120 ફૂટ ઊંચા મોબાઇલ ટાવર પર ચડી તસ્કરો 1.20 લાખના રિમોટ રેડિયો યુનિટ ઉઠાવી ગયા
શાપરના ખોડીયારનગરમાં રાત્રિના અંધારામાં ટાવર પર ચઢી કેબલ કાપી ચોરી; સિક્યુરિટી ટીમના ધ્યાને આવતા પોલીસ ફરિયાદ
અગ્ર ગુજરાત, રાજકોટ
શાપર-વેરાવળના ખોડીયારનગર વિસ્તારમાં તસ્કરોએ જાણે ઊંચાઈનો પણ ડર ન હોય તેમ 120 ફૂટ ઊંચા મોબાઇલ ટાવરને નિશાન બનાવી રૂ.1.20 લાખની કિંમતના બે રિમોટ રેડિયો યુનિટ ચોરી લીધા હોવાનો બનાવ સામે આવ્યો છે. તસ્કરોએ ટાવરની ફેન્સિંગ ઓળંગી ઉપર ચઢીને કેબલ કાપી કિંમતી સાધનો કાઢી લીધા હતા. ઘટનાની જાણ થતાં સિક્યુરિટી ટીમ દ્વારા તપાસ શરૂ કરવામાં આવી હતી અને સમગ્ર મામલે પોલીસ ફરિયાદ નોંધાવવામાં આવી છે. પોલીસે ગુનો નોંધી તપાસ આગળ ધપાવતા તસ્કર ટોળકી સુધી પહોંચ્યાનું જાણવા મળે છે.
મળતી વિગતો મુજબ, રાજકોટના જંકશન પ્લોટ વિસ્તારમાં રહેતા દિનેશસિંહ શ્યામસિંહ રાજપૂત આર.એસ. સિક્યુરિટી કંપનીમાં રાજકોટ જિલ્લા ટીમ લીડર તરીકે ફરજ બજાવે છે. ઇન્ડસ કંપની દ્વારા ઉભા કરવામાં આવેલા મોબાઇલ ટાવરોની સુરક્ષા માટે પેટ્રોલિંગની જવાબદારી તેમની ટીમને સોંપવામાં આવી છે. રાજકોટ જિલ્લામાં આવા સાત જેટલા ટાવર તેમના કાર્યક્ષેત્ર હેઠળ આવે છે.
દરમિયાન રાત્રિના સમયે દિનેશસિંહ તેમના ડ્રાઇવર યુવરાજસિંહ રાણા સાથે મોટામવા વિસ્તારમાં પેટ્રોલિંગમાં હતા. ત્યારે રાત્રે આશરે સવા ત્રણ વાગ્યે સિક્યુરિટી ટીમના ટેલિગ્રામ ગ્રુપમાં ચીફ પ્રકાશભાઇ વાળંદનો મેસેજ આવ્યો હતો. મેસેજમાં ટાવર આઇડી IN1269639 પર પહોંચી તપાસ કરવા સૂચના આપવામાં આવી હતી.
આ ટાવર શાપર-વેરાવળના ખોડીયારનગર વિસ્તારમાં આવેલો હોવાથી દિનેશસિંહે તાત્કાલિક સુપરવાઇઝર મહેશકુમાર શ્રીમાળીને ફોન કરી સ્થળ પર પહોંચી તપાસ કરવા જણાવ્યું હતું. સુપરવાઇઝરે ટાવર પર તપાસ કરતાં ગંભીર ચોરીનો ભાંડો ફૂટ્યો હતો.
ટાવર પર વિવિધ ટેલિકોમ કંપનીઓ દ્વારા રિમોટ રેડિયો યુનિટ લગાવવામાં આવેલા હોય છે. આ સાધનો સાથે છેડછાડ થાય અથવા તેને કાઢવામાં આવે તો એલાર્મ સક્રિય થવાની વ્યવસ્થા હોય છે. તેમ છતાં તસ્કરોએ તકેદારીપૂર્વક કેબલ વાયર કાપી નોકિયા કંપનીના બે રિમોટ રેડિયો યુનિટ કાઢી લીધા હતા.
ટાવર પર લગાવેલા બંને યુનિટ ગાયબ હોવાનું ધ્યાનમાં આવતા આસપાસ તપાસ કરવામાં આવી હતી. બાદમાં જાણવા મળ્યું કે તસ્કરો ટાવરની આસપાસની તાર ફેન્સિંગ ઓળંગીને અંદર ઘૂસ્યા હતા અને ત્યારબાદ 120 ફૂટની ઊંચાઇએ ચઢીને ચોરીને અંજામ આપ્યો હતો. ચોરાયેલા બંને યુનિટની કુલ કિંમત અંદાજે રૂ.1.20 લાખ હોવાનું ફરિયાદમાં જણાવાયું છે.
આ અંગે સિક્યુરિટી ટીમના દિનેશસિંહ રાજપૂતે પોલીસ ફરિયાદ નોંધાવતા પોલીસે અજાણ્યા તસ્કરો વિરુદ્ધ ગુનો દાખલ કરી તપાસ શરૂ કરી હતી. ટાવર જેવી ઊંચી અને જોખમી જગ્યાએ ચઢીને ચોરી કરનાર ટોળકી સુધી પોલીસ પહોંચી હોવાનું જાણવા મળ્યું છે. હવે આ ટોળકીએ અન્ય કયા ટાવરોને નિશાન બનાવ્યા છે અને ચોરીનો મુદ્દામાલ ક્યાં ખસેડ્યો છે તે અંગે તપાસ હાથ ધરવામાં આવી રહી છે.
