સાસુ સાથે બોલાચાલી બાદ 18 વર્ષની યુવતીએ ઝેરી દવા પી જીવન ટૂંકાવ્યું
લગ્નના છ જ મહિનામાં કરુણ અંતઃ પતિએ ઠપકો આપ્યા બાદ ઘરે એકલતા સમયે પગલું ભર્યું
અગ્ર ગુજરાત, રાજકોટ
ચોટીલા તાલુકાના પીપરાળી ગામમાં માત્ર 18 વર્ષની પરણિત યુવતીએ ઝેરી દવા પી આપઘાત કરી લેતા પરિવારજનોમાં શોક છવાઈ ગયો છે. સાસુ સાથે ઘરકામની બાબતે થયેલી બોલાચાલી બાદ પતિએ ઠપકો આપ્યો હોવાનું અને આ ઘટનાથી મનમાં લાગી આવતા યુવતીએ આકરું પગલું ભર્યું હોવાનું પોલીસ તપાસમાં સામે આવ્યું છે. લગ્નને હજુ છ મહિના જેટલો જ સમય થયો હતો.
મળતી વિગતો મુજબ પીપરાળી ગામે રહેતા રંજનબેન રણછોડભાઈ જાદવ (ઉ.વ.18)ને ગત તા.19 ઓગસ્ટના રોજ સવારે ઘરકામ બાબતે સાસુ સાથે બોલાચાલી થઈ હતી. વાત ઉગ્ર બનતાં બંને વચ્ચે ગેરશબ્દોની આપ-લે પણ થઈ હતી. આ દરમિયાન પતિ રણછોડભાઈએ રંજનબેનને ઠપકો આપ્યો હતો. આ સમગ્ર ઘટનાથી રંજનબેનને મનમાં લાગી આવતા બપોરના સમયે ઘરે કોઈ ન હતું ત્યારે તેમણે ખેતીમાં ઉપયોગમાં લેવાતી ઝેરી દવા પી લીધી હતી. થોડીવાર બાદ રંજનબેને ઝેરી દવા પી લીધી હોવાની જાણ થતાં પરિવારજનો તાત્કાલિક તેમને ચોટીલા સિવિલ હોસ્પિટલ ખાતે સારવાર માટે લઈ ગયા હતા. જોકે તબિયત ગંભીર હોવાથી વધુ સારવાર માટે રાજકોટ સિવિલ હોસ્પિટલમાં ખસેડવામાં આવ્યા હતા. અહીં સારવાર દરમિયાન રંજનબેને અંતિમ શ્વાસ લેતા પરિવાર પર આભ તૂટી પડ્યું હતું.
રંજનબેન પાંચ બહેનો અને એક ભાઈમાં સૌથી નાના હતા. તેમના લગ્નને હજુ છ મહિના જેટલો જ સમય થયો હોવાથી તેમના અકાળે અવસાનથી પરિવારજનોમાં ભારે શોકની લાગણી પ્રસરી છે. બનાવ અંગે ચોટીલા પોલીસે જરૂરી કાર્યવાહી હાથ ધરી મૃતદેહને પોસ્ટમોર્ટમ માટે મોકલી વધુ તપાસ શરૂ કરી છે.
