- લોકસભામાં વડાપ્રધાન નરેન્દ્ર મોદીનું સંબોધન
- આજનો દિવસ ખૂબ જ મહત્ત્વપૂર્ણઃ PM મોદી
- દેશ 17મી લોકસભાને આર્શીવાદ આપતો રહેશેઃ PM
આજે સંસદના શિયાળુ સત્રનો અંતિમ દિવસ છે. ત્યારે આજે અયોધ્યા રામમંદિરને લઈને આભાર પ્રસ્તાવ રજૂ કરવામાં આવ્યું હતું. ત્યારે હવે વડાપ્રધાન નરેન્દ્ર મોદી લોકસભામાં સંબોધન કરી રહ્યા છે. વડાપ્રધાન મોદીએ કહ્યું કે આજનો દિવસ ખૂબ જ મહત્વનો છે. સમગ્ર દેશ 17મી લોકસભાને આશીર્વાદ આપતો રહેશે.
દેશ 17મી લોકસભાને આશીર્વાદ આપતો રહેશે
પીએમ મોદીએ કહ્યું કે પાંચ વર્ષમાં દેશમાં રીફોર્મ પરફોર્મ અને ટ્રાન્સફૉર્મના રહ્યા. ઘણી ઓછી વાર એવું થાય છે કે સુધારા આવે છે, કામ થાય છે, અને આપણે પરિવર્તનને આપની આંખો સામે જોઈ રહ્યા છીએ. આજે 17મી લોકસભા દ્વારા દેશ પરિવર્તનનો અનુભવ કરી રહ્યો છે અને મને વિશ્વાસ છે કે દેશ 17મી લોકસભાને આશીર્વાદ આપતો રહેશે. પીએમ મોદીએ વધુમાં કહ્યું કે 5 વર્ષમાં દેશમાં અનેક મહત્વના નિર્ણયો લેવામાં આવ્યા.
પીએમ મોદીએ લોકસભા સ્પીકર ઓમ બિરલાના વખાણ કર્યા
તો સાથે સાથે વડાપ્રધાન નરેન્દ્ર મોદીએ લોકસભા સ્પીકર ઓમ બિરલાના પણ વખાણ કર્યા. તેમણે કહ્યું કે આક્રોશ અને આરોપો વચ્ચે પણ સ્પીકરે ધીરજ રાખીને કામ કર્યું. ક્યારેક સુમિત્રાજી મજાક કરતા હતા, પણ તમારો ચહેરો હંમેશા હસતો રહે છે. ઘણી પરિસ્થિતિઓમાં, તમે સંતુલિત ભાવના સાથે આ ગૃહનું માર્ગદર્શન અને નેતૃત્વ કર્યું. હું તમારી પ્રશંસા કરું છું.
સંકટકાળમાં પણ સંસદનું કામ ન અટક્યું
આગળ પીએમ મોદીએ આગળ જણાવતા કોરોના કાળને યાદ કર્યો. પીએમ મોદીએ કયું કે સદીએ સૌથી મોટું માનવ સંકટ જોયું છે. સંકટકાળમાં પણ દેશનું કામ ન અટક્યું. સાંસદોએ સંકટકાલમાં સાંસદનિધિ છોડવાનો નિર્ણય કર્યો. કોણ બચશે, કોણ ટકી શકશે, કોઈ કોઈને બચાવી શકશે કે નહીં… એવી સ્થિતિ હતી. આવી સ્થિતિમાં ગૃહમાં આવવું પણ જોખમ ભર્યું કામ હતું. તમે દેશનું કામ અટકવા દીધું નથી. ગૃહની ગરિમા પણ જળવાઈ રહે અને દેશના મહત્વના કાર્યોને જે ગતિ મળવી જોઈએ તે પણ જળવાઈ રહે, આ કાર્યમાં ગૃહની ભૂમિકા પાછળ ન રહે. તમે તેને નિપુણતાથી સંભાળ્યો.
તમામ સાંસદોનો પણ આભાર: પીએમ મોદી
પીએમ મોદીએ તમામ સાંસદોનો પણ આભાર માન્યો. હું માનનીય સાંસદોનો પણ આભાર વ્યક્ત કરવા માંગુ છું કે તે સમયગાળા દરમિયાન દેશની સ્થિતિને જોતા સાંસદ ફંડ છોડવાની દરખાસ્ત કરવામાં આવી હતી. જ્યારે પ્રસ્તાવ આવ્યો ત્યારે તમામ સાંસદોએ તેને સર્વસંમતિથી સ્વીકારી લીધો હતો. દેશવાસીઓને સકારાત્મક સંદેશ આપવા અને સમાજને વિશ્વાસ અપાવવા માટે સાંસદોએ તેમના પગારમાં ત્રીસ ટકાનો ઘટાડો કરવાનો નિર્ણય લીધો હતો. આપણા બધા સાંસદો વર્ષોથી ભારતીય મીડિયામાં કોઈ કારણ વગર દુર્વ્યવહાર કરતા હતા કે બહાર આટલું બધું ભોજન મળે છે અને સંસદની કેન્ટીનમાં આટલું સસ્તું મળે છે. તમે નક્કી કરો કે કેન્ટીનમાં દરેક માટે સમાન દર હશે. અમને સાંસદોની ફજેતી અને મજાકથી બચાવવા માટે હું તમારો આભાર વ્યક્ત કરું છું.
નવી સંસદમાં સેંગોલ હેરિટેજને જીવંત રાખવાનો પ્રયાસ
બધાએ ચર્ચા કરી કે નવી સંસદ ભવન બનવું જોઈએ. પરંતુ તમારા નેતૃત્વએ જ આ કાર્યને આગળ વધાર્યું છે. તેનું જ પરિણામ છે કે આજે દેશને નવી સંસદની ઇમારત મળી છે. સંસદની નવી ઇમારતમાં સેંગોલને હેરિટેજના ભાગરૂપે રાખવા અને આઝાદીની પ્રથમ ક્ષણને જીવંત રાખવાનું કામ કરવામાં આવ્યું હતું. તે ભારતની આવનારી પેઢીઓને આઝાદીની પ્રથમ ક્ષણ સાથે હંમેશા જોડાયેલ રાખશે. આનાથી આપણને દેશને આગળ લઈ જવાની પ્રેરણા પણ મળશે.
સત્રની સફળતા માટે સાંસદોનો આભાર, પહેલા સત્રમાં 20 વિધેયક પસાર
ડીજીટલાઇઝેશન પર વાત કરતાં વડાપ્રધાન મોદીએ કહ્યું કે દરેક લોકો હવે આધુનિક ટેક્નોલોજીથી ટેવાઈ ગયા છે. આ સ્થાયી વ્યવસ્થા બનાવવામાં આવી છે. સંયુક્ત પ્રયાસોને કારણે 17મી લોકસભાની ઉત્પાદકતા લગભગ 97 ટકા રહી છે. આ ખુશીની વાત છે. પરંતુ હું માનું છું કે આજે આપણે 17મી લોકસભાના અંત તરફ આગળ વધી રહ્યા છીએ, ત્યારે આપણે 18મી લોકસભાની શરૂઆત એક સંકલ્પ સાથે કરીશું કે આપણી પાસે હંમેશા 100 ટકાથી વધુ ઉત્પાદકતા ક્ષમતા હશે. તમારી પહેલ અને તમામના સંયુક્ત પ્રયાસને કારણે 17મી લોકસભામાં 97% કામ થયું. આ એક ખુશીની વાત છે. સાત સત્ર તો 100% પ્રોડક્ટિવિટી વાળા રહ્યા. દરેક સાંસદના મંતવ્યો સરકારને ધ્યાનમાં રાખવાનો પ્રયાસ કર્યો. આ સફળતા માટે હું તમામ સાંસદોનો આભાર વ્યક્ત કરું છું. પ્રથમ સત્રમાં બંને ગૃહોમાં ત્રીસ બિલ પસાર કરવામાં આવ્યા હતા. આ પોતાનામાં એક રેકોર્ડ છે. નવા માપદંડ સ્થાપિત થયા.
સ્વતંત્રતાના 75 વર્ષ લોકોત્સવ બન્યો
સ્વતંત્રતાના 75 વર્ષ પૂર્ણ થવાનો ઉત્સવ આવ્યો. આપણે સૌને એટલું મોટું સૌભાગ્ય મળ્યું છે કે આપણને આ તક મળી છે. કદાચ જ કોઈ સાંસદ એવો હશે જેને સ્વતંત્રતાના 75માં વર્ષને લોકોત્સવ બનાવવા માટે કોઈ કમી બાકી છોડી હોય.
ભારતે સફળતાથી જી-20ની અધ્યક્ષતા કરી
આ વર્ષે જી-20ની અધ્યક્ષતા ભારતને મળી. ભારતને ખૂબ જ સન્માન મળ્યું. દેશના દરેક રાજ્યએ પોતપોતાની રીતે વિશ્વ સમક્ષ ભારતનું સામર્થ્ય અને પોતાના રાજ્યની ઓળખ ખૂબ જ આવડત સાથે રજૂ કરી જેનો પ્રભાવ આજે પણ વિશ્વ ફલક પર તેની અસર જોવા મળે છે.
17મી લોકસભા દ્વારા નવા માઈલ્સટોન બનાવવામાં આવ્યા છે. ગૃહે આઝાદીના 75 વર્ષની ઉજવણી પર ખૂબ જ મહત્વપૂર્ણ કાર્યમાં આગેવાની લીધી. દેશે આઝાદીના 75 વર્ષની ઉજવણી ઉત્સવની જેમ પૂર્ણપણે કરી છે. આપણા માનનીય સાંસદો અને આ ગૃહે આમાં મોટી ભૂમિકા ભજવી છે.
અનુચ્છેદ 370 હટાવીને ગૃહે બંધારણને પૂર્ણ પ્રકાશ આપ્યો
આ કાર્યકાળ દરમિયાન ઘણા સુધારા અને ગેમચેન્જર ફેરફારો થયા છે. આ બધામાં 21મી સદીનો મજબૂત પાયો દેખાય છે. દેશ એક મોટા પરિવર્તન તરફ ઝડપી ગતિએ આગળ વધી રહ્યો છે. આમાં પણ ગૃહના તમામ સાથીઓએ ખૂબ સરસ માર્ગદર્શન આપ્યું છે. અમે સંતોષ સાથે કહી શકીએ કે અમારી ઘણી પેઢીઓ જેની રાહ જોઈ રહી હતી તેમાંથી ઘણી બાબતો આ 17મી લોકસભા દ્વારા પૂરી થઈ ગઈ છે. પેઢીઓની રાહ પૂરી થઈ. ઘણી પેઢીઓએ એક બંધારણનું સ્વપ્ન જોયું હતું. પરંતુ દરેક ક્ષણે તે બંધારણમાં તિરાડ દેખાતી હતી. એક ખીણ દેખાતી હતી. એક અવરોધ પીડાદાયક હતો. પરંતુ અનુચ્છેદ 370 હટાવીને આ ગૃહે બંધારણના સંપૂર્ણ સ્વરૂપને પૂર્ણ પ્રકાશ આપ્યો અને તેને આગળ વધાર્યો. બંધારણની રચના કરનાર તમામ મહાપુરુષોની આત્માઓ આપણને આશીર્વાદ આપતી હોવી જોઈએ.
દેશને આતંકવાદ મુકત કરવા કડક કાયદા બનાવ્યા
આતંકવાદ ગૂમડું બનીને દેશની છાતી પર ગોળીઓ વરસાવતું હતું. માં ભારતીની ધરા અવારનવાર રક્તરંજીત થઈ જતી હતી. દેશના અનેક વીર, કુશળ લોકો આતંકવાદને કારણે બલિ ચઢી જતાં હતા. અમે આતંકવાદ વિરુદ્ધ કડક કાયદા બનાવ્યા. આ ગૃહે જ બનાવ્યા. મને વિશ્વાસ છે કે તેણે કારણે જે લોકો આ સમસ્યાનો સામનો કરી રહ્યા છે તેમણે બળ મળશે. ભારતને પૂર્ણ રીતે આતંકવાદ મુક્ત થયાનો અનુભવ થઈ રહ્યો છે અને તે સ્વપ્ન સિદ્ધ થતું જોવા મળી રહ્યું છે.
આવનાર પેઢી ન્યાય સંહિતા સાથે જીવશે
આપણે 75 વર્ષ સુધી અંગ્રેજોના આપેલ દંડ સંહિતામાં જીવી રહ્યા હતા. અમને ગર્વ છે કે નવી પેઢીને કહી શકીશું કે દેશ 75 વર્ષ ભલે દંડ સંહિતામાં જીવ્યો પરંતુ આવનાર પેઢીઓ ન્યાય સંહિતામાં જીવશે.
નારી શક્તિ વંદના અધિનિયમની સાથે નવા સંસદની શરૂઆત થઈ
નવા સંસદ ભવનની ભવ્યતા તો છે જ પરંતુ તેનો પ્રારંભ એક એવા કામથી થયો જે ભારતના મૂળભૂત માન્યતાઓને પ્રોત્સાહન આપે છે અને તે છે નારી શક્તિ વંદના અધિનિયમ છે. જ્યારે પણ આ નવા ગૃહની ચર્ચા થશે ત્યારે તેમાં નારી શક્તિ વંદના અધિનિયમનો ઉલ્લેખ થશે. આ નવા ગૃહની પવિત્રતાની અનુભૂતિ તે જ ક્ષણે શરૂ થઈ ગઈ હતી, જે આપણને એક નવી તાકાત આપવા જઈ રહી છે અને તેનું પરિણામ એ છે કે આવનારા સમયમાં દેશની મોટી સંખ્યામાં માતાઓ અને બહેનો ગૃહમાં બેઠા છે.
ટ્રિપલ તલાક પર વડાપ્રધાન મોદીએ કહ્યું…
ટ્રિપલ તલાક પર બોલતા પીએમ મોદીએ કહ્યું કે, ઘણા ઉતાર-ચઢાવ સાથે આપની મુસ્લિમ બહેનો રાહ જોઈ રહી હતી. અદાલતોએ તેમની તરફેણમાં નિર્ણયો આપ્યા હતા, પરંતુ તેમને તે અધિકાર નહોતો મળી રહ્યો. મુશ્કેલીઓ સાથે ટકી રહેવું પડતું હતું. પરંતુ, ટ્રિપલ તલાકથી મુક્તિ સુધી ખૂબ જ મહત્વપૂર્ણ અને નારી શક્તિના સન્માનનું કામ 17મી લોકસભાએ કર્યું છે. તમામ માનનીય સાંસદો, તેમના મંતવ્યો, તેમના નિર્ણયો ગમે તે હોય, પરંતુ તેઓ ક્યારેક તો કહેશે જ કે હા, અમે આ દીકરીઓને ન્યાય આપવાનું કામ કર્યું છે.
