પાકિસ્તાનના તાલિબાન શાસન સાથેના સંબંધો બગડી રહ્યા છે. પાકિસ્તાને તાલિબાન પર આતંકવાદી જૂથોને આશ્રય આપવાનો આરોપ મૂક્યો હતો. જ્યારે અફઘાનિસ્તાને તેનો ઇનકાર કર્યો હતો. સરહદ પર અથડામણો વધી રહી છે. આ દરમિયાન, પાકિસ્તાને પોતાના રાજદૂતને અફઘાનિસ્તાન મોકલ્યા છે. પાકિસ્તાનના ખાસ દૂત મોહમ્મદ સાદિક અફઘાનિસ્તાન પહોંચ્યા છે. અને દયા માટે આજીજી કરી છે.
તાલિબાન પાકિસ્તાન માટે માથાના દુખાવા સમાન
જ્યારે તાલિબાને અફઘાનિસ્તાનમાં સત્તા સંભાળી ત્યારે પાકિસ્તાન સૌથી વધુ ખુશ હતું. પરંતુ હવે સાડા ત્રણ વર્ષ પછી, તાલિબાન પાકિસ્તાન માટે માથાના દુખાવાથી ઓછું નથી. પાકિસ્તાનનું કહેવું છે કે તાલિબાને તેના દુશ્મનોને દેશમાં આશ્રય આપ્યો છે. તાલિબાન સાથેના સંબંધો સુધારવા માટે, પાકિસ્તાને પોતાના રાજદૂતને અફઘાનિસ્તાન મોકલ્યા. પાકિસ્તાનના અફઘાનિસ્તાનના ખાસ દૂત મુહમ્મદ સાદિક ખાન અફઘાનિસ્તાનની ત્રણ દિવસની મુલાકાતે પહોંચ્યા. તેમણે કહ્યું કે પ્રાદેશિક સ્થિરતા માટે અફઘાનિસ્તાનમાં શાંતિ અને પ્રગતિ જરૂરી છે. તેમનું આ નિવેદન એવા સમયે આવ્યું છે જ્યારે બંને દેશો વચ્ચે દરરોજ સરહદી વિવાદ, રાજકીય સંબંધોમાં તણાવ અને અથડામણ જોવા મળે છે. જ્યારે સાદિક ખાન અફઘાનિસ્તાનમાં હતા, ત્યારે પાકિસ્તાની સેનાએ અફઘાન સરહદ પર 16 આતંકવાદીઓને ઠાર મારવાનો દાવો કર્યો હતો. પાકિસ્તાને તાલિબાનના નેતૃત્વ હેઠળની વચગાળાની સરકાર પર આતંકવાદી જૂથોને આશ્રય આપવા અને સરહદી હુમલાઓ કરવાનો આરોપ મૂક્યો છે. અફઘાનિસ્તાને આ આરોપોને નકારી કાઢ્યા છે. બલુચિસ્તાનમાં એક પેસેન્જર ટ્રેનને નિશાન બનાવવામાં આવી ત્યારે તણાવ વધુ વધ્યો, જેની જવાબદારી અલગતાવાદી જૂથ બલોચ લિબરેશન આર્મી (BLA) એ લીધી. પાકિસ્તાની અધિકારીઓએ જણાવ્યું હતું કે જ્યારે BLA લડવૈયાઓ હુમલો કરી રહ્યા હતા, ત્યારે તેમના હેન્ડલર્સ અફઘાનિસ્તાનમાં બેઠા હતા અને તેઓ સેટેલાઇટ ફોન દ્વારા સીધા સંપર્કમાં હતા. બે દિવસ સુધી ચાલેલા આ હુમલામાં સેંકડો બંધકો સામેલ હતા.
અફઘાનિસ્તાનને મહત્વપૂર્ણ ભાગીદાર ગણાવ્યો
પાકિસ્તાનના પ્રજાસત્તાક દિવસ નિમિત્તે, કાબુલમાં પાકિસ્તાની દૂતાવાસે કહ્યું, ‘પ્રાદેશિક સ્થિરતા માટે અફઘાનિસ્તાનમાં શાંતિ અને પ્રગતિ જરૂરી છે.’ પાકિસ્તાન અને અફઘાનિસ્તાને પ્રાદેશિક આર્થિક વિકાસને પ્રોત્સાહન આપવા માટે તેમના પ્રયાસોને એક સાથે કરવા જોઈએ. પાકિસ્તાની રાજદૂતે અફઘાનિસ્તાનને તેમના દેશનો સૌથી મહત્વપૂર્ણ પ્રાદેશિક ભાગીદાર ગણાવ્યો છે. પાકિસ્તાનના રાજદૂત સાદિક ખાન અફઘાનિસ્તાનમાં હતા ત્યારે બંને પક્ષો વચ્ચે અથડામણ જોવા મળી હતી. પાકિસ્તાની સેનાએ રવિવારે એક નિવેદનમાં જણાવ્યું હતું કે તેણે 22-23 માર્ચની રાત્રે ઉત્તર વઝીરિસ્તાન જિલ્લામાં ઘૂસણખોરીનો પ્રયાસ કરી રહેલા 16 આતંકવાદીઓને ઠાર માર્યા હતા. પાકિસ્તાન આર્મીની મીડિયા વિંગ ઇન્ટર-સર્વિસિસ પબ્લિક રિલેશન્સ (ISPR) એ જણાવ્યું હતું કે, ‘પાકિસ્તાન સતત અફઘાન સરકારને તેની સરહદ મજબૂત કરવા વિનંતી કરી રહ્યું છે.’ વચગાળાની અફઘાન સરકાર તેની જવાબદારીઓ પૂર્ણ કરે તેવી અપેક્ષા છે. નવેમ્બર 2023 માં પાકિસ્તાન અને અફઘાનિસ્તાન વચ્ચેના સંબંધો વધુ બગડ્યા, જ્યારે પાકિસ્તાને મોટાભાગના અફઘાન નાગરિકોને દેશમાંથી હાંકી કાઢ્યા.
