HPCL ની લાઈનમાં પંચર કરી રાજકોટમાં ઓઈલ વેચવાના કૌભાંડનો પર્દાફાશ
ગુજરાત ATSની મોટી કાર્યવાહી : કુવાડવા પાસેથી ધોરાજીના શખ્સને ઓઈલના નમૂના સાથે ઝડપી લેતાં સમગ્ર નેટવર્ક બહાર આવ્યું
રાજસ્થાનના બાલોત્રા પંથકમાં જમીનમાં 3થી 4 ફૂટ ઊંડે ખાડો ખોદી પાઈપલાઈનમાં વાલ્વ લગાવી ચોરીનું કારસ્તાન આચરાતું હતું : 8 આરોપીઓ ઝડપાયા
અગ્ર ગુજરાત, રાજકોટ
ગુજરાત એટીએસે મોટી કાર્યવાહી કરી રાજસ્થાનમાં એચપીસીએલની ઓઈલ પાઈપલાઈનને ગેરકાયદેસર રીતે પંચર કરી ઓઈલની ચોરી કરી ગુજરાતમાં વેચવાના કૌભાંડનો પર્દાફાશ કર્યો છે. એટીએસની ટીમે અમદાવાદ-રાજકોટ હાઈવે પર કુવાડવા નજીકથી ધોરાજીના એક શખ્સને ઓઈલના નમૂના સાથે ઝડપી પાડ્યા બાદ તેની પૂછપરછમાં રાજસ્થાનના બાલોત્રા જિલ્લામાં ચાલતા ઓઈલ ચોરીના સમગ્ર નેટવર્કની વિગતો બહાર આવી હતી. ત્યારબાદ રાજસ્થાન પહોંચેલી એટીએસની ટીમે વધુ સાત શખ્સોને ઝડપી લેતાં કુલ આઠ આરોપીઓની ધરપકડ કરવામાં આવી છે. આ ટોળકી દ્વારા બાલોત્રા જિલ્લાના કાલુડી ગામની સીમમાં ખરાબાની જમીનમાંથી પસાર થતી એચપીસીએલની પાઈપલાઈનને નિશાન બનાવવામાં આવી હતી અને કોઈને શંકા ન જાય તે રીતે જમીનમાં ત્રણથી ચાર ફૂટ ઊંડો ખાડો ખોદી પાઈપલાઈનમાં ગેરકાયદેસર રીતે પંચર કરી વાલ્વ લગાવવામાં આવ્યો હતો. આ વાલ્વ મારફતે પાઈપલાઈનમાં વહેતું ઓઈલ બહાર કાઢી જથ્થો એકત્ર કરી ત્યારબાદ ગુજરાત તરફ મોકલવામાં આવતો હોવાનું તપાસમાં સામે આવ્યું છે.
ગુજરાત એટીએસ દ્વારા દેશભરમાં સક્રિય ઓર્ગેનાઈઝ્ડ ક્રાઈમ નેટવર્ક પર સતત નજર રાખવામાં આવી રહી છે. આ દરમિયાન એટીએસના ડીવાયએસપી એસ.એલ. ચૌધરીને બાતમી મળી હતી કે ગુજરાત અને રાજસ્થાનના કેટલાક શખ્સો ભેગા મળી બાલોત્રા જિલ્લામાંથી પસાર થતી એચપીસીએલની પાઈપલાઈનમાં ગેરકાયદેસર રીતે પંચર કરી ઓઈલની ચોરી કરી રહ્યા છે અને આ ચોરીનું ઓઈલ ગુજરાતમાં અમદાવાદ-રાજકોટ હાઈવે પર વેચવાનું કાવતરું ઘડવામાં આવ્યું છે. બાતમી મળતાં એટીએસના વરિષ્ઠ અધિકારીઓને જાણ કરવામાં આવી હતી અને એસપી કે. સિદ્ધાર્થના માર્ગદર્શન હેઠળ ડીવાયએસપી એસ.એલ. ચૌધરીની રાહબરીમાં પીઆઈ જે.ડી. બારોટ, પીએસઆઈ બી.બી. પરમાર સહિતની ટીમે તપાસ શરૂ કરી હતી.
તપાસ દરમિયાન એટીએસની ટીમે અમદાવાદ-રાજકોટ હાઈવે પર કુવાડવા નજીક સોખડા ગામ તરફ જવાના રસ્તે વોચ ગોઠવી હતી. આ દરમિયાન એક શખ્સ શંકાસ્પદ રીતે ઓઈલનો જથ્થો લઈને પહોંચતા તેને અટકાવી પૂછપરછ કરવામાં આવી હતી. ઓઈલ અંગે પૂછતાં તેણે આ જથ્થો રાજસ્થાનના બાલોત્રા જિલ્લાના કાલુડી ગામ ખાતેથી લાવવામાં આવ્યો હોવાનું જણાવ્યું હતું. આ જવાબ મળતાં જ એટીએસની શંકા વધુ મજબૂત બની હતી અને તેની સઘન પૂછપરછ શરૂ કરવામાં આવી હતી. પૂછપરછમાં રાજસ્થાનમાં ઓઈલ ચોરી કરતી ગેંગ અંગેની મહત્વની વિગતો મળતાં એટીએસની ટીમે તાત્કાલિક રાજસ્થાન તરફ તપાસ લંબાવી હતી.
રાજસ્થાનના ટાપરા નજીક આવેલા ઢાબા પરથી આ કાવતરામાં સંડોવાયેલા વધુ સાત શખ્સોને ઝડપી લેવામાં આવ્યા હતા. તમામ આરોપીઓને જાસોલ પોલીસ મથકે લઈ જઈ પૂછપરછ કરતાં ઓઈલ ચોરીની મોડસ ઓપરેન્ડી બહાર આવી હતી. આરોપીઓએ બાલોત્રા જિલ્લાના પરપાદર તાલુકાના કાલુડી ગામની સીમમાં આવેલી ખરાબાની જમીનમાં પાઈપલાઈન શોધી કાઢી હતી. ત્યારબાદ જમીનમાં ત્રણથી ચાર ફૂટ ઊંડો ખાડો ખોદી પાઈપલાઈન સુધી પહોંચવામાં આવી હતી. પાઈપલાઈનમાં ગેરકાયદેસર રીતે પંચર કરી તેમાં વાલ્વ ફિટ કરવામાં આવ્યો હતો. આ સમગ્ર વ્યવસ્થા જમીનની અંદર છુપાવી દેવામાં આવી હતી જેથી ઉપરથી જોનાર વ્યક્તિને કોઈ શંકા ન જાય. વાલ્વ મારફતે ઓઈલ બહાર કાઢી તેને એકત્ર કરવામાં આવતું અને ત્યારબાદ ગુજરાતમાં લાવી વેચાણ કરવાની વ્યવસ્થા ગોઠવવામાં આવી હતી.
એટીએસની ટીમે રાજસ્થાન પોલીસ તથા એચપીસીએલના અધિકારીઓને સાથે રાખીને કાલુડી ગામની સીમમાં સ્થળ તપાસ હાથ ધરતાં જમીનની અંદર ત્રણથી ચાર ફૂટ ઊંડે ખાડામાં પાઈપલાઈન સાથે ચેડાં કરાયેલા મળી આવ્યા હતા. પાઈપલાઈનમાં ગેરકાયદેસર રીતે પંચર કરી વાલ્વ લગાવવામાં આવ્યો હોવાનું પણ સામે આવ્યું હતું. આ રીતે ઓઈલ ચોરી માટેનું ગુપ્ત કનેક્શન તૈયાર કરવામાં આવ્યું હોવાનું તપાસમાં ખુલ્યું હતું.
આ સમગ્ર કૌભાંડમાં ધોરાજીના જયરાજસિંહ ચુડાસમાની ભૂમિકા પણ સામે આવી છે. પોલીસ સૂત્રોના જણાવ્યા મુજબ જયરાજસિંહનો ઓઈલ ચોરી કરતી ગેંગ સાથે સંપર્ક થયો હતો અને ગેંગ પાસેથી ઓઈલનો નમૂનો મંગાવવામાં આવ્યો હતો. ગેંગના માણસો ચોરીનું ઓઈલ લઈને નમૂનો આપવા કુવાડવા પહોંચ્યા હતા અને જયરાજસિંહ પણ આ ઓઈલનો નમૂનો લેવા માટે કુવાડવા આવ્યો હતો. જોકે, નમૂનો લે તે પહેલાં જ એટીએસની ટીમે તેને ઝડપી લીધો હતો. તેની પૂછપરછ બાદ રાજસ્થાનમાં ચાલતા કૌભાંડની કડીઓ એક પછી એક જોડાતી ગઈ હતી.
આ મામલે રાજસ્થાનના જાસોલ પોલીસ મથકે પેટ્રોલિયમ અને મિનરલ પાઈપલાઈન્સ સંબંધિત કાયદા તેમજ પ્રિવેન્શન ઓફ ડેમેજ ટુ પબ્લિક પ્રોપર્ટી એક્ટ હેઠળ ગુનો નોંધવામાં આવ્યો છે. કેસમાં ઘનશ્યામ નવિનચંદ્ર સોની (ઉ.વ.54, નાગલપુર, મહેસાણા), જયરાજસિંહ ભરતસિંહ ચુડાસમા (ઉ.વ.34, ધોરાજી), મુકેશકુમાર શંકરલાલ મેઘવાલ (ઉ.વ.44, જસવંતપુરા, જાલોર, હાલ બાપુનગર, અમદાવાદ), રણજિત રામધની ચોરસિયા (ઉ.વ.48, કલોલ), રમેશ પ્રહલાદજી ઠાકુર (ઉ.વ.41, ચાલાસણ, મહેસાણા), સુરેજી ભોપાજી ઠાકુર (ઉ.વ.32, જોટાણા, મહેસાણા), મહેશ બાબુજી ઠાકુર (ઉ.વ.32, ચાલાસણ, મહેસાણા) અને દિલિપ ઓમપ્રકાશ યાદવ (ઉ.વ.35, અસપુર, ઇટાવા, ઉત્તરપ્રદેશ)ની ધરપકડ કરવામાં આવી છે.
હાલ એટીએસ અને રાજસ્થાન પોલીસ દ્વારા આ કૌભાંડની વધુ તપાસ હાથ ધરવામાં આવી છે. ચોરીનું ઓઈલ અત્યાર સુધીમાં કેટલા જથ્થામાં કાઢવામાં આવ્યું હતું, ગુજરાતમાં કોને વેચવામાં આવતું હતું, સમગ્ર નેટવર્કમાં કેટલા લોકો સંડોવાયેલા છે અને આ કૌભાંડ પાછળ મુખ્ય સૂત્રધાર કોણ છે તે સહિતના મુદ્દે તપાસનો ધમધમાટ શરૂ કરવામાં આવ્યો છે. પોલીસે આ કેસમાં સંડોવાયેલા અન્ય શખ્સોની શોધખોળ પણ શરૂ કરી છે.
