જ્યોતી સીએનસી પ્રાયોજીત “ઓલ ઇન્ડિયા સોલો ડાન્સ ચેમ્પિયનશિપ – ૨૦૨૬નો તા.૨3મીએ ગ્રાન્ડ ફિનાલે
દેશભરના ૫૦૦ થી વધુ પ્રતિભાશાળી ડાન્સ કલાકારો માટે રાજકોટ બનશે ટેલેન્ટનું મેગા મંચ
પ્રખ્યાત ડાન્સર દીપિકા સોનીની હાજરીમાં ઝગમગશે ગ્રાન્ડ ફિનાલેની સાંજ: વિજેતાઓને રોકડ ઈનામો અને ટ્રોફી એનાયત કરવામાં આવશે
અગ્ર ગુજરાત, રાજકોટ
રાજકોટ શહેર માત્ર ઉદ્યોગ અને વેપાર માટે જ નહીં, પરંતુ સમૃદ્ધ કલાવારસા અને જીવંત સાંસ્કૃતિક પરંપરાઓ માટે પણ સમગ્ર ગુજરાતમાં આગવી ઓળખ ધરાવે છે. લોકસંગીત, નૃત્ય, નાટ્યકલાથી લઈને યુવા પ્રતિભાને પ્રોત્સાહન આપતી વિવિધ સાંસ્કૃતિક પ્રવૃત્તિઓ દ્વારા રાજકોટ સતત સર્જનાત્મક અભિવ્યક્તિને નવી ઊંચાઈઓ આપી રહ્યું છે. આવી જ સાંસ્કૃતિક પરંપરાને વધુ સમૃદ્ધ બનાવતા રાજકોટના ઈતિહાસમાં પ્રથમવાર રાષ્ટ્રીય કક્ષાની “ઓલ ઇન્ડિયા સોલો ડાન્સ ચેમ્પિયનશિપ ૨૦૨૬” નું ભવ્ય આયોજન થવા જઈ રહ્યું છે. આગામી ૨૩ મે ૨૦૨૬, શનિવારના રોજ પ્રમુખ સ્વામી ઓડિટોરિયમ ખાતે “ઓલ ઇન્ડિયા સોલો ડાન્સ ચેમ્પિયનશિપ – ૨૦૨૬”નું ભવ્ય ગ્રાન્ડ ફિનાલે યોજાનાર છે. દેશભરના નૃત્ય પ્રતિભાઓને એક મંચ પર લાવવાના હેતુ સાથે આયોજિત આ મેગા ડાન્સ ચેમ્પિયનશિપમાં ગુજરાત ઉપરાંત ભારતના વિવિધ રાજ્યોમાંથી પ્રતિસ્પર્ધીઓ ભાગ લેશે. રાષ્ટ્રીય કક્ષાની આ ડાન્સ કોમ્પિટીશનના મુખ્ય પ્રાયોજક તરીકે જ્યોતી સીએનસી ઓટોમેશન લિમિટેડના ડિરેક્ટર સહદેવસિંહ જાડેજાનો સંપૂર્ણ આર્થિક સહયોગ અને માર્ગદર્શન પ્રાપ્ત થયું છે. આ સ્પર્ધાનું આયોજન ખનક વિન્સ ડાન્સ એકેડમીના કેયુર બારોટ દ્વારા કરવામાં આવ્યું છે.
રાજકોટના આંગણે પ્રથમવાર યોજાનાર આ મેગા ઈવેન્ટમાં ૫૦૦થી વધુ સ્પર્ધકો ભાગ લેશે. સમગ્ર કાર્યક્રમને પાન-ઈન્ડિયા સ્તરે પ્રસારિત કરવામાં આવશે. વિવિધ વયજુથમાં યોજાનારી આ સ્પર્ધામાં ૬ થી ૧૨ વર્ષ, ૧૩ થી ૧૮ વર્ષ અને ૧૮ વર્ષથી ઉપરના કેટેગરીનો સમાવેશ કરવામાં આવ્યો છે. દરેક કેટેગરીમાં વિજેતાઓને રૂ. ૧૫,000, રનર-અપને રૂ. ૧૦,000 અને દ્વિતીય રનર-અપને રૂ. ૫,000નું રોકડ ઇનામ આપવામાં આવશે. સ્પર્ધામાં ભાગ લેનાર તમામ સ્પર્ધકોને પ્રમાણપત્ર આપવામાં આવશે તેમજ વિજેતાઓને ટ્રોફી અને આકર્ષક ઈનામોથી સન્માનિત કરવામાં આવશે.
આ આયોજન માટે ગુજરાતના રાજકોટ, અમદાવાદ, વડોદરા, ભાવનગર, ગાંધીધામ, જામનગર, જૂનાગઢ, પોરબંદર, સુરત સહિત અનેક શહેરોમાં તેમજ ભારતના મુંબઈ, બેંગલુરુ, ભોપાલ, દિલ્હી, લખનૌ, પટણા, પુણે, ઉદયપુર સહિતના શહેરોમાં ઓડિશન યોજાયા છે. આ કાર્યક્રમના ગ્રાન્ડ ફિનાલેમાં જાણીતા ડાન્સ આર્ટિસ્ટ દીપિકા સોની નિર્ણાયક તરીકે ઉપસ્થિત રહેશે. દીપિકા સોની ડાન્સ પ્લસ સીઝન ફાઈવ અને ડીઆઈડી લિટલ માસ્ટર્સ જેવી જાણીતી શોમાં પોતાની પ્રતિભાનો પરિચય આપ્યો છે તેમજ બોલીવુડના અભિનેતા શાહરૂખ ખાન અને પ્રખ્યાત કોરિયોગ્રાફર રેમો ડિસોઝા જેવી હસ્તીઓ દ્વારા પણ પ્રશંસા મેળવી છે.
આ ચેમ્પિયનશિપ આયોજનનો હેતુ નિ:શુલ્ક ઓડિશન દ્વારા પ્રતિભાશાળી યુવાનોને પ્રોત્સાહન આપી તેમને રાષ્ટ્રીય સ્તરે ઓળખ અપાવવાનો તથા દેશભરના યુવા અને સંઘર્ષશીલ કલાકારોને મંચ પૂરો પાડવાનો છે તેવું આયોજકો દ્વારા જણાવવામાં આવ્યું છે. રાજકોટમાં યોજાનાર આ ભવ્ય ડાન્સ ઇવેન્ટને લઈને યુવાનો અને નૃત્યપ્રેમીઓમાં ભારે ઉત્સાહ જોવા મળી રહ્યો છે. આ આયોજનને સફળ બનાવવા માટે જ્યોતિ CNC તરફથી જયદીપભાઈ ત્રિવેદી અને આરતીબેન અગ્રાવત, એહસાસ ટ્રસ્ટ તરફથી નિશ્ચલભાઈ સંઘવી અને કિન્નરીબેન પટેલ તેમજ જ્યોતિ ફાઉન્ડેશનના કૌશિકભાઈ સોલંકી દ્વારા વિશેષ સહયોગ આપવામાં આવ્યો હોવાનું અખબારી યાદીમાં જણાવવામાં આવ્યું છે. .આ સ્પર્ધા અને ઓડિશન અંગે વધુ માહિતી માટે પૂજા બારોટનો સંપર્ક +91 94845 88377 પર સંપર્ક કરવા યાદીમાં જણાવ્યું છે.
