સ્વામિનારાયણ ગુરુકુલની રથયાત્રામાં ભાવિકો ભક્તિમાં રંગાયા

સ્વામિનારાયણ ગુરુકુલની રથયાત્રામાં ભાવિકો ભક્તિમાં રંગાયા

હિચ રાસ, દાંડિયા રાસ, ખંજરી રાસ અને કરતાલ રાસે આકર્ષણ જગાવ્યું : ફલોટસમાં પર્યાવરણ જાગૃતિ અંગે સંદેશ

અગ્ર ગુજરાત, રાજકોટ

અષાઢી બીજ ના પાવન દિવસે દર વર્ષની પરંપરા મુજબ સ્વામિનારાયણ ગુરુકુલ રાજકોટથી સાંજના 4 વાગ્યે વડીલ સંતો ગુરુ મહારાજ દેવકૃષ્ણદાસ સ્વામી, નારાયણદાસ સ્વામી,  વલ્લભસ્વામી, પૂર્ણપ્રકાશ સ્વામી, હરિપ્રિય સ્વામી, રસિકવલ્લભ સ્વામી, જનમંગલ સ્વામી, વૃંદાવન સ્વામી, ચૈતન્ય સ્વામી વગેરે સંતોના હસ્તે રથયાત્રાનો પ્રસ્થાન કરવામાં આવ્યું.

રાજકોટ શહેરના ધારાસભ્ય રમેશભાઈ ટીલાળા, મેયર નેહલભાઈ શુક્લા, શાસક પક્ષના નેતા હિરેનભાઇ ખીમાણીયા, કોર્પોરેટર કૌશિકભાઈ ટાંક, નાયબ પોલીસ કમિશનર હેતલબેન પટેલ વગેરે મહાનુભાવો રથયાત્રામાં જોડાયા હતાં. ગુરુકુલના સંસ્થાપક શાસ્ત્રીજી મહારાજ ધર્મજીવનદાસજી સ્વામીની ૧૨૫મી જન્મ જયંતી અંતર્ગત ગુરુકુલમાં ભજન ભક્તિથી ઉજવણી કરવામાં આવી હતી.
મુખ્ય રથમાં જગન્નાથજી, સુભદ્રાજી અને બળભદ્રજીને વરસાદના અમીવૃષ્ટિ વચ્ચે ગુરુકુલથી ઢેબર રોડ, નાગરીક બેંક ચોક, ભક્તિનગર સર્કલ, ૮૦ ફૂટ રોડ, શેઠ હાઈસ્કુલ,પારડી રોડ, સહકાર રોડ, ત્રિશુલ ચોક, ગાયત્રીનગર મેઇન રોડ, જલારામ ચોક, ધર્મજીવન મેઇન રોડ વગેરે નગર વિચરણ કરી ગુરુકુલ સમાપન થયું હતું.
૩૦ બાલ સાયકલ સવારો, 30  ઇલેક્ટ્રિક બાઇક, ઇલેક્ટ્રિક કાર, ટ્રેક્ટર વગેરે સાથે આગળ પાછળ કચરો સાફ કરવા વાળા વાહનો જોડાયા હતા.
રથ યાત્રાના રુટના દરેક મુખ્ય ચોક અને પોઈન્ટમાં ભક્તો દ્વારા રથની આરતી ઉતારવામાં આવી હતી. રથયાત્રાના માર્ગમાં ભક્તો દ્વારા પુષ્પપાંદડીથી વધામણી કરવામાં આવી હતી.
યાત્રા દરમિયાન જુદા જુદા પોઇન્ટ ઉપર મગ, ખારીશીંગ, ચોકલેટ, રેવડી વગેરે જુદી જુદી પ્રસાદીઓનું વિતરણ કરવામાં આવ્યું હતું.
કાર્ટૂન કેરેક્ટર ના ગેટઅપમાં  કાર્ટૂને બાળકોનું મનોરંજન કર્યું હતું. વિવિધ રાસ મંડળીઓએ સમગ્ર રથયાત્રામાં ડીજેના સથવારે રાસની રમઝટ બોલાવી હતી તેમજ કિર્તન મંડળીઓએ કીર્તનભક્તિની જમાવટ કરી હતી. ગોવાળિયાના ડ્રેસમાં યુવાનોનો હિચ રાસ, યુવતીઓનો દાંડિયા રાસ અને મહિલા દ્વારા ખંજરી રાસ અને કરતાલ રાસ આકર્ષણનું કેન્દ્ર બન્યો હતો. પદાતી હરિ ભક્તો, મહિલા ભક્તો,બાલ મંડળના બાળકો અને વિદ્યાર્થીઓનો કાફલો પણ રથયાત્રાની સાથે જોડાયો હતો.  આ રથયાત્રામાં આગળ પાછળ સફાઈ વાહનો અને સ્વયં સેવકોની ટીમે કચરો સાફ કરી રથયાત્રાને સ્વચ્છ અને પ્રદૂષણ મુક્ત બનાવી લોક જાગૃતિનો સંદેશ આપ્યો હતો.