રાજકોટમાં ૧૬૭મા આવકવેરા દિવસની ઉજવણી: ફેન્સી ડ્રેસ, ચિત્ર સ્પર્ધા અને ઓર્કેસ્ટ્રાના સૂર રેલાયા

 રાજકોટમાં ૧૬૭મા આવકવેરા દિવસની ઉજવણી: ફેન્સી ડ્રેસ, ચિત્ર સ્પર્ધા અને ઓર્કેસ્ટ્રાના સૂર રેલાયા

 મુખ્ય આવકવેરા કમિશ્નર સતીશ કુમાર ગોયલ અને પ્રધાન આવકવેરા કમિશ્નર ડૉ.સુનીલ ગૌતમની ઉપસ્થિતિ

અગ્ર ગુજરાત, રાજકોટ

૧૬૭મા આવકવેરા દિવસની ઉજવણીના ભાગરૂપે રાજકોટના મુખ્ય આવકવેરા કમિશનરની કચેરી દ્વારા એક ભવ્ય સાંસ્કૃતિક અને મનોરંજક કાર્યક્રમનું આયોજન કરવામાં આવ્યું હતું. આ ઉજવણીમાં ફેન્સી ડ્રેસ સ્પર્ધા, ચિત્ર સ્પર્ધા અને ઓર્કેસ્ટ્રા નાઇટનું આયોજન કરી અધિકારીઓ, કર્મચારીઓ અને તેમના પરિવારજનોએ સાંસ્કૃતિક સમરસતા સાથે આવકવેરા વિભાગના સમૃદ્ધ વારસાને બિરદાવ્યો હતો.

આ પ્રસંગે મુખ્ય આવકવેરા કમિશ્નર સતીશ કુમાર ગોયલ, પ્રધાન આવકવેરા કમિશ્નર ડૉ. સુનીલ ગૌતમ સહિત વિભાગના અન્ય ઉચ્ચ અધિકારીઓ, સભ્યો, તેમના પરિવારો તેમજ આમંત્રિત મહેમાનો મોટી સંખ્યામાં ઉપસ્થિત રહ્યા હતા.

આ ઉજવણી અંતર્ગત ગત તા.૨૩ જુલાઈ, ૨૦૨૬ના રોજ ૫ થી ૧૫ વર્ષની વયના બાળકો માટે ચિત્ર સ્પર્ધાનું આયોજન કરવામાં આવ્યું હતું. આ મુખ્ય કાર્યક્રમ દરમિયાન ચિત્ર સ્પર્ધા અને ફેન્સી ડ્રેસ સ્પર્ધાના વિજેતા બાળકોને ઉચ્ચ અધિકારીઓના હસ્તે પુરસ્કારો આપી પ્રોત્સાહિત કરવામાં આવ્યા હતા.

સાંસ્કૃતિક કાર્યક્રમ દરમિયાન સ્કાય મ્યુઝિક ઇવેન્ટ્સ દ્વારા શાનદાર ઓર્કેસ્ટ્રા રજૂ કરવામાં આવ્યો હતો. ગાયકોની મધુર સુરાવલીઓએ સમગ્ર વાતાવરણને મંત્રમુગ્ધ કરી દીધું હતું. આ આયોજને આવકવેરા વિભાગ, રાજકોટ સીએ એસોસિએશન અને આઈ.ટી.પી. એસોસિએશનના સભ્યો વચ્ચે પરસ્પર સંબંધો અને એકતાની ભાવનાને વધુ મજબૂત બનાવી હતી.

પ્રસંગોચિત ઉદ્બોધનમાં સીએ એસોસિએશન અને આઈ.ટી.પી. એસોસિએશનના હોદ્દેદારોએ પોતાના વિચારો રજૂ કર્યા હતા.

મુખ્ય આવકવેરા કમિશ્નર સતીશ કુમાર ગોયલે ઉપસ્થિત સૌને પ્રેરણાદાયી પ્રવચન આપતા જણાવ્યું હતું કે, “વર્ષ ૧૮૬૦માં આવકવેરાના પ્રારંભથી લઈને અત્યાર સુધી વિભાગે અનેક પરિવર્તનો જોયા છે. વિવિધ તબક્કાઓમાંથી પસાર થઈને આજે આપણે ડિજિટલ ક્રાંતિના યુગમાં પ્રવેશ કર્યો છે, જેનાથી કરદાતાઓ માટે સેવાઓ વધુ સુલભ અને પારદર્શક બની છે.”