વીરપુર પોલીસ વરસાદી આગાહીને પગલે એલર્ટ મોડમાં, પીઆઈ સહિતના જવાનો ખડેપગે
SP વિજયસિંહ ગુર્જરના માર્ગદર્શન હેઠળ વીરપુર પોલીસ તમામ રેસ્ક્યુ સાધનો સાથે એક્શન મોડમાં
અગ્ર ગુજરાત, વિરપુર
હવામાન વિભાગ દ્વારા આગામી બે દિવસ દરમિયાન રાજકોટ જિલ્લામાં ભારેથી અતિભારે વરસાદ પડવાની સંભાવના વ્યક્ત કરવામાં આવી છે. આ આગાહીને પગલે કોઈ પણ પ્રકારની જાનમાલની નુકસાની ન થાય અને કટોકટીના સમયે તાત્કાલિક સહાય પહોંચાડી શકાય તે માટે સમગ્ર વહીવટી તંત્ર અને પોલીસ વિભાગ સતર્ક થઈ ગયું છે. ખાસ કરીને વીરપુર પોલીસ અત્યારથી જ સંપૂર્ણ એક્શન મોડમાં આવી ગઈ છે.
ભારે વરસાદના કારણે જો કોઈ વિસ્તારમાં પાણી ભરાઈ જવાની કે પૂર જેવી સ્થિતિ નિર્માણ પામે, તો લોકોને સુરક્ષિત સ્થળે ખસેડવા માટે વીરપુર પોલીસ ના પીઆઇ એસ.જી.રાઠોડ દ્વારા તમામ આગોતરી તૈયારીઓ કરી લેવામાં આવી છે. પોલીસ સ્ટેશન ખાતે બચાવ કામગીરીમાં ઉપયોગી થાય તેવા તમામ પ્રકારના રેસ્ક્યુ સાધનો (જેવા કે લાઇફ જેકેટ, મજબૂત રસ્સા, ટોર્ચ અને અન્ય સુરક્ષા ઉપકરણો) સજ્જ અને સ્ટેન્ડબાય રાખવામાં આવ્યા છે.
આ સમગ્ર કામગીરી રાજકોટ જિલ્લા પોલીસ વડા વિજયસિંહ ગુર્જરના સીધા માર્ગદર્શન હેઠળ કરવામાં આવી રહી છે. એસપી દ્વારા આપવામાં આવેલી સૂચનાઓનું ચુસ્તપણે પાલન કરીને વીરપુર પોલીસનો સમગ્ર સ્ટાફ અત્યારે ખડેપગે તેનાત છે. કોઈપણ પ્રકારની ઇમરજન્સીને પહોંચી વળવા માટે પોલીસ જવાનોને જરૂરી તાલીમ અને સૂચનો આપી દેવામાં આવ્યા છે. આ ઉપરાંત, નીચાણવાળા વિસ્તારોમાં રહેતા લોકોને પણ પોલીસ દ્વારા સાવચેત રહેવા અને જરૂરી તકેદારી રાખવા અપીલ કરવામાં આવી છે. નાગરિકોની સુરક્ષા સુનિશ્ચિત કરવા વીરપુર પોલીસ સંપૂર્ણપણે કટિબદ્ધ જોવા મળી રહી છે.
