ફરી એક પરીક્ષા વિવાદમાં : વિદેશ જવા માટે લેવાતી TOEFLમાં પણ બેફામ ચોરી
દિવાલમાં બખોરૂ પાડી સ્ક્રીન શેરીંગ દ્વારા બોગસ પરીક્ષાર્થી બેસાડવાનું કારસ્તાન : આણંદમાંથી થયેલો પર્દાફાશ : 3.૭૮ લાખના મુદામાલ સાથે મુખ્ય સુત્રધારની ધરપકડ
અગ્ર ગુજરાત, આણંદ
વિદેશ જવા ઈચ્છતા વિદ્યાર્થીઓ માટે લેવાતી આંતરરાષ્ટ્રીય સ્તરની TOEFL ઓનલાઈન પરીક્ષામાં ગેરરીતિ આચરવાનું એક અત્યંત હાઈટેક અને ચોંકાવનારું રેકેટ આણંદમાંથી ઝડપાયું છે. આણંદ સાયબર ક્રાઈમ પોલીસે બાતમીના આધારે આણંદ આર્ટ્સ કોલેજની બિલ્ડિંગમાં રેડ કરીને આ આંતરરાષ્ટ્રીય પરીક્ષામાં થતા મોટા ભાંડાફોડનો પર્દાફાશ કર્યો છે. અહીં વિદેશ જવા ઈચ્છતા ઉમેદવારો પાસેથી મોટી રકમ વસૂલીને તેમના બદલે ડમી ઉમેદવાર બેસાડી પરીક્ષા પાસ કરાવવામાં આવતી હતી.
સાયબર ક્રાઈમની તપાસમાં આ રેકેટની ચોંકાવનારી મોડસ ઓપરેન્ડી સામે આવી છે. કોલેજ બિલ્ડિંગના બે રૂમ વચ્ચે આવેલી કોમન દિવાલમાં એક ગુપ્ત છિદ્ર કરવામાં આવ્યું હતું. આ છિદ્ર મારફતે હાઈટેક ટેક્નિકલ સાધનો અને વાયરો પસાર કરીને ઓનલાઈન પરીક્ષાનું સ્ક્રીન શેરિંગ ઓપરેટ કરવામાં આવતું હતું. મૂળ ઉમેદવાર પરીક્ષા રૂમમાં માત્ર કેમેરા સામે બેસી રહેતો હતો, જ્યારે બાજુના રૂમમાં બેઠેલો ડમી એક્સપર્ટ સ્ક્રીન શેરિંગ અને કીબોર્ડ-માઉસના સેટઅપ દ્વારા ઓનલાઈન પરીક્ષાના જવાબો આપતો હતો. આ રીતે પરિણામોમાં મોટી છેતરપિંડી આચરવામાં આવતી હતી.
પોલીસે દરોડા દરમિયાન ઘટના સ્થળેથી આ કૌભાંડના મુખ્ય સૂત્રધારો પૈકીના એક તરૂણકાંત રાકેશકાંત શર્માની ધરપકડ કરી લીધી છે. આ હાઈટેક ચોરીમાં વપરાતા ડિજિટલ સાધનો જેવા કે HDMI સ્પ્લિટર, હાઈ-એન્ડ કોમ્પ્યુટર, મોનિટર્સ, CPU, વેબકેમ, હેડફોન, વાઈફાઈ રૂટર અને નેટવર્કિંગ સ્વિચ સહિત કુલ રૂપિયા 3.78 લાખનો મુદ્દામાલ પોલીસ દ્વારા જપ્ત કરવામાં આવ્યો છે.
આ સમગ્ર કાવતરામાં અન્ય ઘણા મોટા માથાઓની સંડોવણી પણ સપાટી પર આવી છે. આણંદ સાયબર ક્રાઈમ પોલીસે આ મામલે ત્રણ નામજોગ અને અન્ય અજાણ્યા શખ્સો વિરૂદ્ધ આઈટી એક્ટ અને છેતરપિંડીની વિવિધ કલમો હેઠળ ગુનો નોંધી વધુ તપાસ હાથ ધરી છે. ફરાર થઈ ગયેલા અન્ય આરોપીઓ સુધી પહોંચવા માટે પોલીસે અલગ-અલગ ટીમો બનાવી તપાસનો ધમધમાટ શરૂ કર્યો છે.
