સ્થાનિક સ્વરાજયની ચૂંટણીના ઉમેદવારોની પ્રથમ યાદી કોંગ્રેસ રવિવારે જાહેર કરશે

 સ્થાનિક સ્વરાજયની ચૂંટણીના ઉમેદવારોની પ્રથમ યાદી કોંગ્રેસ રવિવારે જાહેર કરશે

રાજકોટમાં ખાનગી રિસોર્ટમાં સૌરાષ્ટ્ર ઝોનની બેઠક મળી : ૫૦ ટકા યુવાનોને તક આપવા નિર્ણય

અગ્ર ગુજરાત, રાજકોટ

સ્થાનિક સ્વરાજ્યની ચૂંટણીની જાહેરાત થઈ ગઈ છે. ભાજપ બાદ કોંગ્રેસના પ્રદેશ પ્રમુખે રાજકોટમાં સૌરાષ્ટ્રના જિલ્લા-શહેર કોંગ્રેસ પ્રમુખો અને પ્રભારીઓ સાથે બેઠક યોજી ચૂંટણીલક્ષી ચર્ચા કરી હતી. ગોંડલ ચોક નજીક ખાનગી રિસોર્ટમાં પ્રદેશ કોંગ્રેસ પ્રમુખ અમિત ચાવડાની ઉપસ્થિતિમાં બેઠક યોજવામાં આવી હતી. જેમાં રાજકોટ શહેર-જિલ્લા, જામનગર, પોરબંદર, દ્વારકા, સોમનાથ, જૂનાગઢ અને સુરેન્દ્રનગરના આગેવાનો સાથે ચૂંટણી લક્ષી ચર્ચા કરવામાં આવી હતી અને માર્ગદર્શન આપવામાં આવ્યું હતું.

અમિત ચાવડાએ જીતના દાવા સાથે ભ્રષ્ટાચાર અને મોંઘવારીથી ત્રસ્ત જનતા પરિવર્તનની શરૂઆત સ્થાનિક સ્વરાજની ચૂંટણીથી કરશે તેવો વિશ્વાસ વ્યક્ત કર્યો હતો. એ સાથે આગામી 5 એપ્રિલે કોંગ્રેસ પોતાના ઉમેદવારોની પ્રથમ યાદી જાહેર કરશે, જેમાં મહાનગર પાલિકાના ઉમેદવારો જાહેર કરવામાં આવશે.

ગુજરાત પ્રદેશ કોંગ્રેસ પ્રમુખ અમિત ચાવડા આજે રાજકોટની મુલાકાતે આવી પહોંચ્યા હતા. ગોંડલ ચોક નજીક ખાનગી રિસોર્ટમાં સૌરાષ્ટ્રના તમામ જિલ્લાના પ્રમુખ, પ્રભારીઓ નિરીક્ષકો સાથે બપોરના 3 વાગ્યાથી શરૂ થયેલી આ બેઠક 4.30 વાગ્યા સુધી ચાલી હતી. આ બેઠકમાં પ્રદેશ પ્રમુખ દ્વારા તમામ આગેવાનોને ચૂંટણી લક્ષી માર્ગદર્શન આપવામાં આવ્યું હતું અને પાર્ટીની રણનીતિ સ્પષ્ટ કરી વધુને વધુ લોકો સુધી પહોંચવા સૂચના આપી હતી.

અમિત ચાવડાએ નિવેદન આપતા જણાવ્યું હતું કે, સ્થાનિક સ્વરાજ્યની ચૂંટણી જાહેર કરવામાં આવી છે. ગુજરાતમાં જયારે 10,000 બેઠક પર ચૂંટણી યોજાવાની છે, ત્યારે અગાઉથી જ આ વખતે કોંગ્રેસ દ્વારા લોકો સુધી પહોંચી તેમની વ્યથા અને પ્રશ્નો જાણવાનો પ્રયાસ કર્યો હતો. ઉમેદવારો અંગે અને લોકોના પ્રશ્નો અંગે ચર્ચા કરવામાં આવી હતી.કોંગ્રેસની ચૂંટણી સમિતિ પણ આગામી બે દિવસમાં પોતાની કાર્યવાહી શરૂ કરશે અને આ વખતે યુવાનોને પ્રાધાન્ય આપી 50 ટકા યુવા ઉમેદવારોને મેદાનમાં ઉતારવા નિર્ણય કરાયો છે.

અમિત ચાવડાએ વધુમાં જણાવ્યું હતું કે, અમે લોકોના મત જાણ્યા છે, લોકોમાં નારાજગી અને રોષ છે.ગુજરાતની જનતા ભાજપના ભ્રષ્ટાચારી શાસન અને મોંઘવારીથી ત્રસ્ત છે,કાયદો અને વ્યવસ્થાની સ્થિતિ બગડી છે. યુવાનો દારૂ અને ડ્રગ્સના દુષણમાં ફસાયા છે, માટે તમામ મુદ્દાઓને ધ્યાનમાં રાખી અમે આ વખતે પ્રજાના મુદ્દાઓને ધ્યાનમાં રાખી લોકો વચ્ચે મત માંગવા જવાના છીએ.અમારી સરકાર બનતા તમામ સમસ્યાઓ હલ કરવા પ્રયત્ન કરશે.

આ બેઠકમાં અત્યાર સુધીમાં નિરીક્ષકો દ્વારા કરવામાં આવેલા પ્રવાસ અંગે ચર્ચા કરી ઉમેદવારોની સ્થિતિ શું છે તેની ચર્ચા કરવામાં આવી હતી.આ ઉપરાંત તમામ બેઠક પર ઉમેદવારો પસંદગી અંગે કોઈ પ્રશ્ન હોય કે કોઈ જગ્યાએ પ્રભારીઓ સમક્ષ કોઈ રજુઆત કરવામાં આવી છે કે કેમ તે મુદ્દે ચર્ચા કરવામાં આવી હતી. ઉલ્લેખનીય છે કે ફોર્મ ભરવામાં કોઈ ભૂલ ન રહે તે માટે અગાઉથી લીગલ ટીમને બોલાવી ફોર્મ ભરવા તાલીમ આપી દેવામાં આવી છે. ચૂંટણીમાં કોઈ પણ કચાસ ન રહે તે માટે ઝીણવટભરી કાળજી રાખવા તમામને સૂચના પ્રદેશ પ્રમુખ દ્વારા આપવામાં આવી છે.

આજની બેઠકમાં પ્રદેશ કોંગ્રેસ પ્રમુખ અમિત ચાવડા, ધારાસભ્ય વિમલ ચુડાસમા, ધારાસભ્ય જીજ્ઞેશ મેવાણી, પૂર્વ ધારાસભ્ય પુંજાભાઈ વંશ, વિક્રમભાઈ માડમ, મહમદ પીરઝાદા, પ્રવિણભાઈ મૂછડીયા, હીરાભાઈ જોટવા, લલિત વસોયા, ઋત્વિક મકવાણા, ભીખાભાઈ જોશી, પ્રતાપ દુધાત હાજર રહ્યા હતા.