અમરેલીમાં મુખ્યમંત્રી ભૂપેન્દ્ર પટેલની ઉપસ્થિતિમાં ૮૦૦થી વધુ પાટીદાર આગેવાનોની મિટિંગ મળી
રાજકોટમાં આજે યોજાશે પાટીદાર ચિંતન શિબીર
રાજકોટ લોકસભા બેઠકના ભાજપના ઉમેદવાર પરસોતમ રૂપાલા વિરુધ્ધ વિવાદ અને વિરોધનો જે વંટોળ ઉઠ્યો છે તેમા રૂપાલાએ અનેક વખત માફી માગવા છતા હજુ આગ ઠરી નથી ત્યાંરે હવે રૂપાલાના સમર્થનમાં કડવા પાટીદાર સમાજ મેદાનમાં આવ્યા છે. કડવા પાટીદાર સમાજના આગેવાનોએ સોશિયલ મીડિયામાં પોસ્ટ વહેતી કરીને પરસોતમ રૂપાલાના સમર્થનની અપિલ કરવાનું ચાલુ કર્યુ છે. મુખ્યમંત્રી ભૂપેન્દ્ર પટેલ આજે અમરેલી પહોંચ્યા છે. હોટલ લોડર્સ ખાતે પાટીદાર સમાજના આગેવાનો સાથે મિટિંગનું આયોજન કરવામા આવ્યુ હતુ. દરમિયાન વડોદરામાં પણ સમી સાવલી રોડ પર પાટીદાર સમાજના આગેવાનોએ પરસોતમ રૂપાલાના સમર્થનમાં બેઠક યોજી હતી.
ભાજપના મહિલા આગેવાન અને પાટીદાર અગ્રણી જ્યોતિબેન ટીલવાએ સોશિયલ મીડિયામાં એક પોસ્ટ મુકી છે. તેમા એવુ લખ્યુ છે કે, “પરસોતમ રૂપાલાએ અનેક વખત માફી માગી છે. આમછતા આટલો ઇશ્યુ કરવામા આવે તે વ્યાજબી નથી. ચાલો મારા ભાઇઓ અને બહેનો હવે જાગો, રૂપાલા સાહેબને સાથ આપો. જો સમાધાન નહીં થાય તો પાટીદારોએ એક જૂથ થઇને મેદાનમાં ઉતરવુ જોઇએ.” પાટીદાર મહિલા ભાજપ અગ્રણી જ્યોતિબે ટીલવાની આ પોસ્ટમાં અન્ય પાટીદાર યુવકોએ મોટી સંખ્યામાં કોમેન્ટ કરીને સમર્થન આપ્યુ છે. બીજીબાજુ વડોદરાના સમા સાવલી રોડ પર પણ પાટીદાર આગેવાનોએ પરસોતમ રૂપાલાના સમર્થનમાં મિટિંગ બોલાવી હતી.
દરમિયાન મુખ્યમંત્રી ભૂપેન્દ્ર પટેલ આજે અમરેલી આવ્યા છે. જાણવા મળ્યા મુજબ લોડર્સ હોટલમાં પાટીદાર આગેવાનો સાથે બંધ બારણે મિટિંગ પણ રાખી હોવાનું જાણવા મળે છે.
રાજકોટમાં પણ પાટીદાર સમાજ સક્રિય થયો
વિવાદના એપી સેન્ટર રાજકોટમાં રૂપાલાને સમર્થન આપવા માટે પાટીદાર સમાજ એક જૂથ થઇને આગળ આવે તેવા પ્રયાસ ચાલી રહ્યા છે. કડવા અને લેઉઆ પટેલના આગેવાનોની એક ચિંતન બેઠક પણ આજે સાંજે રાખવામા આવી હોવાનું જાણવા મળે છે.
અમરેલીની સભામાં ૮૦૦થી વધુ પાટીદાર આગેવાનો જોડાયા
અમરેલીમાં મુખ્યમંત્રી ભૂપેન્દ્ર પટેલની ઉપસ્થિતિ વચ્ચે રૂપાલાને સમર્થન આપવા માટે માર્કેટિંગ યાર્ડ પાસે આવેલી હોટલ લોડર્સમાં પાટીદાર આગેવાનોની મિટિંગ રાખવામા આવી હતી. ૮૦૦થી વધુ આગેવાનોને આમંત્રણ અપાયુ હતુ. મોટાભાગે વર્તમાન સાંસદ નારણ કાછડિયા જૂથના વધુ ઉપસ્થિત રહ્યા હતા.
