- પોસ્ટર દ્વારા હેરિટેજ સીટીનો દરજ્જો દર્શાવ્યો
- રોડ-શોમાં ભીડ ન થાય તે માટે રોડને કોર્ડન કરાયા
- કલાકારો દ્વારા સ્ટેજ પર્ફોર્મન્સ રજૂ કરવામાં આવશે
અમદાવાદ મ્યુનિસિપલ કોર્પોરેશને વાયબ્રન્ટ ગુજરાત ગ્લોબલ સમિટ 2024ની તૈયારી કરી લીધી છે. અમદાવાદ મ્યુનિસિપલ કોર્પોરેશન પણ વાયબ્રન્ટ મોડમાં આવી ગયુ છે અને વડાપ્રધાન નરેન્દ્ર મોદીના ભવ્ય રોડ-શોની તડામાર તૈયારીઓને આખરી ઓપ આપી દીધો છે. એએમસીએ વડાપ્રધાન મોદીના રોડ શોના વિવિધ માર્ગો પર સફાઈથી લઈને શણગાર સુધી કોઈ કચાશ ન રહી જાય તેવી તૈયારીઓ કરી લીધી છે.
ગુજરાતની અસ્મિતાની ઝાંખી કરાવાશે
મ્યુનિસિપલ કોર્પોરેશને વડાપ્રધાન નરેન્દ્ર મોદી અને યુએઈના પ્રેસિડેન્ટના રોડ શોને લઈને એરપોર્ટ થી ગાંધીનર સુધીના માર્ગો ઉપર ગુજરાતની સંસ્કૃતિ, અસ્મિતા અને ભવ્યતાની ઝાંખી કરાવતા બેનરો, પોસ્ટરો વિવિધ સ્થળો પર લગાવી દીધા છે અને માર્ગો પર નાના નાના સ્ટેજ બનાવ્યા છે જેમાં વિવિધ કલાકારો દ્વારા ગુજરાતી ગરબા અને કલા સંસ્કૃતિ વારસાનો ઉજગર કરતાં સ્ટેજ પર્ફોર્મન્સ કરવામાં આવશે.
વર્લ્ડ હેરિટેજ સિટી અમદાવાદ
અમદાવાદ મ્યુનિસિપલ કોર્પોરેશને અમદાવાદમાં વિવિધ માર્ગો અને જગ્યાઓ પર હેરિટેજના બેનરો અને પોસ્ટરો લગાવ્યાં છે. તાજેતરમાં જ અમદાવાદને જુલાઈ 2017 માં યુનેસ્કો દ્વારા વર્લ્ડ હેરિટેજ સિટીનો દરજ્જો મળ્યો છે. ત્યારે અમદાવાદ હવે વૈશ્વિક ફલક પર પણ છવાઈ ગયું છે અને ભારતનું પ્રથમ યુનેસ્કો વર્લ્ડ હેરિટેજ 2022 શહેર અમદાવાદને હવે ટાઈમ મેગેઝિન દ્વારા 2022 ના વિશ્વના 50 સૌથી મહાન સ્થળોની યાદીમાં સામેલ કરવામાં આવ્યું છે.
રોડની બંને સાઈડ બેરિકેટ્સ મુકાયા
વાયબ્રન્ટ ગુજરાત ગ્લોબલ સમિટને લઈને અમદાવાદ મ્યુનિસિપલ કોર્પોરેશન દ્વારા વડાપ્રધાન નરેન્દ્ર મોદીના ભવ્ય રોડ-શો ને લઈને રસ્તા ઉપર જાહેર જનતાની ભીડ ન થાય તેથી રોડની બંને સાઈડ પર બેરીકેટ્સથી રસ્તાઓને કોર્ડન કરવામાં આવ્યાં છે. અમદાવાદ એરપોર્ટથી લઈને ગાંધીનગર સુધીના રોડને આજે બપોરે બે વાગ્યા બાદ જાહેર જનતા માટે બંધ કરવામાં આવશે.
