નશાના દુષણને ડામવા શાળા-કોલેજ આસપાસ નજર રાખવા કલેકટરનો આદેશ
જિલ્લા નાર્કો કો-ઓર્ડીનેશન સેન્ટરની બેઠક યોજાઈ
રૂ. ૫૪.૧૬ લાખના ૧૦૮ કિલો ગાંજાનો જથ્થો, ૭.૬ લાખની નશાકારક ટેબ્લેટ ઝડપાઈ
અગ્ર ગુજરાત, રાજકોટ
ક્લેક્ટર ડો. ઓમ પ્રકાશના અધ્યક્ષસ્થાને આયોજિત રાજકોટ જિલ્લા કક્ષાની નાર્કો કો-ઓર્ડીનેશન સેન્ટરની બેઠકમાં વિવિધ વિભાગ દ્વારા નાર્કોટિકસ ડ્રગ્સ વિરોધી કામગીરીની સમીક્ષા કરવામાં આવી હતી.
ભારત સરકારના ‘ડ્રગ્સ ફ્રી ઇન્ડિયા’ કેમ્પેઇનનું અસરકારક અમલ થાય તે હેતુથી ડ્રગ્સ, નશીલી દવાઓ તેમજ શાળા આસપાસ તંબાકુનું વેચાણ કરનારા વિરુદ્ધ સઘન કામગીરી કરવા ડો. ઓમ પ્રકાશે સૂચના આપી હતી.
વધુમાં કલેકટરે યુવાનોમાં નાર્કોટિક્સ ડ્રગ્સ અંગે જાગૃતિ કેળવવા પર ખાસ ભાર મૂકી શાળા કોલેજ શરુ થતા જાગૃતિ અભિયાન સક્રિય રીતે શરુ કરવા, વ્યસનીઓ વ્યસન મુક્તિ કેન્દ્રમાં આવવા પ્રેરાય, બાળ સુધાર ગૃહમાં આવતા બાળકોનું ડ્રગ્સ વિરોધી કાઉન્સેલિંગ કરવા સહીત સંબંધિત વિભાગને કામગીરી કરવા જણાવ્યું હતું.
રાજકોટ ગ્રામ્ય, જિલ્લા પોલીસ વિભાગ દ્વારા એન્ટી નાર્કોટિક્સ ડ્રગ્સ ઝુંબેશ અન્વયે એક માસમાં કુલ રૂ. ૫૪.૧૬ લાખની કિંમતનો ૧૦૮ કિલો ગાંજો ઝડપી પાડ્યો હોવાનું તેમજ ગોંડલ તાલુકા પોલીસ દ્વારા રૂ. ૭.૫૬ લાખની કિંમતની નશાકારક ૨૨૫ ટેબ્લેટ્સ ઝડપી એન.ડી.પી.એસ. એક્ટ અન્વયે કામગીરી કરવામાં આવી હોવાનું પોલીસ અધિકારીએ માહિતી આપતા જણાવ્યું હતું.
આ બેઠકમાં રાજકોટ જિલ્લા પોલીસ અધિક્ષક વિજયસિંહ ગુર્જર, આસિસ્ટન્ટ કલેકટર ટીના કલ્યાણ, નિવાસી અધિક કલેક્ટર જે.એચ. બારોટ, પ્રાંત અધિકારીઓ, પોલીસ વિભાગના અધિકારીઓ સહીત કમિટીના સભ્યઓ ઉપસ્થિત રહ્યા હતા.
