કોઠારીયામાં મહિલાનો ઝેરી દવા પી આપઘાત, ગૃહકાલેશ કારણભૂત હોવાની આશંકા
ન્હાવા જવાનું કહીને ઘરમાં ગયા બાદ પગલું ભરી લીધું
અગ્ર ગુજરાત, રાજકોટ
રાજકોટના કોઠારીયા વિસ્તારમાં એક મહિલાએ ઝેરી દવા પી આત્મહત્યા કરી લેતા વિસ્તારમાં ચકચાર મચી ગઈ છે. બનાવ અંગે પોલીસે વધુ તપાસ હાથ ધરી છે.
મળતી માહિતી મુજબ, કોઠારીયા રોડ સ્થિત મારુતિ સોસાયટીમાં રહેતી શિલ્પાબેન સુભાષભાઈ મકવાણા (ઉ.વ.47) ગઈકાલે સાંજે પોતાના ઘરે બહાર પાડોશી મહિલા સાથે બેઠા હતા. ત્યારબાદ ન્હાવા જવાનું કહી તેઓ ઘરમાં ગયા હતા. આ દરમિયાન તેમણે ઝેરી દવાનો ભૂકો બનાવી પાણી સાથે પી લીધો હતો.
ઘટનાની જાણ થતાં જ પરિવારજનો અને પાડોશીઓ તાત્કાલિક તેમને સારવાર માટે રાજકોટ સિવિલ હોસ્પિટલ ખાતે ખસેડ્યા હતા, પરંતુ સારવાર દરમિયાન તેમનું મોત નિપજ્યું હતું. શિલ્પાબેનના લગ્નને આશરે 23 વર્ષ જેટલો સમય થયો હતો અને તેમને એક દીકરો તેમજ એક દીકરી છે. ખાસ વાત એ છે કે થોડા જ મહિના પહેલા બંને સંતાનોના લગ્ન ધામધૂમથી કરવામાં આવ્યા હતા. તેમના પતિ સુભાષભાઈ બસ ડ્રાઇવર તરીકે કામ કરી પરિવારનું ગુજરાન ચલાવતા હોવાનું જાણવા મળ્યું છે. પ્રાથમિક તબક્કે ગૃહ કલહને પગલે આ પગલું ભરાયું હોવાની આશંકા વ્યક્ત થઈ રહી છે. હાલ પોલીસે સમગ્ર મામલે તપાસ શરૂ કરી વધુ વિગતો મેળવવાનો પ્રયાસ હાથ ધર્યો છે.
