- ચીન આ રનવેનો ઉપયોગ સૈન્ય પ્રવૃત્તિઓ માટે કરશે
- જૂના રનવેનો ઉપયોગ સિવિલ સર્વિસ અને સૈન્ય પ્રવૃત્તિઓ માટે કરાતો
- ઓપન સોર્સ એનાલિસ્ટ ડેમિયન સિમોને આ રનવેના ફોટા કર્યા જાહેર
ચીન સતત ભારતીય સરહદ પર પોતાના ઈન્ફ્રાસ્ટ્રક્ચરને મજબૂત કરવા પર ભાર આપી રહ્યું છે. લદ્દાખમાં ચાલી રહેલા તણાવની વચ્ચે ચીને હોટન એરબેઝ પર નવો રનવે બનાવ્યો છે, જેને કાર્યરત પણ કરી દેવામાં આવ્યો છે. એવું માનવામાં આવે છે કે ચીન આ રનવેનો ઉપયોગ સૈન્ય પ્રવૃત્તિઓ માટે કરશે, કારણ કે જૂના રનવેનો ઉપયોગ સિવિલ સર્વિસ અને સૈન્ય પ્રવૃત્તિઓ માટે કરવામાં આવતો હતો. હોટન એરબેઝ પર બનેલા નવા રનવેની લંબાઈ 3700 મીટર છે. ઓપન સોર્સ એનાલિસ્ટ ડેમિયન સિમોને આ રનવેને લગતી સેટેલાઇટ તસવીરો બહાર પાડી છે.
ચાર વર્ષ બાદ આ નવો રનવે કાર્યરત કરાયો
હકીકતમાં વર્ષ 2020માં ગલવાન હિંસામાં 20 ભારતીય સૈનિકો માર્યા ગયા હતા, અમેરિકાએ સેટેલાઇટ છબીઓ જાહેર કરી હતી અને લગભગ 40 ચીની સૈનિકોના મોતની વાત કરી હતી. આ સંઘર્ષ બાદ જ ચીને હોટન એરબેઝ પર નવા રનવેનું નિર્માણ શરૂ કર્યું હતું. લગભગ ચાર વર્ષ બાદ આ નવો રનવે કાર્યરત કરવામાં આવ્યો છે. ચીનનું આ એરબેઝ ભારતની ખૂબ નજીક છે. નવા રનવેના નિર્માણ બાદ હવે હોટન એરબેઝ પર બે રનવે કાર્યરત થઈ ગયા છે.
ચીનનો નવો રનવે 3700 મીટર લાંબો છે
હોટન એરબેઝ પર બનેલો ચીનનો નવો રનવે 3700 મીટર લાંબો છે, જ્યારે જૂનો રનવે 3200 મીટર લાંબો હતો. એવું માનવામાં આવે છે કે નવા રનવેનો ઉપયોગ માત્ર સૈન્ય ઉપયોગ માટે જ કરવામાં આવશે. તે જ સમયે રનવેની લંબાઈ વધુ હોવાને કારણે ચીન તેના પર નાના ફાઇટર પ્લેન તેમજ મોટા સૈન્ય વિમાનોને લેન્ડ કરી શકે છે, જે ભારતીય સરહદ પર ચીનની સેનાને ખૂબ મજબૂત બનાવશે. ચીને પહેલાથી જ હોટન એરબેઝ પર ઘણા ફાઇટર એરક્રાફ્ટ અને ડિફેન્સ સિસ્ટમ તૈનાત કરી છે. લેહથી હોટન એરબેઝનું અંતર 382 કિલોમીટર છે, તે ચીનનું બેવડા હેતુનું એરબેઝ છે. ચીન તેનો ઉપયોગ સિવિલ સર્વિસ માટે પણ કરે છે. ચીને હોટન એરબેઝ પાસે સેના માટે ઈમારતો પણ બનાવી છે.
હોટન ચીનનું સૌથી મોટું એરબેઝ
હોટન ભારતીય સરહદ પાસે ચીનનું સૌથી મોટું એરબેઝ છે. ચીને આ એરબેઝ પર પહેલાથી જ ફાઈટર જેટ્સ, અર્લી વોર્નિંગ AWACS એરક્રાફ્ટ અને એર ડિફેન્સ યુનિટ તૈનાત કર્યા છે. ચીને હોટન એરબેઝ પર J-20 ફાઈટર જેટ, શેન્યાંગ J-8 ઈન્ટરસેપ્ટર એરક્રાફ્ટ, શાનક્સી Y-8G અને KJ-500 AWACS સિસ્ટમ તૈનાત કરી છે. આવી સ્થિતિમાં, ચીની ફાઇટર પ્લેન હોટન એરબેઝથી ટેકઓફ કરીને વાસ્તવિક નિયંત્રણ રેખા (LAC) ની આસપાસના વિસ્તારોમાં સરળતાથી હવાઈ પેટ્રોલિંગ કરી શકે છે.
