- એન્ટી કન્વર્ઝન કાયદા અંગે અમેરિકાએ આપ્યું નિવેદન
- આગામી દિવસોમાં કોઈ અન્ય અમેરિકન નેતા પણ ભારતને લઈને આશ્ચર્યજનક નિવેદન આપે તો નવાઈ નહીં
- ભારત અને રશિયા વચ્ચેની ગાઢ મિત્રતાથી અમેરિકા નારાજ
અમેરિકાના વિદેશ મંત્રીએ તાજેતરમાં ભારતને લઈને મોટું નિવેદન આપ્યું છે. તેમણે કહ્યું કે ભારતમાં હેટ સ્પીચના કેસ વધી રહ્યા છે. તેમણે એમ પણ કહ્યું કે ધર્મના નામે ભેદભાવ વધી રહ્યો છે. તેમણે એન્ટી કન્વર્ઝન કાયદા અંગે પણ નિવેદન આપ્યું હતું.
ભારત-રશિયાની મિત્રતાથી અમેરિકા નારાજ
બ્લિંકને કહ્યું કે અમે આ અંગે ચિંતિત છીએ. હવે અહીં સવાલ એ ઊભો થાય છે કે અમેરિકા આ કાયદાને લઈને કેમ ચિંતામાં છે તો તમને જણાવી દઈએ કે વાસ્તવમાં અમેરિકા ભારત અને રશિયા વચ્ચેની ગાઢ મિત્રતાથી નારાજ છે. આવનારા દિવસોમાં કોઈ અન્ય અમેરિકન નેતા પણ ભારતને લઈને આશ્ચર્યજનક નિવેદન આપે તો નવાઈ નહીં.
રશિયાએ યુક્રેન ઉપર કરેલા હુમલા બાદ અમેરિકાએ તેના પર પ્રતિબંધો લગાવ્યા છે અને અન્ય દેશોને પણ રશિયા સાથે કોઈ વેપાર ન કરવા વિનંતી કરી છે. પરંતુ પોતાના હિતોને પ્રથમ રાખીને ભારતે અમેરિકાની ધમકીઓને અવગણીને રશિયા સાથેના વેપાર અને રાજકીય સંબંધો મજબૂત કર્યા છે. છેલ્લા બે વર્ષમાં ભારતે રશિયા પાસેથી રેકોર્ડ સસ્તા દરે તેલની આયાત કરી છે અને હવે પીએમ મોદી પણ રશિયાની મુલાકાતે જવાના છે.
રશિયાએ પ્રથમ વખત કોલસો મોકલ્યો
પહેલીવાર રશિયાએ અમેરિકાના દુશ્મન ઈરાનનો ઉપયોગ કરીને ભારતમાં કોલસો મોકલ્યો છે. ઈરાનના બંદર અબ્બાસ પોર્ટનો ઉપયોગ કરીને નોર્થ સાઉથ ટ્રાન્ઝિટ કોરિડોર દ્વારા કોલસો મોકલવામાં આવ્યો છે. સ્વાભાવિક છે કે અમેરિકા આ જોઈને ખુશ નહીં થાય. કારણ કે રશિયાના આ પગલાથી ઈરાનનું મહત્વ વધી જાય છે. ભારત અને રશિયા વચ્ચે ઉર્જાનો વેપાર પણ થાય છે. અમેરિકાએ સત્તાવાર રીતે કહ્યું છે કે તે ભારત અને રશિયા વચ્ચે વધી રહેલા સૈન્ય જોડાણથી ચિંતિત છે. એટલું જ નહીં, ભારત અને રશિયા પરમાણુ ઉર્જા પર સાથે મળીને કામ કરી રહ્યા છે, અમેરિકા પણ આને લઈને ચિંતામાં છે.
પીએમ મોદી રશિયાના પ્રવાસે જઈ શકે છે
મળતી માહિતી મુજબ પીએમ મોદી 8 જુલાઈએ રશિયાની મુલાકાત લઈ શકે છે. એવું કહેવામાં આવી રહ્યું છે કે પીએમ મોદીના રશિયા પ્રવાસને લઈને અમેરિકા પણ નારાજ છે. પીએમ બન્યા બાદ મોદીની આ બીજી મુલાકાત હશે. વડાપ્રધાન મોદીના રશિયા પ્રવાસ અંગેની માહિતી ક્રેમલિન દ્વારા આપવામાં આવી છે અને ભારતીય વિદેશ મંત્રાલયનું કહેવું છે કે તેની જાહેરાત કરવામાં આવશે.
રશિયા-યુક્રેન યુદ્ધ શરૂ થયા બાદ વડાપ્રધાન મોદીની રશિયાની આ પ્રથમ મુલાકાત હશે. વર્ષ 2022માં વડાપ્રધાન મોદીની રશિયાની મુલાકાત મુલતવી રાખવામાં આવી હતી. આ પછી મોદી-પુતિન સતત સંપર્કમાં છે, પરંતુ બંને નેતાઓમાંથી કોઈએ એક બીજાના દેશની મુલાકાત લીધી નથી. હવે વડાપ્રધાન મોદીની જુલાઈની મુલાકાત રશિયા અને ભારતના સંબંધોમાં નવા અધ્યાયની શરૂઆત માનવામાં આવી રહી છે.
