વેરાવળના ડારી ટોલબુથના કર્મીઓએ ટેકસ મોરબી ભાજપના મહામંત્રીને મારમાર્યો

વેરાવળના ડારી ટોલબુથના કર્મીઓએ ટેકસ મોરબી ભાજપના મહામંત્રીને મારમાર્યો

૧૨ કર્મચારીની ધરપકડ : ટોલબુથ પર ફાસ્ટટેગમાંથી કપાત પ્રશ્ને શરૂ થયેલ બોલાચાલીએ ઉગ્ર સ્વરૂપ સુધી પહોંચી

અગ્ર ગુજરાત, વેરાવળ

વેરાવળ નજીક હાઈવે પર આવેલા ડારી ટોલબૂથ ખાતે રવિવારે બપોરે ત્રણેક વાગ્યાના સુમારે ભારે હોબાળો અને મારામારીની ઘટના સામે આવી હતી. જેમાં મોરબી જીલ્લા ભાજપના મહામંત્રી તપન દવે અને ટોલબૂથના કર્મચારીઓ વચ્ચે ફાસ્ટેગમાંથી કપાત થવાના મુદ્દે ઉગ્ર બોલાચાલી બાદ મામલો મારામારી સુધી પહોંચ્યો હતો. આ મામલે મહામંત્રીએ ફરીયાદ નોંધાવતા પોલીસે 12 ટોલકર્મીઓ સામે લુંટ, રાયોટીંગ, હુમલા સહિતની ગંભીર કલમો હેઠળ ગુનો નોંધી તમામ આરોપીઓની ધરપકડ કરી ધોરણસરની કાર્યવાહી હાથ ધરી છે.

આ ઘટનાની પ્રાપ્ત વિગતોનુસાર મોરબી જીલ્લા ભાજપના મહામંત્રી તપન દવે સોમનાથ દર્શન કરી પોતાની કાર લઈને ડારી ટોલબૂથ પરથી પસાર થઈ રહેલ ત્યારે તેમના વાહનનું ફાસ્ટેગ બ્લેકલિસ્ટ હોવાનું દર્શાવતા ટોલકર્મચારીઓએ વાહનને આગળ જવા દેવાનો ઇનકાર કર્યો હતો. આ મુદ્દે બંન્ને પક્ષ વચ્ચે ઉગ્ર તકરાર શરૂ થયેલ હતી અને થોડીવારમાં વાતાવરણ તંગ બની જતા ટોલકર્મીઓ અને નેતા વચ્ચે ધક્કામુક્કી અને મારામારીના દૃશ્યો સર્જાયા હતા. આ માથાકુટ ચાલી રહેલ તે સમયે ત્યાંથી પસાર થઈ રહેલા ગુજરાત વિધાનસભાના નાયબ દંડક અને ધારાસભ્ય જગદીશ મકવાણા ટોલબુથ પરથી પસાર થતા તેમણે બંને પક્ષોને શાંત પાડવાનો પ્રયાસ કરી જાણ કરતા જ પોલીસનો કાફલો ઘટના સ્થળે દોડી આવીને પરિસ્થિતિ કાબુમાં લીધી હતી.

ટોલબુથ પર થયેલ ઘટનાક્રમના સીસીટીવી ફુટેજો વાયરલ થયા હતા. બાદમાં આ માથાકુટ મામલે મહામંત્રી તપન દવે દ્વારા ફરીયાદ નોંધવામાં આવી હતી. જેમાં ટોલકર્મીઓએ ગે.કા. મંડળી રચી આડેધડ શરીરે મુંઢ મારમારી માથાના પાછળના ભાગે મારી નાખવાના ઇરાદે બે ફટકા મારી ગંભીર ઇજા પહોંચાડી હતી. આ માથાકુટમાં કોઇએ તપન દવેનો ત્રણ તોલાનો સોનાનો ચેઇન કિં. રૂ.1.50 લાખનો ઝુટવી લઇ લુંટ કરી હોવાનું જણાવ્યુ હતુ. જેના આધારે પોલીસે ટોલકર્મીઓ (૧) ભગી આહિર, (૨) નિતીન મકવાણ, (૩) કાનજી મેવાડા, (૪) લક્ષ્મણ ગઢવી, (૫) નયન પ્રતાપ બોરીચા, (૦૬) ભુપત મકવાણા, (૦૭) લાલો આહિર,(૦૮) નિકુંજ મેરામ બકોતરા, (૦૯) પરબત બારડ, (૧૦) ત્તૃપલ આહિર, (૧૧) જયેશ પુના રામ, (૧૨) અરજણ પંપાણીયા સામે બીએનએસની કલમ-૧૦૯(૧),૩૧૧,૧૧૫(૨),૧૮૯(૨),૧૯૦,૧૯૧(૨),૧૯૧(૩),૩૫૨, તથા જી.પી.એક્ટ ક.૧૩૫ મુજબ ગુનો નોંધી તમામ આરોપીઓની અટક કરી આગળની કાર્યવાહી હાથ ધરી છે.

તો બીજી તરફ આ મામલે ટોલબૂથ મેનેજર દેવેન્દ્રસિંહ પરિહારે પણ ગંભીર આક્ષેપો કરતા જણાવેલ કે, માત્ર કર્મચારીઓ જ નહીં પરંતુ તપન દવે દ્વારા પણ ટોલકર્મચારીઓ સાથે ઉગ્ર વર્તન અને બબાલ કરવામાં આવી હતી.