- કેરેબિયન દેશ હૈતીમાં હથિયારધારી ગેંગનો આતંક યથાવત્
- હિંસામાં સેંકડોનાં મોત, લાખો લોકોને હિજરત કરવાની નોબત આવી
- હૈતી હિંસાથી યુનો પણ ચિંતાગ્રસ્ત
કેરેબિયન દેશ હૈતીમાં હથિયારધારી ગેંગ સાથેના સંઘર્ષને કારણે શરૂ થયેલી હિંસા ચાલુ છે. માર્ચથી હિંસા વધી છે, લગભગ 580,000 લોકોને ઘરવિહોણા કર્યા છે. સંયુક્ત રાષ્ટ્ર માઈગ્રેશન એજન્સીના નવા રિપોર્ટમાં આ માહિતી આપવામાં આવી છે. હિંસાને કારણે સામાન્ય લોકોના જીવ જોખમમાં છે. જેના કારણે લોકો પોતાનો જીવ બચાવવા સલામત સ્થળો તરફ હિજરત કરી રહ્યા છે. લાખો વિસ્થાપિત લોકોનો આ આંકડો ચિંતાજનક છે, જે કેરેબિયન રાષ્ટ્રમાં સંકટની ગંભીરતા દર્શાવે છે.
હૈતી લાંબા સમયથી અશાંતિમાં છે, પરંતુ ફેબ્રુઆરીના અંતમાં સશસ્ત્ર ગેંગે ઘણા મોટા હુમલાઓ શરૂ કર્યા હતા. બંદૂકધારીઓએ પોલીસ સ્ટેશનો પર કબજો કર્યો, મુખ્ય આંતરરાષ્ટ્રીય એરપોર્ટ પર ગોળીબાર કર્યો અને હૈતીની બે સૌથી મોટી જેલો પર પણ હુમલો કર્યો. ફાયરિંગના કારણે એરપોર્ટ લગભગ ત્રણ મહિના સુધી બંધ રહ્યું હતું. ઈન્ટરનેશનલ ઓર્ગેનાઈઝેશન ફોર માઈગ્રેશન દ્વારા મંગળવારે જારી કરાયેલા અહેવાલમાં જણાવવામાં આવ્યું છે કે હૈતીની રાજધાની પોર્ટ ઓ પ્રિન્સમાંથી અડધા મિલિયનથી વધુ લોકો અન્ય પ્રાંતોમાં ભાગી ગયા છે.
ગુજરાન ચલાવવું મુશ્કેલ બન્યું છે
હૈતીમાં સામૂહિક સ્થળાંતર ચાલુ છે. આવી સ્થિતિમાં લોકો માટે રોજીરોટી મેળવવી મુશ્કેલ બની ગઈ છે. આ લોકો તેમની આજીવિકા ટકાવવા માટે પૂરતા સંસાધનોના અભાવે વિસ્થાપિત થયા છે. એજન્સીએ કહ્યું કે માર્ચ મહિનામાં હૈતીમાં 3,62,000 થી વધુ લોકો વિસ્થાપિત થયા છે. કેરેબિયન દેશમાં વધી રહેલી હિંસાને કારણે વિસ્થાપિત લોકોની સંખ્યા લગભગ બમણી થઈ ગઈ છે.
