ઉનાના ચીખલી ગામે પેટ્રોલના કેનમાં બ્લાસ્ટ, પરિવારના ચાર સભ્યો દાઝ્યા

ઉનાના ચીખલી ગામે પેટ્રોલના કેનમાં બ્લાસ્ટ, પરિવારના ચાર સભ્યો દાઝ્યા

પુત્રને બચાવવા પિતા આગમાં ઘૂસ્યા, માતાએ પણ જીવની પરવા કર્યા વિના આગમાં ઝંપલાવ્યું; પિતા-2 વર્ષના પુત્રની હાલત ગંભીર, ભાવનગર ખસેડાયા : ઘરની ઓસરીમાં બાઈકમાં પેટ્રોલ ભરતી વખતે દીવામાં આગ લાગ્યા બાદ કેનમાં થયો બ્લાસ્ટ ઘરવખરીને પણ ભારે નુકસાન

અગ્ર ગુજરાત, ઉના

ગીર સોમનાથ જિલ્લાના ઉના તાલુકાના ચીખલી ગામે પેટ્રોલના કેનમાં થયેલા ભયાનક બ્લાસ્ટની ઘટનાએ સમગ્ર પંથકમાં અરેરાટી ફેલાવી દીધી છે. ઘરની ઓસરીમાં બાઈકમાં પેટ્રોલ ભરવાની કામગીરી દરમિયાન અચાનક આગ લાગ્યા બાદ પેટ્રોલ ભરેલા કેનમાં વિસ્ફોટ થયો હતો. આ દુર્ઘટનામાં એક જ પરિવારના ચાર સભ્યો દાઝી જતાં તેમને તાત્કાલિક સારવાર માટે ઉના સરકારી હોસ્પિટલમાં ખસેડવામાં આવ્યા હતા. જેમાં પિતા દિનેશભાઈ ઉર્ફે બિજલભાઈ ચોહાણ અને માત્ર બે વર્ષના માસૂમ પુત્ર દક્ષની હાલત ગંભીર હોવાથી બંનેને વધુ સારવાર માટે ભાવનગર રિફર કરવામાં આવ્યા છે. જ્યારે માતા સમજુબેન અને 14 વર્ષની પુત્રી દર્શનાબેન ઉના સરકારી હોસ્પિટલમાં સારવાર હેઠળ છે.

પ્રાપ્ત વિગતો અનુસાર, ચીખલી ગામે રહેતા દિનેશભાઈ ઉર્ફે બિજલભાઈ ચોહાણની 14 વર્ષીય પુત્રી દર્શનાબેન ઘરની ઓસરીમાં બાઈકમાં પેટ્રોલ ભરી રહી હતી. આ સમયે ઘરની ઓસરીમાં દિવાળીનો દીવો તેમજ અન્ય કેટલીક વસ્તુઓ પણ રાખવામાં આવી હતી. પેટ્રોલ ભરતી વખતે પેટ્રોલનો છંટકાવ નજીકમાં રહેલા દીવા પર થતાં અચાનક આગ લાગી હતી. આગ લાગતાં જ દર્શનાબેન ગભરાઈને ત્યાંથી બહાર નીકળી ગઈ હતી, પરંતુ નજીકમાં જ આશરે 20 લીટર પેટ્રોલ ભરેલો કેન રાખવામાં આવ્યો હોવાથી આગ વધુ ભયાનક બની હતી.

આગની જ્વાળાઓ પેટ્રોલના કેન સુધી પહોંચતાં જ જોરદાર ધડાકા સાથે કેનમાં બ્લાસ્ટ થયો હતો. વિસ્ફોટ બાદ આગે વિકરાળ સ્વરૂપ ધારણ કર્યું હતું અને ઘરના રૂમ સુધી પ્રસરી ગઈ હતી. આ સમયે રૂમમાં બેઠેલો માત્ર બે વર્ષનો માસૂમ દક્ષ આગની લપેટમાં આવી જતાં ગંભીર રીતે દાઝી ગયો હતો. આગની જ્વાળાઓ અને બ્લાસ્ટના કારણે ઘરમાં અફરાતફરીનો માહોલ સર્જાયો હતો.

દરમિયાન, ઘટનાની જાણ થતાં દુકાનેથી દિનેશભાઈ તાત્કાલિક ઘરે દોડી આવ્યા હતા. પોતાના કાળજાના કટકા સમાન પુત્રને આગની લપેટમાં સપડાયેલો જોઈ તેઓ પુત્રને બચાવવા માટે જીવના જોખમે આગથી ઘેરાયેલા રૂમમાં ઘૂસી ગયા હતા અને દક્ષને બહાર કાઢ્યો હતો. પુત્રને બચાવવા માતા સમજુબેન પણ આગની વચ્ચે પહોંચી ગયાં હતાં. આ બચાવની જહેમતમાં પરિવારના ચારેય સભ્યો આગની ઝપેટમાં આવી જતાં દાઝી ગયા હતા.

ઘટનાની જાણ થતાં જ આસપાસના લોકો દોડી આવ્યા હતા અને તાત્કાલિક બચાવ કામગીરી હાથ ધરી હતી. પરિવારના ચારેય ઈજાગ્રસ્તોને સારવાર માટે ઉના સરકારી હોસ્પિટલમાં ખસેડવામાં આવ્યા હતા. જ્યાં ફરજ પરના તબીબોએ પ્રાથમિક સારવાર શરૂ કરી હતી. જોકે, દિનેશભાઈ અને તેમના બે વર્ષના પુત્ર દક્ષની દાઝી જવાની ગંભીર સ્થિતિને ધ્યાનમાં રાખીને વધુ સઘન સારવારની જરૂરિયાત હોવાથી બંનેને ભાવનગર હોસ્પિટલમાં ખસેડવામાં આવ્યા હતા. જ્યારે સમજુબેન અને દર્શનાબેનની ઉના સરકારી હોસ્પિટલમાં સારવાર ચાલી રહી છે.

પેટ્રોલના કેનમાં થયેલા વિસ્ફોટ અને ત્યારબાદ લાગેલી આગના કારણે ઘરના રૂમમાં આગ પ્રસરી જતાં મોટાભાગની ઘરવખરીને નુકસાન પહોંચ્યું હતું. અચાનક બનેલી આ ઘટનાથી પરિવારનું ઘર પણ આગની ઝપેટમાં આવી ગયું હતું. એક તરફ પરિવારના ચાર સભ્યો દાઝી જતાં ચિંતાનું વાતાવરણ સર્જાયું હતું, તો બીજી તરફ ઘરવખરીને થયેલા નુકસાનથી પરિવાર પર આફતનો પહાડ તૂટી પડ્યો હતો.

ચીખલી ગામે બનેલી આ કરુણ ઘટનાની જાણ થતાં જિલ્લા પંચાયતના સભ્ય, પ્રતિનિધિ ધીરુભાઈ સોલંકી, ગામના સરપંચ તેમજ સ્થાનિક આગેવાનો તાત્કાલિક ઘટનાસ્થળે દોડી ગયા હતા. તેમણે સમગ્ર ઘટનાની વિગતો મેળવી ઈજાગ્રસ્તોને સમયસર સારવાર મળે તે માટે જરૂરી વ્યવસ્થા કરવામાં સહયોગ આપ્યો હતો.

પેટ્રોલ જેવા અત્યંત જ્વલનશીલ પદાર્થનો રહેણાક મકાનમાં સંગ્રહ અને નજીકમાં ખુલ્લી આગ હોવાના જોખમ વચ્ચે બનેલી આ દુર્ઘટનાએ ગંભીર સવાલો ઊભા કર્યા છે. ખાસ કરીને દિવાળીના દીવા અને પેટ્રોલ જેવા જ્વલનશીલ પદાર્થને નજીક રાખવાથી કેટલી મોટી દુર્ઘટના સર્જાઈ શકે છે તેનો ચીખલીની આ ઘટનાએ ચેતવણીરૂપ દાખલો પૂરો પાડ્યો છે.

એક જ પરિવારના ચાર સભ્યો દાઝવાની આ ઘટનાથી ચીખલી ગામ સહિત સમગ્ર ઉના પંથકમાં શોક અને ચિંતાની લાગણી પ્રસરી છે. ખાસ કરીને બે વર્ષના માસૂમ દક્ષની ગંભીર હાલતને લઈને પરિવારજનો અને ગ્રામજનો ચિંતિત બન્યા છે.