સાધુ વાસવાણી ગર્લ્સ સ્કૂલ GCERT આયોજિત “બાલ વૈજ્ઞાનિક પ્રદર્શન 2025-26’માં રાજય પ્રથમ
પ્લાસ્ટિક પ્રદૂષણના નિવારણનો ઉત્કૃષ્ટ પ્રોજેક્ટ રજૂ કરી રાજ્ય કક્ષાએ ઝળહળતી સાધુ વાસવાણી સ્કૂલ : નેશનલ લેવલે કરશે ગુજરાતનું પ્રતિનિધિત્વ
અગ્ર ગુજરાત, રાજકોટ
શિક્ષણ ક્ષેત્રે હંમેશા અગ્રેસર રહેતા રાજકોટ શહેર માટે એક અત્યંત ગૌરવપૂર્ણ ઘટના બની છે. રાજકોટ સ્થિત પ્રતિષ્ઠિત સાધુ વાસવાણી સ્કૂલ ફોર ગર્લ્સે પોતાની શ્રેષ્ઠતાનું ઉત્તમ ઉદાહરણ પૂરું પાડતા રાજ્ય કક્ષાએ ઐતિહાસિક સિદ્ધિ હાંસલ કરી છે. GCERT (ગુજરાત શૈક્ષણિક સંશોધન અને તાલીમ પરિષદ), ગાંધીનગર દ્વારા તાજેતરમાં આયોજિત ગુજરાત રાજ્ય વિજ્ઞાન, ગણિત અને પર્યાવરણ પ્રદર્શન “બાલ વૈજ્ઞાનિક પ્રદર્શન 2025-26” માં શાળાની તેજસ્વી વિદ્યાર્થીનીઓએ સમગ્ર રાજ્યમાં પ્રથમ ક્રમાંક પ્રાપ્ત કરી રાજકોટનું નામ રોશન કર્યું છે.
શાળાના વિજ્ઞાન શિક્ષક નિપુલ ચોટલીયાના સચોટ માર્ગદર્શન હેઠળ શાળાની તેજસ્વી વિદ્યાર્થીનીઓ જાનવી ડાંગર અને કાટેલિયા નાઝમીને આ પ્રદર્શનમાં ભાગ લીધો હતો. વર્તમાન સમયમાં વૈશ્વિક સ્તરે પર્યાવરણ માટે સૌથી મોટી સમસ્યા બની ચૂકેલા પ્લાસ્ટિક પ્રદૂષણને કેન્દ્રમાં રાખીને, આ વિદ્યાર્થીનીઓએ “Waste Management and Alternatives to Plastics” (કચરાનું વ્યવસ્થાપન અને પ્લાસ્ટિકના વિકલ્પો) વિષય અંતર્ગત પોતાનો ઇનોવેટિવ પ્રોજેક્ટ “Renew Plastic” રજૂ કર્યો હતો.
આ પ્રોજેક્ટમાં જાનવી ડાંગર અને કાટેલિયા નાઝમીને પર્યાવરણની સુરક્ષા, પ્લાસ્ટિક કચરાનું યોગ્ય રિસાયક્લિંગ અને રોજિંદા જીવનમાં વાપરી શકાય તેવા પ્લાસ્ટિકના સચોટ અને ટકાઉ વિકલ્પો અંગેના અદભુત, પ્રયોગાત્મક અને નવીન વિચારો રજૂ કર્યા હતા.
વિદ્યાર્થીનીઓની વિષય પરની ઉંડી વૈજ્ઞાનિક સમજ, સમસ્યાના સમાધાન માટેનો પ્રેક્ટિકલ અભિગમ, સર્જનાત્મકતા અને અત્યંત આત્મવિશ્વાસભર્યા પ્રેઝન્ટેશનથી નિર્ણાયકો અને ઉપસ્થિત વિજ્ઞાન નિષ્ણાતો અત્યંત પ્રભાવિત થયા હતા અને આ પ્રોજેક્ટને રાજ્ય કક્ષાએ સર્વશ્રેષ્ઠ જાહેર કર્યો હતો.
આ અદ્વિતીય સિદ્ધિથી સાધુ વાસવાણી સ્કૂલ ફોર ગર્લ્સનું નામ સમગ્ર ગુજરાતમાં ઉજ્જવળ બન્યું છે અને શાળા સંકુલમાં ઉત્સવનો માહોલ છવાયો છે. શાળા હંમેશા માત્ર પુસ્તકિયા જ્ઞાન પૂરતી સીમિત ન રહેતા, ગુણવત્તાસભર શિક્ષણ સાથે વિદ્યાર્થીઓમાં સંશોધનવૃત્તિ, વૈજ્ઞાનિક અભિગમ અને પર્યાવરણ પ્રત્યેની સામાજિક જવાબદારીના મૂલ્યો વિકસાવવા માટે પ્રતિબદ્ધ રહી છે અને આ પરિણામ તેનું ઉત્તમ ઉદાહરણ છે.
