કચ્છના નાના રણમાં રેતીના તોફાનમાં ફસાયેલા ૨૦થી વધારે મુસાફરોનું રેસ્કયું
વાવાઝોડાના કારણે રસ્તો ભૂલી ગયા હતા, આડેસર પોલીસ દ્વારા ૧૨ કલાક ચાલેલુ મેગા સર્ચન ઓપરેશન
અગ્ર ગુજરાત, કચ્છ
કચ્છના નાના રણમાંથી એક અત્યંત રોમાંચક અને રાહત આપનારા સમાચાર સામે આવ્યા છે. રણ વિસ્તારમાં અચાનક બદલાયેલા વાતાવરણ અને રેતીના ભયાનક વાવાઝોડાના કારણે રસ્તો ભૂલી ગયેલા 20થી વધુ લોકોના જીવ આડેસર પોલીસની તત્પરતાને કારણે બચી ગયા છે. પોલીસે કાળઝાળ ગરમી અને પ્રતિકૂળ પરિસ્થિતિ વચ્ચે સતત 12 કલાક સુધી મેગા સર્ચ ઓપરેશન ચલાવીને તમામ લોકોને સહીસલામત બહાર કાઢ્યા છે.
20થી વધુ મુસાફરોનો એક સંઘ અથવા જૂથ કોઈ કારણોસર કચ્છના નાના રણમાંથી પસાર થઈ રહ્યું હતું. આ દરમિયાન અચાનક વાતાવરણ પલટાયું હતું અને રણમાં તીવ્ર ગતિએ પવન ફૂંકાવા લાગ્યો હતો. જોતજોતામાં વાવાઝોડા જેવી સ્થિતિ સર્જાતા રણમાં ચારેય તરફ રેતીની મસમોટી ડમરીઓ ઊડવા લાગી હતી. આ ભયાનક રેતીના તોફાનમાં વિઝિબિલિટી (દ્રશ્યતા) શૂન્ય થઈ જતાં મુસાફરો દિશા ભ્રમિત થઈ ગયા હતા અને રણની વચ્ચે જ ફસાઈ ગયા હતા.
રણમાં અટવાયેલા લોકોએ આપત્તિના સમયે આડેસર પોલીસનો સંપર્ક સાધ્યો હતો. ઘટનાની ગંભીરતા અને રણની ભૌગોલિક પરિસ્થિતિને જોતાં આડેસર પોલીસ સ્ટેશનની ટીમ તાત્કાલિક એક્શનમાં આવી ગઈ હતી. પોલીસે તુરંત જ રણ વિસ્તારમાં સર્ચ ઓપરેશન શરૂ કર્યું હતું. સ્થાનિક નેટવર્કની મદદથી પોલીસે સતત 12 કલાક સુધી ભારે જહેમત ઉઠાવી હતી. આખરે પોલીસ ટીમ ફસાયેલા તમામ 20થી વધુ લોકોને શોધી કાઢવામાં સફળ રહી હતી.
