- માલદીવનો વિપક્ષ રાષ્ટ્રપતિ મુઈજ્જુના ભારત વિરોધી વલણના વિરોધમાં
- MDP સહિત વિપક્ષી પાર્ટીઓ મહાભિયોગ પ્રસ્તાવ પર કરી રહી છે વિચાર
- માલદીવની સુપ્રીમ કોર્ટે રાષ્ટ્રપતિ મુઈજ્જુને આપી હતી મોટી રાહત
માલદીવમાં વિપક્ષી પાર્ટીઓ ચીન સમર્થક રાષ્ટ્રપતિ મોહમ્મદ મુઈજ્જુ વિરુદ્ધ મહાભિયોગ પ્રસ્તાવ લાવવા પર વિચાર કરી રહી છે. આ અંગે દેશના ઈસ્લામિક મામલાના મંત્રી મોહમ્મદ શહીમ અલી સઈદે કહ્યું કે તેમની સરકાર વિપક્ષને આમ કરવાની અનુમતિ નહીં આપે. સઈદે વિપક્ષ પર ગેરકાયદેસર રીતે ચૂંટાયેલી સરકારને તોડી પાડવાનો પ્રયાસ કરવાનો આરોપ લગાવ્યો હતો.
સરકાર દેશની અંદર-બહાર પડકારોનો સામનો કરી રહી છે: મુઈજ્જુના મંત્રી
મુઈજ્જુ અને સઈદે રવિવારે વસ્તીની દૃષ્ટિએ માલદીવના બીજા સૌથી મોટા શહેરી વિસ્તાર અડ્ડુની મુલાકાત લીધી હતી. મીડિયા રિપોર્ટ્સ અનુસાર, આ દરમિયાન સઈદે આરોપ લગાવ્યો કે મુઈજ્જુ સરકાર દેશની અંદર અને દેશની બહારના પડકારોનો સામનો કરી રહી છે. સરકાર વિરુદ્ધ ખોટી માહિતી અને પાયાવિહોણી અફવાઓ સતત ફેલાવવામાં આવી રહી છે. તેમણે કહ્યું કે સરકારને જવાબદાર ઠેરવવાની જવાબદારી વિપક્ષની છે. પરંતુ લોકો દ્વારા ચૂંટાયેલી સરકાર માટે અવરોધો ઉભા કરવા અને તેને તોડી પાડવાનો પ્રયાસ કરવો એ અયોગ્ય છે. વિપક્ષના આવા પ્રયાસોથી દેશની જનતાને નુકસાન વેઠવું પડે છે.
વિપક્ષે વિરોધને રમત બનાવી દીધી
મુઈજ્જુ સરકારના વરિષ્ઠ મંત્રીએ કહ્યું કે વિપક્ષોએ વિરોધને રમતમાં ફેરવી દીધી છે. ચિંતાની વાત તો એ છે કે હવે તેઓ એ નીચલા સ્તરે પહોંચી ગયા છે કે તેઓ દેશના લોકો દ્વારા ચૂંટાયેલા રાષ્ટ્રપતિના મહાભિયોગને લઈને ચર્ચા કરી રહ્યા છે. સઈદે ભારપૂર્વક કહ્યું છે કે વિપક્ષ પોતાના ઉદ્દેશ્યમાં ક્યારેય સફળ નહીં થાય. તેઓ રાષ્ટ્રપતિ સામે મહાભિયોગ ચલાવી શકતા નથી. તેમના આ પગલાથી કશું હાંસલ થવાનું નથી.
રાષ્ટ્રપતિ મુઈજ્જુને સુપ્રીમ કોર્ટમાંથી રાહત મળી
જણાવી દઈએ કે, વિપક્ષી પાર્ટી માલદીવિયન ડેમોક્રેટિક પાર્ટી (MDP)એ ગયા મહિને રાષ્ટ્રપતિ મુઈજ્જુ પર મહાભિયોગ લાવવા માટે સંસદમાં પ્રસ્તાવ રજૂ કરવાનો પ્રયાસ કર્યો હતો. પરંતુ આ મહિનાની શરૂઆતમાં રાષ્ટ્રપતિ મુઈજ્જુને રાહત આપતા માલદીવની સુપ્રીમ કોર્ટે સંસદના સ્થાયી આદેશોમાં તાજેતરના સુધારાને સ્થગિત કરવાનો આદેશ આપ્યો હતો. આ સુધારાઓએ વિપક્ષી સાંસદો માટે રાષ્ટ્રપતિ અને ઉપરાષ્ટ્રપતિ સામે મહાભિયોગ ચલાવવાનું સરળ બનાવ્યું.
ભારત માલદીવનો ‘સૌથી જૂનો સાથી’: વિપક્ષ
માલદીવના રાષ્ટ્રપતિ મુઈજ્જુને તેમની ભારત વિરોધી ટિપ્પણીઓ માટે તેમના પોતાના જ દેશમાં ટીકાઓનો સામનો કરવો પડી રહ્યો છે. વિરોધ પક્ષો તેમના ભારત વિરોધી વલણના વિરોધમાં છે. જાન્યુઆરીમાં, MDP અને અન્ય વિપક્ષી પક્ષોએ મુઈજ્જુ સરકારના ભારત વિરોધી વલણ પર ચિંતા વ્યક્ત કરી હતી અને ભારતને તેનો ‘સૌથી જૂનો સાથી’ ગણાવ્યો હતો.
