સગીરાને ઘરમાં ખેંચી ધમકીના જોરે ત્રણ મહિના સુધી નરાધમે આચર્યું દુષ્કર્મ
જાનથી મારી નાખવાની ધમકી આપી વારંવાર શારીરિક શોષણ કર્યાનો આક્ષેપ, પરિવારને જાણ થતાં ભાંડો ફૂટ્યો
અગ્ર ગુજરાત, રાજકોટ
શહેરના યુનિવર્સિટી પોલીસ સ્ટેશન વિસ્તારની એક સગીરા પર શારીરિક શોષણનો ગંભીર બનાવ સામે આવ્યો છે. જામનગર રોડ વિસ્તારમાં રહેતા મુરલી આહિર નામના શખ્સે સગીરાને બળજબરીપૂર્વક પોતાના ઘરે લઈ જઈ પ્રથમ વખત દુષ્કર્મ આચર્યા બાદ જાનથી મારી નાખવાની ધમકી આપી ત્રણ મહિના સુધી વારંવાર શારીરિક સંબંધ બાંધ્યાનો આક્ષેપ સામે આવ્યો છે. આખરે સગીરાએ હિંમત કરીને પરિવારને સમગ્ર ઘટના જણાવી હતી. ત્યારબાદ યુનિવર્સિટી પોલીસે પોક્સો સહિતની કલમો હેઠળ ગુનો નોંધી વધુ તપાસ શરૂ કરી છે.
પોલીસમાં નોંધાયેલી ફરિયાદ મુજબ, ઘટના ત્રણેક મહિના અગાઉ બની હતી. સગીરા એકલી હતી ત્યારે આરોપી મુરલી આહિર તેની પાસે પહોંચ્યો હતો. તેણે સગીરાનો હાથ પકડી બળજબરીથી પોતાના ઘરે ખેંચી ગયો હતો. ત્યાં તેની ઇચ્છા વિરુદ્ધ શારીરિક અડપલા કર્યા બાદ દુષ્કર્મ આચર્યું હતું. સગીરાએ વિરોધ કરવાનો પ્રયાસ કર્યો હતો, છતાં આરોપીએ તેની એક પણ વાત સાંભળી નહોતી.
પ્રથમ બનાવ બાદ આરોપીએ સગીરાને કોઈને પણ આ અંગે જાણ કરશે તો જાનથી મારી નાખવાની ધમકી આપી હતી. આ ધમકીના કારણે ડરી ગયેલી સગીરા લાંબા સમય સુધી મૌન રહી હતી. આ દરમિયાન આરોપીએ ધાકધમકીના જોરે અનેક વખત તેની સાથે બળજબરીપૂર્વક શારીરિક સંબંધ બાંધ્યાનો આક્ષેપ ફરિયાદમાં કરવામાં આવ્યો છે.
તાજેતરમાં સગીરા સતત ઉદાસ અને ગભરાયેલી રહેતી હોવાનું પરિવારજનોના ધ્યાન પર આવ્યું હતું. પરિવારજનોએ વિશ્વાસમાં લઈ પૂછપરછ કરતાં સગીરાએ પોતાની સાથે થયેલા શોષણની સમગ્ર હકીકત જણાવી હતી. આ સાંભળીને પરિવારજનો સ્તબ્ધ બની ગયા હતા અને તરત જ યુનિવર્સિટી પોલીસનો સંપર્ક કર્યો હતો. પોલીસે સગીરાના પિતાની ફરિયાદના આધારે આરોપી મુરલી આહિર સામે પોક્સો અધિનિયમ તેમજ દુષ્કર્મ સહિતની સંબંધિત કલમો હેઠળ ગુનો નોંધી તેની શોધખોળ અને ઘટનાની વધુ તપાસ હાથ ધરી છે.
