દિલ્હીની બોર્ડર પર પોલીસનો બંદોબસ્ત, ડ્રોન અને ખેડૂતો વચ્ચે જામ્યું નવું યુદ્ધ

• ખેડૂત આંદોલનનો આજે બીજો દિવસ
  
• ગઈકાલે પોલીસે ખેડૂતોને રોકવા માટે ડ્રોનથી ટીયર ગેસના શેલ છોડયા હતા.
  
• ડ્રોનના જવાબમાં આજે ખેડૂતોએ પતંગ ઉડાવી હતી
  

કેન્દ્ર સરકાર સામે વિરોધ કરી રહેલા ખેડૂતો દિલ્હીની સરહદોમાં ઘૂસવા માટે ઉત્સુક છે. શંભુ બોર્ડર પર સ્થિતિ વધુ ચિંતાજનક છે. ખેડૂતોમાં રોષ જોવા મળી રહ્યો છે. સુરક્ષા દળો કોઈક રીતે ટીયર ગેસના શેલ છોડીને ભીડને કાબૂમાં કરી રહ્યા છે. સુરક્ષા દળો ડ્રોનથી ટીયર ગેસના શેલ છોડી રહ્યા છે. દરમિયાન ખેડૂતોએ આનો ઉકેલ શોધવાનો પણ પ્રયાસ કર્યો છે. આજે શંભુ સરહદી વિસ્તારમાં ખેડૂતોએ મોટા પાયે પતંગ ઉડાવી હતી.

પોલીસની ડ્રોન કાર્યવાહી

એવું કહેવામાં આવી રહ્યું છે, કે ખેડૂતો હવે પતંગની દોરીની મદદથી પોલીસની ડ્રોન કાર્યવાહીને વાળવાનો પ્રયાસ કરી રહ્યા છે. શંભુ બોર્ડર પર ખેડૂતો એટલી મોટી સંખ્યામાં પતંગ ઉડાવી રહ્યા છે કે પોલીસનું ડ્રોન રસ્તો ગુમાવી રહ્યું છે. આ સિવાય ખેડૂતોએ ટીયર ગેસના શેલને બેઅસર કરવા માટે પાણીના છંટકાવ અને ભીની કોથળીઓનો ઉપયોગ કર્યો છે. સાથે જ બેરિકેડ તોડવા માટે જેસીબી મશીન મંગાવવામાં આવી રહ્યા છે.

ખેડૂતો શું ઈચ્છે છે?

આ આંદોલનમાં પણ ખેડૂતો માંગ કરી રહ્યા છે કે MSP અંગે કાયદો બનાવવામાં આવે. લખીમપુર ખેરી કેસમાં ખેડૂતો પરના કેસ પાછા ખેંચવા જોઈએ, ખેડૂત પરિવારોને વળતર મળવું જોઈએ, ખેડૂતોને પ્રદૂષણના કાયદામાંથી બહાર રાખવા જોઈએ અને સરકારે ખેડૂતોની તમામ લોન માફ કરવી જોઈએ.

ખેડૂતો સામે કડક કાર્યવાહી

આંદોલન પહેલા 13 ફેબ્રુઆરીએ ખેડૂતો અને પોલીસ વચ્ચે ઘર્ષણ થયું હતું. પોલીસે ખેડૂતો પર ભારે બળપ્રયોગ કર્યો હતો. જે બાદ ઘણા ખેડૂતો ગંભીર રીતે ઘાયલ થયા હતા, આ આંદોલનને કારણે મોટાભાગે દિલ્હીના રસ્તાઓ પર જામ જોવા મળ્યો હતો. ખેડૂતોના આંદોલનને કારણે દિલ્હી બોર્ડર પર નાકાબંધી બાદ દિલ્હીમાં શાકભાજીના ભાવમાં વધારો જોવા મળી રહ્યો છે. નિષ્ણાતોનું માનવું છે કે જો આવનારા સમયમાં પરિસ્થિતિમાં સુધારો નહીં થાય તો દિલ્હીમાં દૂધ અને શાકભાજી જેવી રોજિંદી વસ્તુઓ મોંઘી થઈ જશે.