૈન્યના તમામ દળોએ તે કવાયતમાં ભાગ લીધો હતો. સ્પેશિયલ સર્વિસ ગ્રૂપ અર્થાત આતંકવાદીઓને તાલીમ આપતા ગ્રૂપ્સ. એલઓસી નજીક આ જ મુઝફ્ફરાબાદ વિસ્તારમાં ભારતમાં ઘૂસણખોરી કરીને આતંકવાદી ઘટનાઓને અંજામ આપતી આતંકવાદી છાવણીઓ આવેલી છે.
સર્જિકલ સ્ટ્રાઇકની ભીતિ ?
પાકિસ્તાનની બીએટી એક્શન ટીમમાં આતંકવાદીઓ સાથે એસએસજી કમાન્ડો પણ હોય છે. સૂત્રોના જણાવ્યા મુજબ પાકિસ્તાનને ભારત તરફથી ફરી કોઇ સર્જિકલ સ્ટ્રાઇક કે પછી એવી કોઇક કાર્યવાહી થવાની ભીતિ સતાવી રહી છે. જમ્મુમાં પ્રવાસીથી ભરેલી બસ પર થયેલા હુમલા અને તે પછી થયેલા આતંકવાદી હુમલા પછી પાકિસ્તાને પોતાની સેનાને એલઓસી અને આઇબી પર એલર્ટ કરી દીધી છે.
કયા વિસ્તારોમાં પાક. સેનાની તૈનાતી
ગુપ્તચર એકમોએ આપેલી બાતમી મુજબ પાકિસ્તાની સેનાએ પીઓકેની સુરક્ષાની જવાબદારી સંભાળી રહેલા યુનિટ 10-કોરમાં સૈનિકોની સંખ્યા વધારી દીધી છે. બહાવલપુર સ્થિત પાકિસ્તાની સેનાનું 31-કોર યુનિટને પણ સાબદૂ રાખવામાં આવ્યું છે. બહાવલપુર ખાતે આતંકવદી સંગઠન જૈશનું મુખ્યાલય છે. પાકિસ્તાની સેનાએ ગયા મહિને પોતાની આર્ટિલરી રેજિમેન્ટની નવેસરથી તૈનાતી પણ કરી છે. કોઇ પણ પ્રકારના હુમલાના સંજોગોમાં આવી તૈનાતી રિસ્પોન્સ ટાઇમને ઘટાડવામાં મદદ કરે છે.
