વધુ એક સરકારી ભરતીની પરીક્ષા વિવાદમાં
PSIની પરીક્ષામાં પેપરનું સિલ ખુલ્લુ હોવાના આક્ષેપ સાથે ભારે હોબાળો
અમદાવાદમાં પરીક્ષા કેન્દ્ર પર થયેલો ડખ્ખો: ઉમેદવારોને તોછડો જવાબ આપ્યો હોવાનો આક્ષેપ
અગ્ર ગુજરાત, રાજકોટ
અમદાવાદમાં પોલીસ સબ ઇન્સ્પેક્ટર (PSI) ભરતી પરીક્ષાના લેખિત પેપરને લઈને ગંભીર વિવાદ સર્જાયો છે. શહેરના વસ્ત્રાલ વિસ્તારમાં આવેલી ભાવના સ્કુલ વસ્ત્રાલ ખાતે પરીક્ષા દરમિયાન ઉમેદવારો દ્વારા હોબાળો કરવામાં આવ્યો હતો. વિદ્યાર્થીઓનો આક્ષેપ છે કે પરીક્ષા શરૂ થતા પહેલાં જ પેપરનું સીલ ખુલ્લું હતું, જેના કારણે પારદર્શિતા અંગે પ્રશ્નો ઊભા થયા છે.
ઘટનાની માહિતી મુજબ, પેપર વિતરણ દરમિયાન કેટલાક વિદ્યાર્થીઓએ આ બાબતે વાંધો ઉઠાવ્યો હતો અને જવાબદાર વ્યક્તિઓને પ્રશ્ન પૂછ્યા હતા. પરંતુ વિદ્યાર્થીઓના જણાવ્યા અનુસાર, તેમને તોછડી ભાષામાં જવાબ આપવામાં આવ્યો હતો અને “તમારે પેપર આપવું હોય તો આપો” જેવી ટિપ્પણીઓ કરવામાં આવી હતી, જેના કારણે પરિસ્થિતિ વધુ ઉગ્ર બની ગઈ હતી.
હોબાળો વધતા મોટી સંખ્યામાં વિદ્યાર્થીઓ પરીક્ષા કેન્દ્રની બહાર એકત્રિત થયા હતા અને વિરોધ નોંધાવ્યો હતો. ત્યારબાદ સંચાલકોએ પરિસ્થિતિ કાબૂમાં લેવા માટે સીસીટીવી ફૂટેજ ચેક કરવાની પ્રક્રિયા શરૂ કરી હતી અને સમગ્ર ઘટનાની તપાસ હાથ ધરાઈ છે. આ પરીક્ષામાં કુલ 858 જગ્યાઓ માટે 1,10,680 ઉમેદવારોએ અરજી કરી હતી. પરીક્ષા અમદાવાદ, વડોદરા, સુરત અને રાજકોટ સહિતના કેન્દ્રોમાં યોજાઈ હતી. રાજ્યભરમાં કુલ 371 શાળાઓને પરીક્ષા કેન્દ્ર તરીકે પસંદ કરવામાં આવી હતી.
સુરક્ષાને ધ્યાનમાં રાખીને પરીક્ષા દરમિયાન લગભગ 4000 પોલીસ કર્મચારીઓ અને 8000 શિક્ષણ વિભાગના કર્મચારીઓને તૈનાત કરવામાં આવ્યા હતા. તેમ છતાં, અમદાવાદના આ ઘટનાક્રમને લઈને પરીક્ષાની પારદર્શિતા પર પ્રશ્નો ઊભા થયા છે. હાલ સમગ્ર મામલે સંબંધિત વિભાગ દ્વારા તપાસ શરૂ કરવામાં આવી છે અને ઉમેદવારોના આક્ષેપોની ચકાસણી કરવામાં આવી રહી છે.
પેપર સીલ બંધ કવરમાં જ પહોંચ્યા હતા: GPRBનો ખુલાસો
આ પરીક્ષાના પેપરોની ગેરરીતિ અંગે ગુજરાત પોલીસ ભરતી બોર્ડ દ્વારા ખુલાસો કરવામાં આવ્યો છે.બોર્ડ દ્વારા તપાસ કરીને જણાવાયું હતું કે, પેપરનું સીલ ખુલ્લુ હોવાની વાતમાં તથ્ય નથી. પરીક્ષાના કેન્દ્ર પર પેપર સીલ બંધ કવરમાં જ પહોંચ્યા હતાં. સ્કૂલના સીસીટીવી ફૂટેજ ચકાસ્યા બાદ ગુજરાત પોલીસ ભરતી બોર્ડ દ્વારા ખુલાસો કરાયો હતો. વસ્ત્રાલની ભાવના સ્કૂલમાં પેપરનું સીલ ખુલ્લુ હોવાના આક્ષેપ થયા હતાં.
