માતાજીના માંડવેથી પરત ફરતી વેળાએ પુત્રના બાઇક પરથી પટકાતાં મહિલાનું મોત
માર્કેટ યાર્ડ પાસે સ્પીડબ્રેકર પર બાઇક ઉછળતાં પાછળ બેઠેલાં 60 વર્ષીય માતા રોડ પર પટકાયાં
અગ્ર ગુજરાત, રાજકોટ
ધાર્મિક પ્રસંગમાં માતાજીનાં દર્શન કરીને પુત્ર સાથે ઘરે પરત ફરી રહેલાં જેતપુરનાં 60 વર્ષીય વૃદ્ધાને રસ્તામાં કાળ ભરખી ગયો હતો. જેતપુર માર્કેટ યાર્ડ નજીક સ્પીડબ્રેકર પરથી બાઇક ઉછળતાં પાછળ બેઠેલાં કમળાબેન રમણીકભાઇ સરવૈયા રોડ પર પટકાયાં હતાં. માથામાં ગંભીર ઇજા થતાં તેમને તાત્કાલિક રાજકોટ સિવિલ હોસ્પિટલમાં સારવાર માટે ખસેડવામાં આવ્યાં હતાં, જ્યાં સારવાર દરમિયાન તેમનું મોત નીપજતાં પરિવારમાં શોકની લાગણી છવાઇ ગઇ હતી.
મળતી માહિતી મુજબ, જેતપુરમાં ધોરાજી રોડ પર અંકુર સ્કૂલ પાસે રહેતાં કમળાબેન રમણીકભાઇ સરવૈયા (ઉ.વ. 60) ગત રાત્રે પોતાના પુત્ર અનિલભાઇ રમણીકભાઇ સરવૈયા (ઉ.વ. 37) સાથે બાઇક પર ધોરાજીના જાલણસર ગામે ગયાં હતાં. ત્યાં રહેતી તેમની પુત્રી હેતલબેન વિમલભાઇ ગોહેલના ઘરે શ્રીચામુંડા માતાજીનો માંડવો હોવાથી માતા-પુત્ર ધાર્મિક પ્રસંગમાં હાજરી આપવા અને માતાજીનાં દર્શન કરવા ગયાં હતાં. ધાર્મિક પ્રસંગ પૂર્ણ થયા બાદ બંને બાઇક પર જેતપુર પરત ફરી રહ્યાં હતાં. દરમિયાન જેતપુર માર્કેટ યાર્ડ નજીક પહોંચતાં બાઇક સ્પીડબ્રેકર પરથી ઉછળ્યું હતું. આ સમયે પાછળ બેઠેલાં કમળાબેન કાબૂ ગુમાવી રોડ પર પટકાતાં તેમના માથામાં ગંભીર ઇજા પહોંચી હતી.
અકસ્મિક રીતે બનેલી આ ઘટનાને પગલે તેમને તાત્કાલિક સારવાર માટે રાજકોટ સિવિલ હોસ્પિટલમાં ખસેડવામાં આવ્યાં હતાં, પરંતુ સારવાર દરમિયાન તેમનું મોત નીપજ્યું હતું. બનાવ અંગે હોસ્પિટલ ચોકીના સ્ટાફે જેતપુર સીટી પોલીસને જાણ કરતાં પોલીસ રાજકોટ પહોંચી હતી અને જરૂરી કાર્યવાહી હાથ ધરી મૃતદેહનું પોસ્ટમોર્ટમ કરાવ્યું હતું. મૃતક કમળાબેનને સંતાનમાં બે પુત્ર અને એક પુત્રી છે. તેમના પતિ અને પુત્ર સાડી પ્રિન્ટિંગના કારખાનામાં મજૂરી કરીને પરિવારનું ગુજરાન ચલાવે છે. માતાજીના માંડવામાં દર્શન કરીને પરત ફરતી વખતે બનેલી આ દુર્ઘટનામાં કમળાબેનનું મોત થતાં પરિવારે માતાની છત્રછાયા ગુમાવી છે અને પરિવારમાં શોકનું મોજું ફરી વળ્યું છે.
