ખનીજ માફિયાઓ પર ગ્રામ્ય એસઓજીનો પ્રહાર
વડવાજડી-પીપળીયા પાળમાં રૂ.1.04 કરોડથી વધુનો મુદ્દામાલ જપ્ત
ઓમ કોંક્રીટમાં ગેરકાયદે રેતી-કપચીનો જથ્થો ઝડપાયો, પીપળીયા પાળમાં લીઝ ધારકની ધરપકડ; જેસીબી, ડમ્પર સહિત વાહનો કબ્જે
અગ્ર ગુજરાત, રાજકોટ
રાજકોટ જિલ્લામાં ગેરકાયદે ખનન અને ખનીજના બિનઅધિકૃત સંગ્રહ સામે ગ્રામ્ય એસઓજીએ સતત બીજા પ્રહારમાં મોટી સફળતા મેળવી છે. લોધિકા તાલુકાના વડવાજડી અને પીપળીયા પાળ ગામોમાં કરાયેલા બે અલગ-અલગ દરોડામાં પોલીસે ખાણ-ખનીજ વિભાગ સાથે મળીને રૂ.1.04 કરોડથી વધુનો મુદ્દામાલ કબ્જે કરી ખનીજ માફિયાઓમાં ફફડાટ મચાવી દીધો છે.
પ્રથમ કાર્યવાહી વડવાજડી ગામ નજીક વાગુદળ રોડ પર આવેલા ‘ઓમ કોંક્રીટ’ એકમમાં કરવામાં આવી હતી. રાજકોટ જિલ્લા પોલીસ વડા વિજયસિંહ ગુર્જરના માર્ગદર્શન હેઠળ ગ્રામ્ય એસઓજીના પીઆઈ એફ.એ. પારગીની ટીમ પેટ્રોલિંગમાં હતી ત્યારે મળેલી ચોક્કસ બાતમીના આધારે ખાણ-ખનીજ વિભાગના અધિકારીઓ સાથે સંયુક્ત દરોડો પાડવામાં આવ્યો હતો.
તપાસ દરમિયાન એકમમાં જરૂરી રોયલ્ટી ભર્યા વિના ગેરકાયદેસર રીતે રેતી અને કપચીનો સંગ્રહ કરવામાં આવતો હોવાનું સામે આવ્યું હતું. સ્થળ પરથી એક ડમ્પર, તેમાં ભરેલી આશરે 40 ટન કપચી, 100 ટન રેતી તેમજ અન્ય આશરે 150 ટન કપચી મળી કુલ રૂ.34 લાખનો મુદ્દામાલ જપ્ત કરવામાં આવ્યો હતો.
બીજી તરફ, પીપળીયા પાળ ગામની સીમમાં મોરમના ગેરકાયદે ખનનની માહિતી મળતાં એસઓજીની ટીમે તાત્કાલિક દરોડો પાડ્યો હતો. તપાસમાં વાવડીના રહેવાસી તથા લીઝ ધારક વિજયપાલસિંહ બલવંતસિંહ ચુડાસમા દ્વારા નિયમોનો ભંગ કરીને ગેરકાયદેસર ખનન કરવામાં આવતું હોવાનું બહાર આવ્યું હતું. પોલીસે આરોપીની ધરપકડ કરી સ્થળ પરથી જેસીબી, ડમ્પર અને અંદાજે 100 ટન મોરમ સહિત રૂ.70.50 લાખનો મુદ્દામાલ કબ્જે કર્યો હતો.
બંને સ્થળેથી જપ્ત કરાયેલા વાહનો અને ખનીજનો જથ્થો ખાણ-ખનીજ વિભાગને સોંપવામાં આવ્યો છે. વિભાગ દ્વારા કમ્પાઉન્ડિંગ દંડ સહિતની કાર્યવાહી માટે જરૂરી અહેવાલ તૈયાર કરવામાં આવી રહ્યો છે, જ્યારે પોલીસ દ્વારા પણ કાયદેસરની વધુ કાર્યવાહી હાથ ધરવામાં આવી છે.
સમગ્ર કાર્યવાહી ગ્રામ્ય એસઓજીના પીઆઈ એફ.એ. પારગીના નેતૃત્વમાં પીએસઆઈ પી.બી. મિશ્રા, જી.જે. ઝાલા, હરપાલસિંહ રાઠોડ, રણજીતસિંહ ધાંધલ, વિપુલભાઈ ગોહીલ તથા ખાણ-ખનીજ વિભાગની ટીમના સહયોગથી પાર પાડવામાં આવી હતી. આ બે સફળ દરોડા બાદ જિલ્લામાં ગેરકાયદે ખનનના ધંધા સાથે સંકળાયેલા તત્વોમાં ભારે ચિંતા ફેલાઈ હોવાનું ચર્ચાઈ રહ્યું છે.
