ગુજરાતમાં આપના સોશ્યલ મીડિયા પેજ બ્લોક કરવા મામલે કેન્દ્ર સરકારને નોટીસ
બે અઠવાડીયામાં પોતાનો પક્ષ રજૂ કરવા સુપ્રિમ કોર્ટનો આદેશ : સ્થાનિક સ્વરાજયની ચૂંટણીના એક દિવસ પહેલા એકાઉન્ટસ બ્લોક કર્યા હતા
અગ્ર ગુજરાત, અમદાવાદ
સુપ્રીમ કોર્ટે મંગળવારે આમ આદમી પાર્ટી (AAP) ની ગુજરાત શાખાના ફેસબુક પેજ અને ઈન્સ્ટાગ્રામ હેન્ડલને ફરીથી શરૂ કરવાની વચગાળાની અરજી પર કેન્દ્ર સરકાર પાસેથી જવાબ માંગ્યો છે. જસ્ટિસ પી.એસ. નરસિમ્હા અને જસ્ટિસ આલોક અરાધેની ખંડપીઠે આ સંવેદનશીલ અરજી પર સુનાવણી હાથ ધરીને કેન્દ્ર સરકારને સત્તાવાર નોટિસ પાઠવી છે અને આ મામલે બે અઠવાડિયામાં પોતાનો પક્ષ રજૂ કરવા આદેશ આપ્યો છે.
AAPએ દેશની સર્વોચ્ચ અદાલતમાં ગંભીર આક્ષેપ કર્યો છે કે ગુજરાતમાં સ્થાનિક નિકાય (સ્વરાજ્ય) ની ચૂંટણીના એક દિવસ પહેલા એટલે કે 24 એપ્રિલના રોજ, કોઈપણ પ્રકારની આગોતરી નોટિસ કે સત્તાવાર આદેશ આપ્યા વિના જ તેમના સત્તાવાર સોશિયલ મીડિયા એકાઉન્ટ્સ બ્લોક કરી દેવામાં આવ્યા હતા. ‘આપ’ના વકીલે કોર્ટમાં દલીલ કરી હતી કે આ પ્રકારે આખું પેજ બ્લોક કરી દેવું એ બંધારણ દ્વારા આપવામાં આવેલી રાજકીય અભિવ્યક્તિની સ્વતંત્રતા પર અપ્રમાણસર અને તદ્દન ગેરવાજબી પ્રતિબંધ છે. લોકશાહીમાં ચૂંટણી પ્રક્રિયા દરમિયાન પક્ષને જનતા સુધી પહોંચતા રોકવો એ સમાન તક આપવાના સિદ્ધાંતની વિરુદ્ધ છે.
આ વિવાદિત મામલે સોશિયલ મીડિયા પ્લેટફોર્મની પેરેન્ટ કંપની ‘મેટા’ (Meta) એ અગાઉ સ્પષ્ટતા કરતા જણાવ્યું હતું કે, આ એકાઉન્ટ્સ આઈટી એક્ટ (IT Act) ની કલમ 79(3)(b) હેઠળ સરકારી વિનંતી અને સત્તાવાર નિર્દેશોના આધારે જ પ્રતિબંધિત કરવામાં આવ્યા હતા. કંપનીએ સ્વેચ્છાએ કોઈ પગલાં લીધા નથી પરંતુ સરકારી આદેશનું પાલન કર્યું છે.
આમ આદમી પાર્ટીની મુખ્ય અરજીમાં સરકારની આ બ્લોકિંગ વ્યવસ્થા અને પ્રક્રિયાને જ કાયદાકીય રીતે પડકારવામાં આવી છે. હવે જ્યારે સર્વોચ્ચ અદાલતે આ બાબતને ગંભીરતાથી લઈને કેન્દ્ર પાસે બે સપ્તાહમાં જવાબ માંગ્યો છે, ત્યારે આગામી દિવસોમાં આ મામલે સરકાર શું પક્ષ રજૂ કરે છે તેના પર સૌની નજર રહેશે. સોશિયલ મીડિયા પર સેન્સરશીપ અને રાજકીય પક્ષોના અધિકારો સંદર્ભે આ કેસ ઘણો મહત્વનો સાબિત થઈ શકે છે.
