બોલીવુડમાં આવ્યાના 65 વર્ષ બાદ ધર્મેન્દ્રએ બદલ્યું પોતાનું નામ

• શાહિદ-કૃતિની ‘તેરી બાતોં મેં ઐસા ઉલઝા જિયા’ ફિલ્મ રીલીઝ
• ફિલ્મમાં શાહિદ-કૃતિની સાથે સાથે જોવા મળશે ગરમ-ધરમ
• ધરમપાજીને તેમના બાળપણના નામ સાથે અપાઈ છે ક્રેડિટ 

શાહિદ કપૂર અને કૃતિ સેનન સ્ટારર ફિલ્મ તેરી બાતોં મેં ઐસા ઉલઝા જિયા આખરે આજે થિયેટર્સમાં રિલીઝ થઈ ગઈ છે. ફિલ્મને લઈને ફેન્સમાં ગજબની એક્સાઈટમેન્ટ જોવા મળી રહી છે. સોશિયલ મીડિયાથી લઈને ક્રિટીક્સ સુધી ફિલ્મને સારા રિવ્યુ મળી રહ્યા છે. આ ફિલ્મમાં શાહિદ અને કૃતિ ઉપરાંત બોલિવૂડના હિમેન ધર્મેન્દ્ર પણ જોવા મળશે. પરંતુ આ ફિલ્મમાં ધરમપાજીને ધર્મેન્દ્ર નહીં પરંતુ અન્ય કોઈ નામથી ક્રેડિટ આપવામાં આવી છે.

ધરમપાજીએ બદલ્યું નામ

જી હા, બોલિવૂડમાં એન્ટ્રી કર્યાના 64 વર્ષ બાદ ધર્મેન્દ્રએ પોતાનું નામ બદલી નાખ્યું છે. તેમણે પોતાનું નામ બદલ્યું છે અને આ ફિલ્મમાં તેમના નવા નામનો જ ઉલ્લેખ કરવામાં આવ્યો છે. મીડિયા અહેવાલ અનુસાર, શાહિદ કપૂર અને કૃતિ સેનનની ફિલ્મ તેરી બાતોં મેં ઐસા ઉલઝા જિયામાં ધરમપાજીને ધર્મેન્દ્ર સિંહ દેઓલના નામે ક્રેડિટ આપવામાં આવી છે. જણાવી દઈએ કે ધર્મેન્દ્રનું બાળપણનું નામ ધરમ સિંહ દેઓલ હતું. જો કે, હજુ સુધી ધર્મેન્દ્રએ પોતે આની જાહેરાત કરી નથી અને ન તો તેમણે ક્યાંય પોતાનું નામ બદલ્યું છે.

આ પહેલા ધર્મેન્દ્ર પોતાના નામની આગળ કે પાછળ ક્યારેય કોઈ સરનેમ નહોતા લગાવતા. જણાવી દઈએ કે તેરી બાત મેં ઐસા ઉલઝા જિયામાં ધર્મેન્દ્ર શાહિદ કપૂરના દાદાની ભૂમિકામાં જોવા મળ્યા છે. આ ફિલ્મમાં તેમનો એક નાનો રોલ છે.

તેરી બાત મેં ઐસા ઉલઝા જિયાની વાર્તા

ફિલ્મની સ્ટોરી અંગે વાત કરીએ તો આ એક સાય-ફાઇ ફિલ્મ છે. તેમાં શાહિદ કપૂર અને કૃતિ સેનન મુખ્ય ભૂમિકામાં છે. ફિલ્મમાં કૃતિ એક રોબોટ છે, જ્યારે શાહિદ એક સામાન્ય માણસ છે અને કૃતિના પ્રેમમાં પડે છે. આ ફિલ્મ આ બંનેની લવ સ્ટોરી પર આધારિત છે. ફિલ્મની વાર્તા એકદમ અનોખી છે જે દર્શકોને પસંદ આવી રહી છે. આટલું જ નહીં, ફિલ્મના ગીતો પણ ફેન્સની ફેવરેટ લિસ્ટમાં આવી ગયા છે.