રાજકોટ પ્રોપર્ટી કન્સલ્ટન્ટ એસોસિએશનનો 11માં વર્ષમાં મંગલ પ્રવેશ
“બ્રોકર નહીં, પ્રોપર્ટી કન્સલ્ટન્ટ”ના સંદેશ સાથે સ્નેહમિલન કાર્યક્રમ યોજાયો
અગ્ર ગુજરાત, રાજકોટ
રાજકોટ પ્રોપર્ટી કન્સલ્ટન્ટ એસોસિએશન (RPCA) દ્વારા તા. 1 મે 2026ના રોજ સેમિનાર અને સ્નેહ મિલન કાર્યક્રમનું આયોજન કરવામાં આવ્યું હતું. એસોસિએશનના 11માં વર્ષમાં મંગલ પ્રવેશ નિમિતે યોજાયેલા આ કાર્યક્રમમાં રાજકોટ તેમજ જામનગરના પ્રોપર્ટી કન્સલ્ટન્ટ મિત્રો બહોળી સંખ્યામાં ઉપસ્થિત રહ્યા હતા.
કાર્યક્રમની શરૂઆત એસોસિએશનના સેક્રેટરી કેતન મહેતાએ ઉપસ્થિત તમામ સભ્યોનું સ્વાગત અને અભિવાદન કરીને કરી હતી. ત્યારબાદ રાષ્ટ્રગાન સાથે કાર્યક્રમનો પ્રારંભ કરવામાં આવ્યો હતો અને એસોસિએશનની પ્રતિજ્ઞા લેવડાવી પરિવારભાવના વ્યક્ત કરવામાં આવી હતી. ઉપપ્રમુખ પ્રકાશભાઈ શાહે પ્રાસંગિક ઉદબોધન કરતાં એસોસિએશનની વર્ષ 2016થી 2026 સુધીની સફળ યાત્રા, વિકાસકાર્ય અને નવી કમિટીની રચના અંગે સભ્યોને માહિતગાર કર્યા હતા.
આ પ્રસંગે વર્ષ 2026-27 માટેની નવી કમિટીની જાહેરાત કરવામાં આવી હતી. જેમાં પ્રમુખ તરીકે વિજયભાઈ જાની, ઉપપ્રમુખ તરીકે પ્રકાશભાઈ શાહ, સેક્રેટરી તરીકે કેતન મહેતા, ટ્રેઝરર તરીકે નીરજ ખંભાતી અને જોઈન્ટ સેક્રેટરી તરીકે માધવ માલવિયાની નિમણૂક કરવામાં આવી હતી. જ્યારે કમિટી મેમ્બર્સ તરીકે અર્પિત શાહ, જસ્મીન શેઠ, મુંજાલ ચૌહાણ, શૈલેષ શાહ, અતુલ સુરાણી અને ચેતન વિઠલાણીના નામ જાહેર કરવામાં આવ્યા હતા.
એસોસિએશનના 11મા વર્ષમાં મંગલ પ્રવેશ નિમિતે હાજર તમામ સભ્યોને મીઠું મોઢું કરાવવામાં આવ્યું હતું. સાથે જ સિનિયર મેમ્બર્સ અને કમિટી મેમ્બર્સ દ્વારા દરેક સભ્યોને મોમેન્ટો આપી સન્માનિત કરવામાં આવ્યા હતા.
પ્રમુખ વિજય જાની એ નવા વર્ષ માટેનું આયોજન, એસોસિએશનના વિસ્તરણ અને સંગઠનને વધુ મજબૂત બનાવવા માટેના સૂચનો રજૂ કર્યા હતા તેમજ ઉપસ્થિત તમામ સભ્યોનો આભાર વ્યક્ત કર્યો હતો.
અંતમાં સેક્રેટરી કેતન મહેતાએ જણાવ્યું હતું કે, રાજકોટ પ્રોપર્ટી કન્સલ્ટન્ટ એસોસિએશનના સભ્યો માત્ર બ્રોકર નહીં પરંતુ પ્રોપર્ટી કન્સલ્ટન્ટ છે. સમય સાથે અપડેટ થઈ આગળ વધતા રહી ટ્રસ્ટ બિલ્ડ કરવાનો અમારો ઉદ્દેશ છે. આવનારા સમયમાં એસોસિએશન નવી ઊંચાઈઓ સર કરશે તેમાં કોઈ શંકા નથી.
RPCA નવી કમિટી – 2026-27
પ્રમુખ – વિજય જાની
ઉપપ્રમુખ – પ્રકાશભાઈ શાહ
સેક્રેટરી – કેતન મહેતા
ટ્રેઝરર – નીરજ ખંભાતી
જોઈન્ટ સેક્રેટરી – માધવ માલવિયા
કમિટી મેમ્બર્સ – અર્પિત શાહ, જસ્મીન શેઠ, મુંજાલ ચૌહાણ, શૈલેષ શાહ, અતુલ સુરાણી અને ચેતન વિઠલાણી
