ઓડીસાથી સૌરાષ્ટ્ર સુધીનું ડ્રગ્સ કનેક્શન ખુલ્યું
શીવરાજપુર પાસે ટ્રકમાં છુપાવેલો 108 કિલો ગાંજો ઝડપી લેતું રૂરલ એસઓજી
ત્રણ આરોપીને ઝડપી લઇ કુલ 84 લાખથી વધુનો મુદામાલ જપ્ત કરાયો ; ગાંજો કાલાવડમાં સપ્લાય થવાનો હતો, વધુ સપ્લાયર અને કનેક્શન અંગે તપાસ તેજ
અગ્ર ગુજરાત, રાજકોટ
રાજકોટ ગ્રામ્ય વિસ્તારમાં ડ્રગ્સના જાળાને તોડવા માટે ચાલી રહેલી પોલીસની ઝુંબેશ વચ્ચે રૂરલ એસઓજીએ જસદણ નજીક મોટી સફળતા મેળવી છે. શીવરાજપુર ગામના પાટીયા પાસે આવેલી જય વિહળનાથ હોટલ નજીક ઉભેલા એક માલવાહક ટ્રકમાંથી 108 કિલોથી વધુ ગાંજાનો જથ્થો ઝડપાતા ડ્રગ્સ સપ્લાયના આંતરરાજ્ય નેટવર્કનો પર્દાફાશ થયો છે. પોલીસે ત્રણ શખ્સોને ઝડપી પાડીને ગાંજો, ટ્રક અને મોબાઇલ સહિત કુલ રૂ.84.31 લાખનો મુદ્દામાલ જપ્ત કર્યો છે. રાજકોટ ગ્રામ્ય પોલીસના કાર્યકાળ દરમિયાન આ સૌથી મોટી એનડીપીએસ કાર્યવાહી માનવામાં આવી રહી છે.
રાજકોટ રેન્જ આઈજી નિર્લિપ્ત રાય અને ગ્રામ્ય એસપી વિજયસિંહ ગુર્જરના માર્ગદર્શન હેઠળ “SAY NO TO DRUGS” અભિયાન અંતર્ગત ગ્રામ્ય વિસ્તારમાં ગેરકાયદેસર માદક પદાર્થોની હેરાફેરી રોકવા માટે સઘન કામગીરી ચાલી રહી છે. તે દરમિયાન રૂરલ એસઓજી પીઆઈ એફ.એ. પારગીની રાહબરીમાં પીએસઆઈ જી.જે. ઝાલા, પી.બી. મિશ્રા અને તેમની ટીમ પેટ્રોલિંગમાં હતી. ત્યારે બાતમી મળી હતી કે જસદણથી ઘેલા સોમનાથ તરફ જતા માર્ગ પર શીવરાજપુર પાટીયા પાસે ઉભેલા ટ્રકમાં ગાંજાનો મોટો જથ્થો છુપાવવામાં આવ્યો છે.
ચોક્કસ માહિતી મળતાં જ એસઓજીની ટીમ સ્થળ પર પહોંચી હતી. જય વિહળનાથ હોટલ નજીક ઉભેલા જીજે-06-AT-9438 નંબરના ટ્રક પાસે ત્રણ શખ્સો હાજર હતા. પોલીસને જોતા તેઓ ગભરાઈ જતા ટીમે તાત્કાલિક પૂછપરછ શરૂ કરી હતી. પોતાની ઓળખ રાજુ ઇશ્વર ચૌહાણ, નરેશ ઉર્ફે હરી ઇશ્વર લીંબડીયા અને કાદરશા ઉર્ફે કાદરબાપુ કાસમશા શેખ તરીકે આપનાર આ ત્રણેય શખ્સોની હિલચાલ શંકાસ્પદ લાગતાં પોલીસે ટ્રકની સઘન તપાસ હાથ ધરી હતી.
ટ્રકની કેબિનમાં ડ્રાઈવર સીટ પાછળ પ્લાસ્ટિકના બાચકાઓમાં સંતાડેલો ગાંજાનો જથ્થો મળી આવતા પોલીસ પણ ચોંકી ઉઠી હતી. સ્થળ પર જ વજન કરાતા કુલ 108 કિલો 331 ગ્રામ ગાંજો હોવાનું સામે આવ્યું હતું. આ જથ્થાની કિંમત અંદાજે રૂ.54.16 લાખ ગણવામાં આવી છે. પોલીસે ત્રણ મોબાઈલ ફોન અને ટ્રક સાથે કુલ રૂ.84.31 લાખનો મુદ્દામાલ કબ્જે લીધો હતો.
પ્રાથમિક પૂછપરછ દરમિયાન આરોપીઓએ મહત્વપૂર્ણ ખુલાસા કર્યા હતા. તેઓ ટ્રક લઈને ઓડીસા સુધી ગયા હોવાનું અને ત્યાં અલેખા બીસનું બહેરા નામના શખ્સે ગાંજાનો જથ્થો ટ્રકમાં ભરાવ્યો હોવાનું સામે આવ્યું છે. આ જથ્થો સૌરાષ્ટ્રમાં લાવી કાલાવડના મહમદરફીક અસરફભાઈ લોદી અને અબ્દુલલતીફ ઓસમાણભાઈ સમાને પહોંચાડવાનો હતો. આરોપીઓની કબૂલાત બાદ હવે પોલીસ ઓડીસાથી ગુજરાત સુધી ફેલાયેલા સમગ્ર ડ્રગ્સ નેટવર્કની કડીઓ શોધવામાં લાગી ગઈ છે.
રાજકોટ ગ્રામ્ય પોલીસના સૂત્રોના જણાવ્યા મુજબ છેલ્લા કેટલાક સમયથી ગ્રામ્ય વિસ્તારોમાં ગાંજાની હેરાફેરીના ઇનપુટ મળી રહ્યા હતા. ખાસ કરીને માલવાહક વાહનો મારફતે ડ્રગ્સની સપ્લાય થતી હોવાની માહિતી આધારે વિવિધ માર્ગો પર સઘન વોચ ગોઠવવામાં આવી રહી હતી. આ જ વોચ દરમિયાન એસઓજીને આ મોટી સફળતા હાથ લાગી છે.
એસપી વિજયસિંહ ગુર્જરે જણાવ્યું હતું કે ગ્રામ્ય વિસ્તારમાં એનડીપીએસ હેઠળની ગેરકાયદેસર પ્રવૃત્તિઓ સામે ઝીરો ટોલરન્સની નીતિ અપનાવવામાં આવી છે. ડ્રગ્સના વેપારમાં સંડોવાયેલા કોઈપણ શખ્સને છોડવામાં નહીં આવે. તેમના જણાવ્યા મુજબ, તેમની કાર્યકાળ દરમિયાન આ સૌથી મોટો ગાંજાનો દરોડો છે. અગાઉ વિંછીયાના ભડલી ગામની સીમમાં ગાંજાની ખેતી પકડી રૂ.37 લાખથી વધુનો મુદ્દામાલ કબ્જે લેવાયો હતો, જ્યારે હવે 108 કિલો ગાંજાનો જથ્થો ઝડપાતા ગ્રામ્ય વિસ્તારમાં સક્રિય નશાના નેટવર્ક સામે પોલીસ વધુ સતર્ક બની છે.
આ સમગ્ર ઓપરેશનમાં એસઓજીની મોટી ટીમે સંયુક્ત કામગીરી બજાવી હતી. પીઆઈ એફ.એ. પારગીના માર્ગદર્શન હેઠળ પીએસઆઈ જી.જે. ઝાલા, પી.બી. મિશ્રા, એએસઆઈ પરબતભાઈ શામળા, ફિરોઝભાઈ બ્લોચ, વિપુલભાઈ ગુજરાતી, રૂપકબહાદુર બોહરા સહિત અનેક પોલીસકર્મીઓએ બાતમીના આધારે ચોક્કસ આયોજન કરી સફળ દરોડો પાર પાડ્યો હતો.
હાલ પોલીસે ત્રણેય આરોપીઓ સામે એનડીપીએસ એક્ટ હેઠળ ગુનો નોંધી વધુ પૂછપરછ શરૂ કરી છે. સાથે જ ઓડીસાથી સૌરાષ્ટ્ર સુધી ફેલાયેલા ડ્રગ્સ સપ્લાય ચેઈનમાં અન્ય કોણ કોણ સંડોવાયેલા છે તે દિશામાં તપાસ આગળ ધપાવવામાં આવી રહી છે.
