SMCની રેડના ઘેરા પડઘા: કુવાડવામાં લાખોના દારૂ પ્રકરણમાં PI વસાવા સસ્પેન્ડ
ડી – સ્ટાફ, બીટ જમાદાર સામે ખાતાકીય તપાસનો ધમધમાટ શરૂ : પકડાયેલ બુટલેગર પરેશ પટેલે વટાણા વેર્યા
અગ્ર ગુજરાત, રાજકોટ
રાજકોટ શહેરમાં સ્ટેટ મોનિટરિંગ સેલની ટીમે સ્થાનિક પોલીસની ઊંઘ ઉડાવી દે તેવો મોટો દારૂનો દરોડો પાડ્યો હતો. કુવાડવા જીઆઈડીસી વિસ્તારમાંથી એસએમસીની ટીમે બાતમીના આધારે લાખો રૂપિયાની કિંમતનો વિદેશી દારૂનો જથ્થો ઝડપી પાડ્યો છે.
આ દરોડામાં કુલ રૂ.70.38 લાખનો વિદેશી દારૂ પકડાયા બાદ રાજકોટ પોલીસ વિભાગમાં મોટો ભૂકંપ આવી ગયો છે. સ્થાનિક પોલીસની રહેમનજર હેઠળ આટલું મોટું નેટવર્ક ચાલતું હોવાની આશંકા વચ્ચે પોલીસ કમિશનરે કડક પગલાં લીધા છે. ફરજમાં કથિત બેદરકારી દાખવવા બદલ કુવાડવા પોલીસ સ્ટેશનના પીઆઈ વી.આર. વસાવાને તાત્કાલિક અસરથી સસ્પેન્ડ કરવામાં આવ્યા છે.
પોલીસના સૂત્રોમાંથી મળતી માહિતી મુજબ, આ સમગ્ર દારૂ નેટવર્ક પાછળ જંગલેશ્વર વિસ્તારના કુખ્યાત બુટલેગર ફિરોજ સંધીનું નામ સામે આવ્યું છે. ફિરોજ સંધી લાંબા સમયથી રાજકોટ અને આસપાસના વિસ્તારોમાં મોટા પાયે ગેરકાયદેસર વિદેશી દારૂ ઘુસાડવાનું નેટવર્ક ચલાવી રહ્યો હતો. કુવાડવા જીઆઈડીસીના ગોડાઉનનો ઉપયોગ દારૂના કટિંગ અને સંગ્રહ માટે કરવામાં આવતો હતો. સ્ટેટ મોનિટરિંગ સેલની ટીમે ઓપરેશન હાથ ધરીને વિદેશી દારૂની હજારો બોટલો ભરેલો જથ્થો તેમજ વાહનો સહિતનો રૂ.1 કરોડનો મુદ્દામાલ કબજે કર્યો હતો.
ગાંધીનગરની એસએમસી ટીમ જ્યારે રાજકોટ આવીને આટલો મોટો દારૂનો જથ્થો પકડી પાડે છે, ત્યારે કુવાડવા પોલીસ કેમ અંધારામાં હતી તે સૌથી મોટો પ્રશ્ન બની ગયો છે. સ્ટેટ મોનિટરિંગ સેલના આ દરોડા બાદ સ્થાનિક પોલીસની મિલિભગત અથવા તો સદંતર નિષ્ક્રિયતા છતી થઈ છે. બુટલેગરો સાથે સ્થાનિક સ્ટાફના કોઈ કર્મચારીઓ કે અધિકારીઓ સીધા સંપર્કમાં હતા કે કેમ તેની આશંકાઓ પણ મજબૂત બની છે. કમિશનરે આ મામલાને અત્યંત ગંભીરતાથી લઈને પીઆઈ વસાવા સામે સસ્પેન્શનનું હથિયાર ઉગામ્યું છે.
આ મોટા દારૂ કૌભાંડના મૂળ સુધી પહોંચવા માટે ઉચ્ચ અધિકારીઓના માર્ગદર્શન હેઠળ તપાસ તેજ કરી દેવામાં આવી છે. મુખ્ય સુત્રધાર જંગલેશ્વરના કુખ્યાત બુટલેગર ફિરોજ સંધી અને તેના સાગરીતોને પકડી પાડવા માટે અલગ-અલગ ટીમો બનાવીને દરોડા પાડવામાં આવી રહ્યા છે. ગોડાઉન કોના નામે હતું, દારૂ ક્યાંથી મંગાવવામાં આવ્યો હતો અને રાજકોટમાં કયા-કયા નાના બુટલેગરોને સપ્લાય થવાનો હતો તેની કડીઓ મેળવવામાં આવી રહી છે. આગામી દિવસોમાં સ્થાનિક પોલીસ સ્ટેશનના અન્ય કર્મચારીઓ સામે પણ ખાતાકીય તપાસના આધારે આકરા પગલાં લેવાય તેવી પૂરેપૂરી શક્યતા છે.
ઉલ્લેખનીય છે કે, એસએમસીની ટીમે સ્થળ પરથી પરેશ કુરજી પટેલ (રહે. સંતોષ નગર, નાના મહુવા સર્કલ પાસે, રાજકોટ) નામના એક આરોપીને ઝડપી પાડ્યો હતો. જે બાદ તેની પૂછતાછમાં મુખ્ય આરોપી તરીકે જંગલેશ્વર વિસ્તારમાં રહેતા કુખ્યાત બુટલેગર ફિરોજ હાસમ સંધી અને સુલતાન હાસમ સંધીના નામ ખુલ્યા હતાં. ફિરોજ સંધી બહારના રાજ્યમાંથી દારૂની વ્યવસ્થા કરી આપી પરેશ પટેલને મોકલાવતો હતો. અગાઉ બે વખત કુવાડવા રોડ પોલીસ મથક વિસ્તારમાં દારૂનું કટીંગ કરી નંખ્યાની પણ કબૂલાત આપી હતી.
