- ભારતે બ્રહ્મોસ મિસાઈલોની પ્રથમ બેચ ફિલિપાઈન્સને મોકલવા પર ચીન નારાજ
- બ્રહ્મોસ મિસાઇલની ગણતરી વિશ્વની સૌથી ઝડપી સુપરસોનિક ક્રૂઝ મિસાઇલોમાં
- બે દેશો વચ્ચેના સંરક્ષણ સહયોગથી ત્રીજા દેશને નુકસાન ન થવું જોઈએઃ ચીન
ભારતે બ્રહ્મોસ મિસાઈલોની પ્રથમ બેચ ફિલિપાઈન્સને મોકલવા પર ચીન નારાજ છે. ચીની સેનાએ નિવેદન જારી કરીને તેને ત્રીજા દેશ માટે ખતરો ગણાવ્યો છે. બ્રહ્મોસ મિસાઇલની ગણતરી વિશ્વની સૌથી ઝડપી સુપરસોનિક ક્રૂઝ મિસાઇલોમાં થાય છે. તે જમીન, હવા અને સમુદ્રમાંથી લક્ષ્યોને હિટ કરવામાં સક્ષમ છે. હવે ચીને કહ્યું છે કે બે દેશો વચ્ચે સંરક્ષણ સહયોગમાં એ વાતનું ધ્યાન રાખવું જોઈએ કે તેનાથી કોઈ ત્રીજા પક્ષને કે ત્યાંની પ્રાદેશિક શાંતિને નુકસાન ન પહોંચે.
ભારતે 19 એપ્રિલે બ્રહ્મોસ મિસાઈલની પ્રથમ બેચ ફિલિપાઈન્સને સોંપી
વાસ્તવમાં, બ્રહ્મોસ મિસાઈલને લઈને જાન્યુઆરી 2022માં ભારત અને ફિલિપાઈન્સ વચ્ચે $375 મિલિયનના સોદા પર હસ્તાક્ષર કરવામાં આવ્યા હતા, જેના હેઠળ ભારત બ્રહ્મોસ મિસાઈલ સાથે ત્રણ બેટરી, તેમના લોન્ચર્સ અને સંબંધિત સામગ્રી ફિલિપાઈન્સને સોંપશે. ભારતે 19 એપ્રિલે બ્રહ્મોસ મિસાઈલની પ્રથમ બેચ ફિલિપાઈન્સને સોંપી હતી, જેના પછી ચીન ચોંકી ગયું હતું. ભારતમાંથી બ્રહ્મોસ મિસાઈલની આ પ્રથમ નિકાસ છે.
દક્ષિણ ચીન સાગરમાં તણાવ
દક્ષિણ ચીન સાગરમાં પાંચ દેશો સાથે ચીનનો વિવાદ ચાલી રહ્યો છે ત્યારે ભારતે બ્રહ્મોસ મિસાઈલની પહેલી બેચ એવા સમયે મોકલી છે. વાસ્તવમાં ચીન દક્ષિણ ચીન સાગર પર પોતાનો દાવો કરે છે તો બીજી તરફ ફિલિપાઈન્સ, વિયેતનામ, મલેશિયા, બ્રુનેઈ અને તાઈવાન પણ પોતાનો દાવો કરે છે. જ્યારે ચીનના સંરક્ષણ મંત્રાલયના પ્રવક્તા કર્નલ વુ કિયાનને આ મુદ્દે સવાલ કરવામાં આવ્યો તો તેમણે કહ્યું કે, ચીન હંમેશા એ વાતનું ધ્યાન રાખે છે કે બે દેશો વચ્ચેના સંરક્ષણ સહયોગથી ત્રીજા દેશને નુકસાન ન થવું જોઈએ.
ચીને અમેરિકાનો વિરોધ કર્યો
આ દરમિયાન ચીનના પ્રવક્તાએ અમેરિકા દ્વારા ચીન-એશિયા પેસિફિક સમુદ્રમાં બેલેસ્ટિક મિસાઈલોની તૈનાતીનો સખત વિરોધ કર્યો હતો. ચીનના પ્રવક્તાએ કહ્યું કે આ અંગે અમારું વલણ સ્પષ્ટ અને તાર્કિક છે. અમેરિકાના આ પગલાથી ક્ષેત્રીય દેશોની સુરક્ષા માટે ગંભીર ખતરો છે. તેનાથી પ્રદેશની શાંતિ અને સ્થિરતા ખોરવાય છે.
