કુખ્યાત શામજી મકા ગેંગ પર કસાયો પોલીસનો ગુજસીટોકનો ગાળિયો
થોરાળાની ગેંગના 12 સામે કડક કાર્યવાહી, 8 આરોપી ઝડપાયા; ખૂનથી લઈ મિલકત કબજા સુધીના 37 ગુનાઓમાં સંડોવણી
અગ્ર ગુજરાત, રાજકોટ
રાજકોટ શહેરમાં કાયદો અને વ્યવસ્થા જાળવી રાખવા તેમજ સંગઠિત ગુનાખોરીને નાથવા માટે શહેર પોલીસ દ્વારા ગુજસીટોક હેઠળ ફરી એક વખત મોટી કાર્યવાહી હાથ ધરવામાં આવી છે. થોરાળા વિસ્તારમાં આતંક મચાવતી અને ખૂન, લૂંટ, ખંડણી તથા જમીન-મકાન પચાવી પાડવા જેવા ગંભીર ગુનાઓમાં સંડોવાયેલી ‘શામજી ઉર્ફે શામો મકા મકવાણા’ ગેંગ સામે પોલીસે કડક પગલાં લીધા છે. આ કાર્યવાહી હેઠળ ગેંગના કુલ 12 સભ્યો સામે ગુજસીટોક એક્ટ હેઠળ ગુનો નોંધાયો છે, જેમાંથી 8 આરોપીઓને ઝડપી લેવામાં આવ્યા છે જ્યારે મુખ્ય સૂત્રધાર સહિત 4 શખ્સો હજુ ફરાર છે.
આ સમગ્ર ઓપરેશન પોલીસ કમિશનર બ્રજેશકુમાર ઝા અને એડિશનલ સીપી ચૈતન્ય માંડલીકની સીધી દેખરેખ હેઠળ પાર પાડવામાં આવ્યું હતું. શહેરમાં છેલ્લા કેટલાક વર્ષોથી ગેંગ દ્વારા ફેલાવવામાં આવેલા ભયના માહોલને ધ્યાનમાં રાખીને આ કાર્યવાહી કરવામાં આવી હોવાનું જાણવા મળે છે.
પોલીસ તપાસ મુજબ, આ ગેંગ વર્ષ 2016થી 2024 દરમિયાન સતત સક્રિય રહી હતી અને ખાસ કરીને ગોકુલપરા તથા થોરાળા વિસ્તારમાં પોતાની દાદાગીરી જમાવી હતી. સામાન્ય નાગરિકોને ધમકી આપી, ગેરકાયદેસર રીતે મંડળી બનાવી અને હિંસક પ્રવૃત્તિઓ દ્વારા તેઓ પોતાનું વર્ચસ્વ સ્થાપિત કરતા હતા. જમીન-મકાન કબજે કરવા, પૈસા વસુલવા અને વિરોધ કરનારાઓ પર જીવલેણ હુમલા કરવા જેવી ઘટનાઓમાં આ ગેંગનું નામ સામે આવતું રહ્યું છે. આ ગેંગનો મુખ્ય સૂત્રધાર શામજી મકવાણા હોવાનું બહાર આવ્યું છે, જે પોતાના સાગરીતો સાથે મળીને સંગઠિત રીતે ગુનાઓ આચરતો હતો. ગેંગ સામે ખૂન, ખૂનની કોશિશ, ગંભીર ઈજા, લૂંટ, રાયોટિંગ અને સરકારી કર્મચારીની ફરજમાં અવરોધ જેવા ગંભીર પ્રકારના 22 સહિત કુલ 37 ગુનાઓ નોંધાયેલા છે. પોલીસના જણાવ્યા મુજબ, ગેંગના સભ્યો માટે ગુનાખોરી જ આજીવિકાનું મુખ્ય સાધન બની ગયું હતું.
આ ગેંગને ડામી દેવા માટે ડીસીપી ક્રાઈમ જગદીશ બાંગરવા અને એસીપી (ક્રાઈમ) ભરત બસિયાના માર્ગદર્શન હેઠળ ખાસ ટીમો બનાવવામાં આવી હતી. ક્રાઈમ બ્રાન્ચના પીઆઈ એમ.આર. ગોંડલીયા, એમ.એલ. ડામોર અને સી.એચ. જાદવની દેખરેખમાં પીએસઆઈ સી.જે. જાડેજા અને તેમની ટીમે આરોપીઓના લોકેશન મેળવીને સઘન દરોડા પાડ્યા હતા. ટેક્નિકલ સર્વેલન્સ અને ગુપ્ત માહિતીના આધારે આ ઓપરેશન સફળ બનાવવામાં આવ્યું હતું. આ કાર્યવાહી દરમિયાન પોલીસે દેવશી મકા મકવાણા, દિલીપ ઉર્ફે દિલો પ્રેમજી ચૌહાણ, ચિરાગ ઉર્ફે ભયલુ શામજી મકવાણા, કિરણ મોહન ખીમસૂરિયા, અજય રાજુ જાદવ, ગૌતમ ઉર્ફે ગોગો ધરમશી બારૈયા, નાગેશ ઉર્ફે લાલો શામજી મકવાણા અને મેહુલ કનુ સોલંકી સહિતના 8 આરોપીઓને ઝડપી પાડ્યા છે. જ્યારે મુખ્ય સૂત્રધાર શામજી મકવાણા સહિત ચાર આરોપીઓ હાલ પોલીસની પકડથી દૂર છે અને તેમની શોધખોળ માટે અલગ ટીમો કાર્યરત છે.
ડીસીપી ક્રાઈમ જગદીશ બાંગરવાએ જણાવ્યું હતું કે, માત્ર આરોપીઓની ધરપકડ પૂરતી નહીં રહે, પરંતુ ગેંગ દ્વારા ગુનાહિત પ્રવૃત્તિઓથી એકઠી કરેલી મિલકતો અને ગેરકાયદેસર રીતે વસાવેલા મકાનો સામે પણ કાયદેસરની કાર્યવાહી કરવામાં આવશે. આ માટે તંત્ર દ્વારા મિલકતોની વિગતો એકત્રિત કરવામાં આવી રહી છે અને ટૂંક સમયમાં કડક પગલાં લેવામાં આવશે.
પોલીસના આ અભિયાનથી શહેરના ગુનાહિત તત્વોમાં ફફડાટ ફેલાયો છે. ખાસ કરીને સંગઠિત ગુનાખોરીમાં સંકળાયેલા શખ્સો માટે આ કાર્યવાહી ચેતવણીરૂપ સાબિત થઈ છે.
ઉલ્લેખનીય છે કે શહેરને સુરક્ષિત બનાવવા માટે છેલ્લા છ મહિનામાં પોલીસ દ્વારા ગુજસીટોક હેઠળ કુલ છ ગેંગ સામે કાર્યવાહી કરવામાં આવી છે. જેમાં પેંડા ગેંગના 17, મુર્ગા ગેંગના 21, બાટલી ગેંગના 14, ઓડિયા ગેંગના 10, ઇભલા ગેંગના 7 અને હાલ શામજી મકા ગેંગના 12 આરોપીઓને જેલના સળિયા પાછળ ધકેલવામાં આવ્યા છે. આ રીતે કુલ 81 જેટલા ગુનેગારો સામે કડક કાર્યવાહી થઈ ચૂકી છે. રાજકોટ પોલીસ દ્વારા હાથ ધરાયેલી આ સઘન કાર્યવાહીથી શહેરમાં કાયદો અને વ્યવસ્થા વધુ મજબૂત બનશે તેવી આશા વ્યક્ત કરવામાં આવી રહી છે. પોલીસે સ્પષ્ટ કર્યું છે કે, આગામી સમયમાં પણ આવા ગુનેગારો સામે ઝીરો ટોલરન્સની નીતિ અપનાવવામાં આવશે અને કોઈપણ ભોગે ગુનાખોરીને વકરવા દેવામાં નહીં આવે.
