રાજકોટ શૈક્ષિક મહાસંઘનું મિશન શિક્ષક હિત: ‘CTS એન્ટ્રી’ અને ‘પ્રિશા સોફ્ટવેર’ની સમસ્યાઓ ઉકેલવા રજૂઆત
ટેકનિકલ ખામીઓના કારણે શિક્ષકોના પગાર અટક્યા અને વિદ્યાર્થીઓના પ્રવેશમાં મુશ્કેલી; DDO અને પ્રાંત કક્ષાએ ત્વરિત નિરાકરણની માંગ
અગ્ર ગુજરાત, રાજકોટ
અખિલ ભારતીય રાષ્ટ્રીય શૈક્ષિક મહાસંઘ, જિલ્લા રાજકોટ દ્વારા શિક્ષક, શિક્ષણ અને વિદ્યાર્થીઓના હિતોના રક્ષણ માટે રચનાત્મક અભિગમ સાથે સત્તાધિકારીઓ સમક્ષ બે મહત્ત્વના પ્રશ્નો અંગે લેખિત રજૂઆતો કરવામાં આવી છે.
પ્રથમ પ્રશ્નમાં, અન્ય રાજ્યમાંથી લિવિંગ સર્ટિફિકેટ (LC) મેળવીને ગુજરાતની શાળાઓમાં પ્રવેશ લેતા વિદ્યાર્થીઓની Child Tracking System (CTS) માં એન્ટ્રી ન થવાની ગંભીર સમસ્યા ઉપસ્થિત થઈ છે. આ ક્ષતિના કારણે વિદ્યાર્થીઓના શૈક્ષણિક અધિકારો, શાળાની વહીવટી પ્રક્રિયાઓ અને ઓવર સેટઅપની સ્થિતિ અંગે પ્રશ્નો ઊભા થઈ રહ્યા છે. આ અંગે સંસ્થા દ્વારા ગુજરાત પ્રાંત સમક્ષ તાત્કાલિક તકનીકી અને વહીવટી ઉકેલ લાવવા માગ કરવામાં આવી છે.
બીજી તરફ, ‘પ્રિશા’ (PRISHA) સોફ્ટવેરમાં વારંવાર સર્જાતી તકનીકી ખામીઓને કારણે જિલ્લાના શિક્ષકોના પગાર સમયસર થતા નથી. ગ્રાન્ટ ઉપલબ્ધ હોવા છતાં આચાર્યો અને શિક્ષકોને બિનજરૂરી માનસિક અને વહીવટી બોજ સહન કરવો પડે છે. આ મામલે રાજકોટ જિલ્લા વિકાસ અધિકારી (DDO) ને લેખિત રજૂઆત કરી સોફ્ટવેરની ક્ષતિઓ ત્વરિત નિવારવા વિનંતી કરાઈ છે.
મહાસંઘના પ્રતિનિધિઓ હેતલબેન ઉપાધ્યાય, કવિતાબેન પાઠક અને પ્રીતિબેન દાણીધારિયાએ જણાવ્યું હતું કે, “શિક્ષકને બિનજરૂરી વહીવટી અને ટેકનિકલ અડચણોથી મુક્ત રાખવામાં આવશે તો જ તેઓ સંપૂર્ણ સમર્પણ સાથે વિદ્યાર્થીઓના સર્વાંગી વિકાસ માટે કાર્ય કરી શકશે.” તંત્ર દ્વારા આ પ્રશ્નોની ગંભીરતા સમજીને ત્વરિત હકારાત્મક પગલાં લેવામાં આવશે તેવી આશા વ્યક્ત કરવામાં આવી છે.
