- ન્યુયોર્કમાં સંયુક્ત રાષ્ટ્રના પોલ્યુલેશન એન્ડ ડેવલપમેન્ટ કમિશન દ્વારા આયોજિત વાર્ષિક કોન્ફરન્સ
- વાર્ષિક કોન્ફરન્સ CDP Meet 2024માં ભારતની ત્રણ મહિલાઓની પસંદગી કરવામાં આવી છે
- આંધ્રપ્રદેશના સરપંચ હેમા કુમારી, ત્રિપુરાના સિપાહીજાલા જિલ્લા પરિષદના પ્રમુખ સુપ્રીયા દાસ દત્તા
ન્યુયોર્કમાં સંયુક્ત રાષ્ટ્રના પોપ્યુલેશન એન્ડ ડેવલપમેન્ટ કમિશન – CDP દ્વારા આયોજિત વાર્ષિક કોન્ફરન્સ CDP Meet – 2024 માં દેશની ત્રણ મહિલાઓની પસંદગી કરવામાં આવી છે. આ ત્રણેય મહિલાઓ 3 મેના રોજ વસ્તી અને વિકાસ પર 57મી કોન્ફરન્સમાં ભાગ લેશે. જેમાં આંધ્રપ્રદેશના સરપંચ હેમા કુમારી, ત્રિપુરાના સિપાહીજાલા જિલ્લા પરિષદના પ્રમુખ સુપ્રિયા દાસ દત્તા અને રાજસ્થાનના ઝુંઝુનુ જિલ્લાના સરપંચ નીરુ યાદવને ખાસ આમંત્રણ મળ્યું છે.
વસ્તી અને વિકાસ આયોગની વાર્ષિક બેઠક 29 એપ્રિલથી 3 મે દરમિયાન ન્યૂયોર્કમાં યોજાશે
વસ્તી અને વિકાસ આયોગની વાર્ષિક બેઠક 29 એપ્રિલથી 3 મે દરમિયાન ન્યૂયોર્કમાં યોજાશે. વાર્ષિક બેઠકનો ઉદ્દેશ ટકાઉ વિકાસ માટે 2030 એજન્ડાની સમીક્ષા કરવાનો છે. આ મહત્વની બેઠકમાં પસંદ કરાયેલી દેશની ત્રણ મહિલાઓ ભારતની સ્થાનિક સરકારમાં મહિલાઓની ભૂમિકા, મહિલા સશક્તિકરણની રીતો અને હાંસલ કરવાના લક્ષ્યો વિશે તેમના મંતવ્યો રજૂ કરશે.
રાજસ્થાનની નીરુ યાદવ
સંયુક્ત રાષ્ટ્રના પોપ્યુલેશન એન્ડ ડેવલપમેન્ટ કમિશન દ્વારા આયોજિત વાર્ષિક કોન્ફરન્સમાં ભાગ લેવા માટે દેશની જે ત્રણ મહિલાઓને આમંત્રણ મળ્યું છે તેમાં રાજસ્થાનના ઝુંઝુનુ જિલ્લાની ગ્રામ પંચાયત લાંબી આહીરના સરપંચ નીરુ યાદવનો પણ સમાવેશ થાય છે. નીરુ યાદવે પોતાની પંચાયતમાં ઘણી નવી પહેલ કરી છે. તેમણે પંચાયતની ગર્લ્સ હોકી ટીમ તૈયાર કરવા અને કોચ દ્વારા તેમને નિયમિત પ્રેક્ટિસ કરાવવાની પહેલ કરી.
નીરુ યાદવે યુટેન્સિલ બેંક ખોલી
તેમજ નીરુએ તેમના વિસ્તારમાં યુટેન્સિલ બેંક ખોલીને ગ્રામ પંચાયતને પ્લાસ્ટિક મુક્ત બનાવવાની પહેલ કરી. જૂના કપડાની થેલીઓ બનાવીને ગ્રામીણ મહિલાઓને સશક્ત બનાવી. પર્યાવરણને પ્રોત્સાહન આપવા માટે, નીરુએ લગ્નની ભેટ તરીકે એક છોડ આપીને એક નવું અભિયાન શરૂ કર્યું. ‘માય ટ્રી-માય ફ્રેન્ડ’ અભિયાન પણ શરૂ કર્યું. જે અંતર્ગત સરકારી શાળાના વિદ્યાર્થીઓને 21 હજાર છોડનું વિનામૂલ્યે વિતરણ કરવામાં આવ્યું હતું.
નીરુ યાદવ KBC સુધી પહોંચી
રાજસ્થાનના ઝુંઝુનુ જિલ્લાની રહેવાસી નીરુ યાદવ ત્રણ ગામની સરપંચ છે. તે મૂળ હરિયાણાની છે. તે KBCની 15મી સીઝનમાં તેના ગામના વિકાસ માટે અને તેની જરૂરિયાતો પૂરી કરવા માટે જોવા મળી હતી. તેમણે ગામડાની છોકરીઓ અને મહિલાઓના મુદ્દે અમિતાભ બચ્ચન સાથે ખુલીને વાત કરી હતી. નીરુએ B.Sc., M.Sc., B.Ed., M.Ed અને PhD કર્યું છે. સરકારી શાળાની ઈમારતો અને અન્ય ઈન્ફ્રાસ્ટ્રક્ચરના વિકાસમાં સહકાર આપવા બદલ તેમને શિક્ષણ વિભાગ તરફથી સન્માન મળ્યું છે.
આંધ્રપ્રદેશની હેમા કુમારી કુનુકુ ઈરાગવરમ મંડલના પેકેરુ ગામની સરપંચ
હેમા કુમારી કુનુકુ મૂળ આંધ્રપ્રદેશની છે. તે પશ્ચિમ ગોદાવરી જિલ્લાના ઇરાગવરમ મંડલના પેકેરુ ગામની સરપંચ છે. તેણે 2022 માં કાકીનાડા જેએનટીયુમાંથી એમટેક ડિગ્રી પૂર્ણ કરી. તેમણે પાંચ વર્ષ સુધી ઈલેક્ટ્રોનિક્સ અને કોમ્યુનિકેશન એન્જિનિયરિંગ વિભાગમાં એસોસિયેટ લેક્ચરર તરીકે પણ કામ કર્યું. હેમા કુમારીએ તેમના ગામમાં સૌથી વધુ શોષિત અને છેલ્લા સ્થાને રહેલા સમાજ માટે ઘણી યોજનાઓ ચલાવી છે. તે લોકોને સતત જાગૃત કરી રહી છે.
ત્રિપુરાના સુપ્રિયા દાસ દત્તા સિપાહીજલાના જિલ્લા પંચાયત પ્રમુખ
ત્રિપુરાના રહેવાસી સુપ્રિયા દાસ દત્તા સિપાહીજલાના જિલ્લા પંચાયત પ્રમુખ છે. તેઓ વડાપ્રધાન નરેન્દ્ર મોદીથી ખૂબ પ્રભાવિત છે. દત્તા જાહેર ક્ષેત્રમાં મહિલાઓને આગળ વધારવા માટે કામ કરી રહ્યા છે. તેમણે તેમના જિલ્લામાં મહિલાઓ માટે ચર્ચા મંચ શરૂ કર્યું. સુપ્રિયા દાસ દત્તા ફાર્મસીમાં ડિપ્લોમા ધરાવે છે.
