વર્તમાન પરિસ્થિતિમાં ટ્રાફિક પોલીસ પ્રજા સાથે સહયોગી વલણ રાખે — મયુર શાહ
પોલીસનું સંવેદનશીલ વર્તન લોકોમાં વિશ્વાસ વધારશે
અગ્ર ગુજરાત, રાજકોટ
રાજકોટ શહેર હાલમાં ભારે ટ્રાફિક, માર્ગોના કામકાજ, વધતી વાહન સંખ્યા અને વિવિધ શહેરી સમસ્યાઓના કારણે અત્યંત મુશ્કેલ પરિસ્થિતિમાંથી પસાર થઈ રહ્યું છે. શહેરના મુખ્ય માર્ગો પર રોજબરોજ લાંબા ટ્રાફિક જામ સર્જાઈ રહ્યા છે, જેના કારણે સામાન્ય નાગરિકો, વેપારીઓ, વિદ્યાર્થીઓ, દર્દીઓ તેમજ નોકરીયાત વર્ગને ભારે હાલાકીનો સામનો કરવો પડી રહ્યો છે. આવી સ્થિતિમાં ટ્રાફિક પોલીસની ભૂમિકા માત્ર કાયદાનો અમલ કરાવવાની જ નહીં પરંતુ પ્રજા સાથે સહયોગ અને સંવેદનાથી વર્તવાની પણ બની જાય છે.
આજે શહેરના અનેક વિસ્તારોમાં રસ્તાના કામો, ડાયવર્ઝન, અચાનક ટ્રાફિક બ્લોકેજ અને પાર્કિંગની સમસ્યાઓને કારણે લોકો સમયસર પોતાના ગંતવ્ય સુધી પહોંચી શકતા નથી. ઘણા લોકો હોસ્પિટલમાં સારવાર માટે, વિદ્યાર્થીઓ પરીક્ષા આપવા, કર્મચારીઓ નોકરી માટે અને નાના વેપારીઓ પોતાના રોજગાર માટે સતત દોડધામ કરી રહ્યા છે. આવા સમયમાં જો ટ્રાફિક પોલીસ માત્ર દંડાત્મક કાર્યવાહી પર ભાર મૂકે તો સામાન્ય નાગરિક વધુ માનસિક તણાવ અનુભવે છે.
હું રાજકોટ ટ્રાફિક પોલીસને વિનંતી કરું છું કે હાલની પરિસ્થિતિને ધ્યાનમાં રાખીને પ્રજા સાથે સહયોગી અને માનવતાભર્યો અભિગમ અપનાવવામાં આવે. નાના ભુલચૂકના મામલાઓમાં દંડ કરતા માર્ગદર્શન અને સમજણને વધુ પ્રાથમિકતા આપવામાં આવે. ઘણા વખત ટ્રાફિકના દબાણને કારણે વાહનચાલકો અજાણતા નિયમભંગ કરી બેસતા હોય છે. આવી સ્થિતિમાં પોલીસનું સંવેદનશીલ વર્તન લોકોમાં વિશ્વાસ અને સકારાત્મકતા વધારશે.
રાજકોટ શહેર ઝડપથી વિકસતું શહેર છે અને વાહનોની સંખ્યા સતત વધી રહી છે. પરંતુ તેની સરખામણીએ રસ્તા, પાર્કિંગ અને ટ્રાફિક વ્યવસ્થામાં હજુ પણ અનેક સુધારાની જરૂર છે. ટ્રાફિકની સમસ્યા માત્ર પ્રજાની ભૂલ નથી, પરંતુ શહેરની માળખાકીય સમસ્યાઓ પણ તેના માટે જવાબદાર છે. તેથી પોલીસ અને પ્રજાએ એકબીજાને વિરોધી નહીં પરંતુ સહયોગી તરીકે જોવાની જરૂર છે.
