કોઠારિયા સોલ્વન્ટ નજીક 12 હજાર જીલેટીન સ્ટીકનો જથ્થો ઝડપાયો
માણાવદરથી થાનગઢ લઈ જવાતો હતો ગેરકાયદે એક્સપ્લોઝિવનો જથ્થો, એકની ધરપકડ : 1500 કિલો જીલેટીન, 30 બંડલ બ્લાસ્ટિંગ કેબલ અને ડિટોનેટર મળી કુલ રૂ.5.95 લાખનો મુદ્દામાલ કબજે
અગ્ર ગુજરાત, રાજકોટ
રાજકોટ શહેર ક્રાઈમ બ્રાન્ચે ગેરકાયદેસર રીતે હેરાફેરી થઈ રહેલા વિસ્ફોટક સામગ્રીના મોટા જથ્થાનો પર્દાફાશ કરી એક શખ્સને ઝડપી પાડ્યો છે. કોઠારિયા સોલ્વન્ટ નજીક રાજકોટ-ગોંડલ હાઈવે પર શંકાસ્પદ બોલેરો પીકઅપને અટકાવી તપાસ કરતાં તેમાંથી બ્લાસ્ટિંગમાં વપરાતી 12 હજાર જીલેટીન સ્ટીક, બ્લાસ્ટિંગ કેબલના 30 બંડલ તેમજ એક્સપ્લોઝિવ ડિટોનેટરનો જથ્થો મળી આવ્યો હતો. સમગ્ર સામગ્રીની BDS અને FSLની ટીમ દ્વારા તપાસ કરાવ્યા બાદ પોલીસે ડ્રાઈવરની ધરપકડ કરી કુલ રૂ.5.95 લાખનો મુદ્દામાલ કબજે કર્યો છે.
પોલીસ કમિશનર બ્રજેશકુમાર ઝા, એડિશનલ સીપી ચૈતન્ય માંડલીક, ડીસીપી ક્રાઈમ જગદીશ બાંગરવા અને એસીપી ક્રાઈમ બી.બી. બસિયાના માર્ગદર્શન હેઠળ ક્રાઈમ બ્રાન્ચની ટીમ ગેરકાયદે પ્રવૃત્તિઓ પર નજર રાખી પેટ્રોલિંગ કરી રહી હતી. આ દરમિયાન એએસઆઈ અનિલભાઈ સોનારા, કનકસિંહ સોલંકી અને હરપાલસિંહ જાડેજાને ખાનગી રાહે બાતમી મળી હતી કે, શાપર તરફથી એક બોલેરો પીકઅપ રાજકોટ તરફ આવી રહી છે અને તેમાં ગેરકાયદેસર એક્સપ્લોઝિવનો મોટો જથ્થો ભરેલો છે.
બાતમીના આધારે ક્રાઈમ બ્રાન્ચે તાત્કાલિક કોઠારિયા સોલ્વન્ટ વિસ્તારમાં રાજકોટ-ગોંડલ હાઈવે પર શિવ હોટલ સામે જગદીશ મોટર ગેરેજ નજીક વોચ ગોઠવી હતી. દરમિયાન બાતમીમાં જણાવાયેલી બોલેરો પીકઅપ નજરે પડતાં પોલીસે તેને રોકી વાહનની તલાશી લીધી હતી. વાહનમાં રહેલા બાચકાઓની તપાસ કરતાં પોલીસને બ્લાસ્ટિંગમાં ઉપયોગમાં લેવાતી સામગ્રી મળી આવતા સમગ્ર મામલો ગંભીર બન્યો હતો.
પોલીસે બાચકાઓ ખોલાવી તપાસ કરતાં મોટી સંખ્યામાં જીલેટીન સ્ટીક અને બ્લાસ્ટિંગ કેબલ મળી આવ્યા હતા. જ્યારે વાહનની કેબિનમાંથી એક્સપ્લોઝિવ ડિટોનેટર પણ મળી આવ્યો હતો. આ સામગ્રી ખરેખર વિસ્ફોટક પ્રવૃત્તિમાં ઉપયોગી છે કે નહીં તે અંગે BDS તથા FSLની ટીમને સ્થળ પર બોલાવવામાં આવી હતી. નિષ્ણાત ટીમની તપાસ બાદ સામગ્રી એક્સપ્લોઝિવને લગતી હોવાનું સામે આવતા પોલીસે વાહનચાલકને કાયદેસરની કાર્યવાહી હેઠળ ઝડપી લીધો હતો.
પકડાયેલ આરોપીની ઓળખ દોલા રઘુ મીર તરીકે થઈ છે. 34 વર્ષીય દોલા મૂળ સુરેન્દ્રનગર જિલ્લાના ચુડા તાલુકાના છતરીયાળા ગામનો વતની છે અને હાલ કોઠારિયા સોલ્વન્ટ વિસ્તારમાં મેલડીમાંના મંદિર નજીક શીતળાધાર મફતીયાપરામાં રહે છે. તે ડ્રાઈવિંગનો વ્યવસાય કરતો હોવાનું પોલીસ તપાસમાં બહાર આવ્યું છે. ક્રાઈમ બ્રાન્ચે આરોપી પાસેથી કુલ 12 હજાર જીલેટીન સ્ટીક મળી આવી હતી, જેનું વજન આશરે 1500 કિલો હોવાનું સામે આવ્યું છે. જીલેટીન સ્ટીકની કિંમત રૂ.2.40 લાખ આંકવામાં આવી છે. આ ઉપરાંત બ્લાસ્ટિંગ કેબલના 30 બંડલ, અંદાજિત રૂ.15 હજાર કિંમતના, તેમજ એક્સપ્લોઝિવ ડિટોનેટરનો જથ્થો પણ કબજે કરવામાં આવ્યો છે. સાથે બોલેરો પીકઅપ વાહન પણ પોલીસે કબજે કર્યું છે. આમ તમામ મુદ્દામાલની કુલ કિંમત રૂ.5.95 લાખ જેટલી થાય છે.
પ્રાથમિક પૂછપરછ દરમિયાન પોલીસને એક્સપ્લોઝિવના આ જથ્થાની હેરાફેરી અંગે મહત્વની કડી મળી છે. પોલીસના જણાવ્યા મુજબ, દોલા મીરને જામવાડી, થાનગઢના હિરા ઉર્ફે હિરેન વિઠ્ઠલ અલગોતરે એક્સપ્લોઝિવનો માલ લેવા માટે માણાવદર મોકલ્યો હતો. માણાવદર પહોંચ્યા બાદ મિતુલ નામના વેપારીએ તેને આ સામગ્રી ભરી આપી હોવાનો ખુલાસો થયો છે. આ માહિતી સામે આવ્યા બાદ ક્રાઈમ બ્રાન્ચે હિરા ઉર્ફે હિરેન અલગોતર અને માણાવદરના મિતુલ નામના શખ્સને તપાસના ઘેરામાં લીધા છે. બંનેની ભૂમિકા અંગે વધુ વિગતો મેળવવા માટે તેમની શોધખોળ શરૂ કરવામાં આવી છે. આ જથ્થો ક્યાંથી મેળવવામાં આવ્યો હતો, કોને પહોંચાડવાનો હતો અને તેની પાછળ અન્ય કોઈ વ્યક્તિ કે ગેંગ સંકળાયેલી છે કે નહીં તે દિશામાં પણ તપાસ ચાલી રહી છે.
પોલીસના પ્રાથમિક તારણ મુજબ, જીલેટીન સ્ટીક અને અન્ય બ્લાસ્ટિંગ સામગ્રીનો ઉપયોગ સામાન્ય રીતે ખાણકામ, પથ્થર તોડવા તેમજ કૂવા ગાળવા જેવા કામોમાં કરવામાં આવે છે. ખાસ કરીને સુરેન્દ્રનગર સહિતના પંથકોમાં ખાણકામ સાથે સંકળાયેલા તત્વો દ્વારા આવી સામગ્રીનો ઉપયોગ થતો હોવાની માહિતી પોલીસને મળી છે. વિસ્ફોટક સામગ્રીનું ગેરકાયદેસર સંગ્રહ, પરિવહન કે ઉપયોગ ગંભીર જોખમ ઊભું કરી શકે છે. આવી સામગ્રીના બેફામ ઉપયોગથી માનવજીવન ઉપરાંત આસપાસની મિલકતને પણ નુકસાન થવાની સંભાવના રહે છે. આથી ક્રાઈમ બ્રાન્ચે જથ્થો ક્યાંથી આવ્યો અને તેની પાછળ કયા તત્વો સક્રિય છે તે શોધવા તપાસ તેજ કરી છે.
મોટા નેટવર્ક સુધી પહોંચવા તપાસનો ધમધમાટ
એક બોલેરોમાં છુપાવીને લઈ જવાતો 1500 કિલો જીલેટીનનો જથ્થો ઝડપાતા સમગ્ર મામલો માત્ર એક વાહનચાલક સુધી સીમિત ન હોવાનું પોલીસ માની રહી છે. માણાવદરથી માલ ભરાવવાથી લઈને થાનગઢ સુધી પહોંચાડવાની કામગીરીમાં સંકળાયેલા લોકોની કડી જોડવામાં આવી રહી છે. સપ્લાયર અને રીસીવરની ધરપકડ થયા બાદ આ ગેરકાયદે એક્સપ્લોઝિવ નેટવર્ક અંગે વધુ ચોંકાવનારી વિગતો બહાર આવે તેવી શક્યતા છે. હાલમાં ક્રાઈમ બ્રાન્ચે ઝડપાયેલા દોલા મીર સામે કાયદેસરની કાર્યવાહી હાથ ધરી વધુ તપાસ શરૂ કરી છે.
