ગાંઠીયા, ભજીયા, સમોસાથી વિમુખ થઇ કઠોળ, શાકભાજી અને વિવિધ પૌષ્ટિક પાકો તરફ વળ્યા : રેસકોર્ષ રીંગરોડ પર મોર્નિંગ વોક અને કસરતથી તંદુરસ્તી જાળવવા લોકો ઉમટી પડે છ

અગ્ર ગુજરાત, રાજકોટ : યશ ભટ્ટ
સૌરાષ્ટ્રમાં ગુલાબી ઠંડીની શરૂઆત સાથે જ મોર્નિંગ વોક અને એકસરસાઇઝ કરીને લાઇફ લાઇન લંબાવવા નાના-મોટા સર્તક થઇ ગયા છે. છેલ્લા કેટલાક સમયથી હાર્ટ એટેકના કારણે થતાં મોતના પગલે લોકોએ જીવન શૈલી પણ બદલી છે. અગાઉ જયાં ગાંઠીયા, ભજીયા, સમોસાની જયાફત ઉડતી તે રેસકોર્ષ રીંગરોડ પર મોર્નિંગ વોકમાં નીકળેલા લોકો આજે ફણગાવેલા કઠોળ, શાકભાજીના શુપ, ઘંઉના જવારાનું જયુશ વિગેરે તરફ વળ્યા છે.
રાજકોટમાં વહેલી સવાથી જ કઠોળની દુકાનો પર લાંબી લાઈનો જોવા મળે છે. સવારથી બાળકો, યુવાનો અને વૃધ્ધો સવારથી કસરત સાથે પૌષ્ટિક શુપ, જયુશ, કઠોળ વિગેરે તરફ વળ્યા છે. શિયાળામાં શાકભાજી પણ તાજા મળતાં હોય લોકો તંદુરસ્તી જાળવવા લીલી હળદર, આદુ, બીટ, વિવિધ ભાજીઓ આરોગીને ફાસ્ટફૂડ તરફથી વિમુખ થઇ રહ્યાં છે.
આ ઉપરાંત શિયાળાની શરૂઆત સાથે જ રાજકોટના પ્રખ્યાત સીંગપાક, દાળીયાપાક, ખજૂરપાક, તલપાક, સૂકામેવા પાક, સાની વિગેરે અને વસાણા બનાવવાની મૌસમ પણ ધીમે-ધીમે ‘મોશન’ પકડી રહી છે. ધીમે-ધીમે તૈલી પદાર્થો છોડી અને શરીરને તંદુરસ્તમય અને સ્ફૂર્તી મય રાખે તેવા ખોરાક તરફ લોકોનું આકર્ષણ વધ્યું છે.
રાજકોટના રેસકોર્સ પર શિયાળાની સવાર એક ઉત્સવ જેવી બની જાય છે. નાના-મોટા રંગબેરંગી ગરમ વસ્ત્રોમાં વોકિંગ કરતાં તો રેસકોર્ષ મેદાનમાં તેમજ સ્ટેડિયમમાં એકસરસાઇઝ કરતાં જોવા મળે છે. નાના બાળકો રેસકોર્ષ રીંગરોડ પર સ્કેટીંગની મજા માણે છે.
ગ્લોબલ વોર્મિંગના કારણે એકાએક બદલાઇ જતી મૌસમ વચ્ચે પણ ઠંડીના જે કંઇ દિવસો મળે છે તેમાં રાજકોટવાસીઓ તેમના મીજાજ મુજબ માણી લેતા હોય છે.